"ყველამ "ქართულ ოცნებას" მივეცით ხმა. ახლა გვინდა, ჩვენს პრობლემებს მიხედოს მთავრობამ _ ლოდინის დრო არ გვაქვს! სულ ცოტა, 8 წელია, ვეხვეწებით ხელისუფლებას, რომ გაზი გვაღირსონ და გზას მიხედონ. სოფლის ერთ ნაწილში თუ ათი წელია, გაზი შემოყვანილია, რა უსაშველო ჭირთ ასეთი, რომ მეორე თემს ლოდინში ამოგვხადეს სული? გვითხრან, ბატონო, რა ვქნათ! ფულია საჭირო? გვიჭირს, მაგრამ მოვახერხებთ და დავდებთ. განცხადებაა საჭირო? რამდენჯერ დავწერეთ, აღარც გვახსოვს. პროტესტის გამოხატვა გზების გადაკეტვით და ყვირილით, მგონი, წარსულს ჩავაბარეთ. ყოველ შემთხვევაში, სოფელში გაზის შემოყვანის მოთხოვნისთვის ასეთი ფორმა არ უნდა დაგვჭირდეს! გზა და გაზი მარადიულ პრობლემად არ უნდა გვექცეს", _ ასეთი შინაარსის განცხადება "გურია ნიუსის" რედაქციაში ოზურგეთის მუნიციპალიტეტის სოფელ ჭანიეთის თემის ქაქუთის მცხოვრებლებმა ამირან ქავთარაძემ, ლია ურუშაძემ, დიმიტრი ხურციძემ, ნატო ქავთარაძემ, ნანული კვირკველიამ, ამირან ღლონტმა და კიდევ მრავალმა შემოიტანეს _ თითქმის ყველამ, ვინც სოფელ ქაქუთში ცხოვრობს. ისინი კატეგორიულად მიმართავენ ხელისუფლებას, რომ ეს შეხსენება დროში ისე არ გაიწელოს, როგორც ბოლო შვიდი წლის განმავლობაში ხდება.
ქაქუთელთა წუხილი კონკრეტული ყოფითი პრობლემების მოსაგვარებლად (გაზის, გზის, გარე განათების, წყლის არქონა) მრავალ წელია, გრძელდება და გარკვეულწილად. ისინი ხშირად სვამენ კითხვებს:
"რატომ კეთდება ყველაფერი ჭანიეთში და ქაქუთამდე ამოსვლა უსაშველო რატომ გახდა? გაზი ქაქუთის დასაწყისამდე მოიყვანეს და გაჩერდნენ; ლამპიონები ჭანიეთის გადმოსახვევიდან ცენტრამდე კეთდებოდა სულ, ქაქუთში ორი წლის წინ ორიოდე ლამპიონი დადგეს და აგერაა, ბატონო, გადაიღეთ _ გადამწვარია! გზა, ათი წელიწადია, ჭანიეთის გადმოსახვევიდან სოფლის ცენტრამდე რემონტდება. მართალია, ორმოების "დაკერებით", მაგრამ ასეთი ფორმითაც არავინ აკეთებს ქაქუთში. ერთხელ მოიხრეშა და მორჩა! იქნებ, გვითხრან, კიდევ რამდენი წელი უნდა ველოდოთ მოწყალებას?! ახლა, უპირველესად, გაზის გამოყვანას ვითხოვთ და გაგვცენ კონკრეტული პასუხი. რასაც გვეტყვიან, გადავიხდით, მეტი რა ვთქვათ და რა ვქნათ?" _ ამბობს მოსახლეობა.
სოფელ ჭანიეთში გაზის შეყვანა რამდენიმე წლის წინ დაიწყო და ძირითადად, სოფლის ცენტრალური გზის გასწვრივ მდებარე ოჯახებმა შეძლეს დამონტაჟება. რაც შეეხება სოფლის ცალკეული უბნების დაქსელვას, ამაზე კომპანიამ, ძირითადად, უარი თქვა და მოსახლეობის იმ ნაწილმა გააკეთა, ვინც ერთობლივი ხარჯები გაიღო და საკუთარი სახსრებით დააფინანსა სამუშაოები. გაზის ცენტრალური მილი დღეისთვის სოფელ ქაქუთის დასაწყისამდე მიყვანილია. ხუთი წლის წინ, როცა აქამდე მოხდა გაზის გამოყვანა, ქაქუთელები დაიმედებულნი იყვნენ, რომ მომავალ წელს მათ ოჯახებშიც აინთებოდა ცისფერი ალი, თუმცა, მას შემდეგ მრავალი წელი გავიდა და საქმე ადგილიდან არ დაძრულა.
_ ჩვენამდე მოაღწია ინფორმაციამ, რომ გაზის მილს სოფელ ქაქუთის ცენტრამდე ამოიყვანენ, შემდეგ კი, შეაჩერებენ. ქაქუთის ის უბანი, სადაც ჩვენ ვცხოვრობთ, კილომეტრნახევრითაა დაშორებული ქაქუთის ცენტრს. ამ უბანში 30-მდე ოჯახი ცხოვრობს. ჩვენ რა ვქნათ, კიდევ შვიდი წელი ველოდოთ გაზს? სიმართლე გვითხრან და დროზე გააკეთონ, ახლა მაინც აღარ ეყოლება ხელისშემშლელი ჩვენს ხელისუფლებას, _ გვითხრეს აღნიშნული უბნის მცხოვრებლებმა.
