თუ დღეისთვის ევროპის მთელ რიგ ქვეყნებში ნარჩენების შეგროვება, დახარისხება და გადამუშავება თუ ისეთ დონეზეა აყვანილი, რომ ნაგავსაყრელებზე მცირე ნაწილიღა ხვდება, ჩვენთან, მიუხედავად გამკაცრებული კანონმდებლობისა, პრობლემა პრობლემად რჩება და ამ მხრივ საქმე წინ არ მიდის.
ამ ეტაპზე მხოლოდ გარემოს, კონკრეტულად, ცენტრალური ტრასების დანაგვიანების საკითხს შევეხებით _ ადამიანთა დიდი ნაწილი, ვინც ავტომობილებით თუ სხვა სამგზავრო საშუალებებით გადაადგილდებიან, ფანჯრიდან ყრიან ნაგავს _ ეს არის პოლიეთილენის ბოთლები და პარკები, სიგარეტის ყუთები თუ ნამწვი, საკვების ნარჩენები, გაზიანი სასმელების ბალონები. ძირითადად, მუნიციპალური ნარჩენებია, რომლითაც, გზის ორივე მხარეა მოფენილი.
ახლახან, ოზურგეთის ახალგაზრდული ცენტრის ინიციატივით, წამოწყებული კამპანიის _ "ერთად დავასუფთავოთ ოზურგეთი" _ ფარგლებში, რომელშიც ოზურგეთელი მოსწავლეები მონაწილეობდნენ, დასუფთავდა ოზურგეთი-ქობულეთის მიმართულებით ტრასის სამკილომეტრიანი მონაკვეთი.
როგორც "გურია ნიუსთან" ლიდერთა სკოლის მენეჯერი ნონა სადრაძე ამბობს, ამ აქციის მიზანი იყო ერთგვარი ულტიმატუმიც _ ჩვენ გვინდა სუფთა გარემოში, სუფთა ქალაქში ცხოვრება!
მიუხედავად ამ აქციისა და ოზურგეთის მუნიციპალიტეტის დასუფთავების სამსახურის მუშაობისა, ოზურგეთი-ბათუმის მიმართულებით, ცენტრალური ტრასის ორივე მხარეს, ყოველდღიურად, ისევ მუნიციპალური ნარჩენებია მოფანტული.
_ სახელმწიფოებრივი შეგნება იწყება იქედან, რომ, თუნდაც, ნაყინის ქაღალდი, ბავშვმა თუ ზრდასრულმა, სანაგვე ურნაში ჩააგდოს და არ ისროლოს პირდაპირ ქუჩაში. სამწუხაროდ, იმდენად დაბალია მოქალაქეობრივი განათლების დონე ამ კუთხით, რომ ვეჭვობ, ეს ყველაფერი მალე გამოსწორდეს. ჩვენ როცა დასუფთავების აქცია დავასრულეთ (ეს იყო სერიოზული ნაგავი), დავურეკეთ ქალაქის დასუფთავების სამსახურს. ისინი მალე მოვიდნენ და წაიღეს ეს ნაგავი, მაგრამ ცოტა ხნის შემდეგ ქუჩები ისევ დანაგვიანებული იყო. აუცილებლად უნდა ამოქმედდეს კანონი, რომელიც უკვე მიღებულია და დაჯარიმდეს ყველა, ვინც ანაგვიანებს გარემოს. რატომ ვასწავლით ბავშვებს, რომ კანონი უზენაესია? იმიტომ, რომ სახელმწიფოს სიყვარული იქედან იწყება, როცა პოლიეთილენის პარკს ქუჩაში არ მოისვრი და თუ ამას გააკეთებ, დაისჯები! კანონის დონეზე უნდა ამოქმედდეს თვითშეგნება, რაც ნაბიჯ-ნაბიჯ მაინც მიგვიყვანს სუფთა გარემოსთან! კატასტროფაა, რაც ირგვლივ ხდება და კარგია, რაც მეტჯერ და ხშირად დაიწერება ამის შესახებ, _ ამბობს ნონა სადრაძე. მისივე თქმით, აქციის მიზანი ისიც იყო, ხმა მიეწვდინათ სხვადასხვა სტრუქტურებისთვის და გამოეწვიათ ასეთ საქმიანობაში, თუმცა, გამოხმაურება არ ყოფილა.
კითხვები, რატომ არ სურს საზოგადოებას დასუფთავებულ გარემოში ცხოვრება და რატომ არ ხდება ურჩი და დაუდევარი მოქალაქეების დაჯარიმება, რომლებიც არ ერიდებიან ცენტრალური ტრასების დანაგვიანებას, სადაც უამრავი სტუმარი და უცხოელი მოძრაობს, "გურია ნიუსს" პასუხობს გარემოს დაცვითი ზედამხედველობის დეპარტამენტის დასავლეთ საქართველოს რეგიონული სამმართველოს მთავარი სპეციალისტი, იურისტი თინათინ ახვლედიანი:
_ 2015 წლის 1 იანვრიდან ძალაში შევიდა შესაბამისი კანონი და "ნარჩენების მართვის კოდექსი". საკმაოდ დიდი მუშაობა ხორციელდება. ჩვენთან ერთად მუშაობს საპატრულო პოლიცია და ასე ხდება იმ პირთა გამოვლენა, ვინც ტრასებზე პირდაპირ ყრის მუნიციპალურ ნარჩენებს.
მარტო წლის განმავლობაში ათასამდე საჯარიმო ოქმია დაწერილი მათზე, ვინც ქუჩაში ნაგავს ისვრის. იურისტები, რომლებიც სახელმწიფო ინტერესებს ვიცავთ, პროცესებზე მისვლას ვერ ავუდივართ. ხშირია 80-100-ლარიანი ჯარიმების გამოწერა. თუ სტატისტიკას მოვიშველიებთ, გურიაში ყველაზე მეტი ოქმი ამ მხრივ ჩოხატაურში დაიწერა; ასევე, ბევრი ოქმია დაწერილი ლანჩხუთშიც. ასე რომ, ნუ იტყვით, თითქოს, არაფერი კეთდება და კანონის აღსრულება არ ხდება.
ხშირად ძნელია ფაქტის დაფიქსირებაც _ მანქანებიდან, ძირითადად, პოლიეთილენის ბოთლებს, ქაღალდს თუ საკვების ნარჩენებს ისვრიან და ყველა შემთხვევის დაფიქსირება ძალიან ძნელია, მიუხედავად იმისა, რომ ტრასებზე ხშირად პატრულირებს პოლიცია. მოქალაქეობრივი დონე და თვითშეგნება რომ ამაღლდეს, ამის შესახებ იურიდიული კანონი რომ არ არსებობს, ვიცით და ხსნა იმაშია, რომ საზოგადოებას უნდა მოუნდეს აბსოლუტურად სუფთა გარემოში ცხოვრება. ვერ ვიტყვით, რომ არ სურს, თუმცა, მავნე ჩვევა ადვილი დასათმობი რომ არ არის, ვხედავთ, _ გვითხრა ახვლედიანმა.