"გურია ნიუსი" ესაუბრა ოზურგეთის მუნიციპალიტეტის გამგებლის წარმომადგენელს სოფელ ჭანიეთში მერაბ ბერაძეს, რომელმაც თქვა, რომ "გაზსადენი მილის სოფელ ქაქუთამდე გაგრძელების თაობაზე მართლაც იყო საუბარი, თუმცა, სოფლის დონეზე".
_ ახლა წლის ბოლო ახლოვდება და ასე უცებ ვერაფერს გავაკეთებთ. არ არის დღე, რომ სოფლის პრობლემურ საკითხებზე არ ვმსჯელობდეთ. "სოკარ ჯორჯია გაზის" რაიონულ ხელმძღვანელობასთან არა ერთხელ მისაუბრია და ისინი ამბობენ, რომ გაზიფიცირებას ახდენს სახელმწიფო, ხოლო დასრულებული სამუშაოების შემდეგ ისინი იბარებენ კონკრეტულ სოფლებს, უბნებს და ახდენენ მათ კონტროლს გამართული მუშაობისთვის. გზას რაც შეეხება, ისევე, როგორც გაზიფიცირების დროს, არსებობს გარდამავალი პროექტები. ერთბაშად არ მთავრდება ყველა სამუშაო ყველა სოფელში თუ სხვადასხვა უბანზე. ჭანიეთსა და ქაქუთში არის გზის პრობლემაც და ერთ-ერთ პირველს მე მინდა, რომ ეს საქმე მოგვარდეს. ახლა მუნიციპალიტეტის ბიუჯეტი უნდა შედგეს და გზის თაობაზე, ვფიქრობ, კონკრეტულ გადაწყვეტილებას მიიღებენ. მე არ დავაკლებ მცდელობას, რომ სოფელში უგზოობის პრობლემა ერთხელ და სამუდამოდ მოგვარდეს. 30 წელია, გზა გასაკეთებელია და სხვაც ბევრი რამ. სოფელში აშენდა ევროსტანდარტების მქონე საბავშვო ბაღი, ახლა იწყება სკოლის მშენებლობა. მრავალი წლის განმავლობაში სასაფლაოზე გზა არ იყო და ახლა გაკეთდა. ასევე, ცალკეულ უბნებში, ციცაბო აღმართებზე დაიგო ბეტონის საფარი. ბევრი რამ გაკეთდა, რაც ბოლო 20 წელიწადში არ გაკეთებულა და ვეცდებით, მეტი გავაკეთოთ უფრო მოკლე დროში. რაც შეეხება ლამპიონებზე გადამწვარ ნათურებს, აღრიცხვას ვაკეთებ, რამდენია უვარგისი და შემდეგ მივმართავ ქალაქის შესაბამის სამსახურს. ერთი ნათურისთვის ხომ ვერ გამოვიძახებ ბრიგადას დასახმარებლად?! _ გვითხრა მერაბ ბერაძემ.
შპს "სოკარ ჯორჯია გაზის" სამეგრელო -გურიის რეგიონის ოზურგეთის სერვისცენტრის მენეჯერი გია ელიაძე "გურია ნიუსთან" შემდეგი სახის განცხადებას აკეთებს:
_ კონკრეტულად სოფელში გაზის შეყვანის თუ იქვე არსებული შეჩერებული სამუშაოს გაგრძელების უფლება ჩვენ არ გვაქვს. ჩვენი კომპანია სახელმწიფოსგან უკვე აშენებულ თუ დამთავრებულ ობიექტს იბარებს. რაც შეეხება სამუშაოების დაწყებას თუ გაგრძელებას ამა თუ იმ უბანზე, ეს ხდება სახელმწიფოს მიერ, ტენდერების გამოცხადების და დასრულების შემდეგ.
_ ბატონო გია, ვერანაირ კონკრეტულ ინფორმაციას ვერ გვეტყვით იმის თაობაზე, თუ როდის მოხდება იმ სოფლების გაზიფიცირება, სადაც ჯერ არ არის ან შეჩერებულია სამუშაოები?
_ მე მხოლოდ იმას გეტყვით, ასე ვთქვათ, ჭორის დონეზე, რომ 2017 წლის ბოლომდე მთელ ქვეყანაში უნდა დასრულდეს გაზიფიცირება. სოფელ ჭანიეთში ნაწილობრივ არის დარჩენილი სამუშაოები და ჩემი აზრით, ასეთ სოფლებში უფრო ადრე მოხდება დაწყებული სამუშაოების დასრულება. მეტს ვერაფერს გეტყვით. ამ საქმეს წყვეტს სახელმწიფო, კონკრეტულად კი ენერგეტიკის სამინისტრო, _ გვითხრა ელიაძემ.
