"ქართულმა ოცნებამ" საპარლამენტო არჩევნების პირველ ტურში 21 10 775,45 ლარი დახარჯა. აუდიტის სამსახურის ვებ-გვერდზე გამოქვეყნებული ოფიციალური ინფორმაციის თანახმად, თანხაში შედის ხელფასები, რეკლამები, მივლინებები, საიჯარო ფართების ქირა, კონცერტების ღირებულება.
თანხის დიდი ნაწილი პარტიამ შემოწირულობებით შეაგროვა. მხოლოდ სექტემბერში, "ქართული ოცნების" შემოწირულობამ 8 მილიონამდე ლარი შეადგინა. მსხვილ შემომწირველებს შორის ბევრი დეპუტატობის კანდიდატი იყო. მაგალითად: პაატა მხეიძემ პარტიას 10 000 ლარი გადაურიცხა; ფატი ხალვაშმა _ 20 000 ლარი; გია ვოლსკიმ _ 8 000 ლარი; ნინო გოგუაძემ _ 20 000 ლარი; ზაზა გაბუნიამ _ 30 000 ლარი; სოფიო კილაძემ _ 35 ათასი ლარი; იოსებ მაკრახიძემ _ 50 ათასი ლარი; ლევან კობიაშვილმა _ 55 ათასი ლარი; მანანა კობახიძემ _ 35 ათასი ლარი; ერეკლე ტრიპოლსკიმ _ 35 ათასი ლარი; ზვიად კვაჭანტირაძემ _ 35 ათასი ლარი; ოთარ ჩრდილელმა _ 25 ათასი ლარი; ეკა ბესელიამ _ 35 ათასი ლარი; მამუკა მდინარაძემ – 30 ათასი ლარი; კახა კალაძემ _ 50 ათასი ლარი; სამველ მანუკიანმა _ 45 ათასი ლარი; ირაკლი კობახიძე _ 50 ათასი ლარი; კახაბერ კუჭავამ _ 55 ათასი ლარი; ვიქტორ ჯაფარიძემ _ 35 ათასი ლარი; გია ჟორჟოლიანმა _ 40 ათასი ლარი; აკაკი ზოიძემ _ 50 ათასი ლარი; გიგა ბუკიამ _ 35 ათასი ლარი.
აღსანიშნავია, რომ ზემოთ ჩამოთვლილი შემომწირველების უმრავლესობა, სექტემბერში პარლამენტის მოქმედი დეპუტატი იყო. მათი თვიური ხელფასი 3 790 ლარს შეადგენდა (2000 ლარი _ თანამდებობრივი სარგო, 1790 ლარი _ სადეპუტატო უფლებამოსილების თანხა) რაც წელიწადში 45 480 ლარია. ამ ფონზე კი ერთჯერადად გაცემული შემოწირულობა საკმაოდ სოლიდურია.
დეპუტატ ოთარ ჩრდილელის თქმით, პარტიას თანხა დანაზოგიდან მისცა:
"დაარსების დღიდან "ქართული ოცნების" წევრი ვარ. მანამდე ვმუშაობდი კერძო საფინანსო სექტორში, შემდეგ პარლამენტის წევრი ვიყავი და ვრჩები. გარკვეული დანაზოგი მქონდა", _ აღნიშნა ჩვენთან საუბრისას ჩრდილელმა.
შემომწირველი დეპუტატების უმრავლესობამ ამ თემაზე საუბარი არ ისურვა. მხოლოდ ის გვითხრეს, რომ ყველაფერი კანონიერად გაკეთდა.
თანხის წარმომავლობას არც ოზურგეთის მაჟორიტარი დეპუტატობის კანდიდატი არჩილ თალაკვაძე აკონკრეტებს, რომელმაც "ქართულ ოცნებას" სექტემბერში 50 000 ლარი შესწირა:
"შემოწირულობის უფლება აქვს ყველას საკუთარი დანაზოგიდან, შემოსავლიდან ან სხვა ლეგალური წყაროდან. შენატანი გავაკეთე საქართველოს კანონმდებლობის სრული დაცვით", _ ასე უპასუხა არჩილ თალაკვაძემ "გურია ნიუსის" კითხვას, თუ როგორ მოაგროვა 50 000 ლარი, როცა მისი ხელფასი არც თუ მაღალი გახლდათ და არც ბიზნესს ფლობდა.
უცნობია, რამდენი გაიღო საარჩევნო კამპანიისთვის ლანჩხუთისა და ჩოხატაურის დეპუტატობის კანდიდატმა ნინო წილოსანმა. აუდიტის სამსახურის მიერ გამოქვეყნებულ ინფორმაციაში, შემომწირველებს შორის წილოსანი არ იძებნება. როგორც ირკვევა, შემოწირულობა მისმა ახლობლებმა გააკეთეს, რადგან დეპუტატობის კანდიდატი ჩვენთან საუბრისას არ უარყოფს, რომ პარტიას კონკრეტული თანხა შესწირა _ ოღონდ რამდენი, არ ახსოვს.
ამ საკითხზე ჩვენთან საუბარი ნინო წილოსანმა სმს-ებით არჩია, მიზეზად კი ტრენინგზე ყოფნა დაასახელა:
"პარტიაში ჩემი შენატანების შესახებ ინფორმაცია საჯაროა და შეგიძლიათ გამოითხოვოთ. ხოლო დეპუტატად გახდომისთვის ჩემი სიყვარული, კეთილგანწყობა და სწრაფი განვითარების დიდი სურვილი გავუზიარე მოსახლეობას და მოვიპოვე მათი სამართლიანი მხარდაჭერა", _ მოგვიმესიჯა წილოსანმა.
ჩვენ ასევე დავინტერესდით რა დაუჯდა ნინო წილოსანს ყოფილი კონკურენტის _ გურამ ჩალაგაშვილის მხარდამჭერი წერილი მეორე ტურში:
"მე ფულით კეთილგანწყობას არ ვყიდულობ. ჩემთვის შეურაცხმყოფელია, ზოგ-ზოგიერთებისგან განსხვავებით. კარგი ადამიანი ვარ, უბრალოდ," _ აღნიშნა წილოსანმა.
_ ქალბატონო ნინო, ჩალაგაშვილის კომენტარები და ინტერვიუ, თქვენი და თქვენი ოჯახის აფიორაში დადანაშაულება შეურაცხმყოფელი არ იყო?
_ შეცდომაში შეყვანილი ადამიანი მალე იგებს სიმართლეს.
_ ბატონი გურამი დოკუმენტებზე დაყრდნობით საუბრობდა…
_ თქვენც შეცდომაში ყოფილხართ შეყვანილი.
_ იქნებ, გვითხრათ რა არის შეცდომა _ ჩალაგაშვილის ტყუილს ამბობდა?
_ ძალიან სასიამოვნოა თქვენთან მიმოწერა, მაგრამ ერთ ადგილს ვტკეპნით (?!). გურამი შეცდომაში იყო შეყვანილი, _ მოგვწერა წილოსანმა და კითხვა, პირადად მოუხდა ჩალაგაშვილის დარწმუნება შეცდომაში თუ ამაში თანაგუნდელების დახმარება დასჭირდა, უპასუხოდ დატოვა.
გურამ ჩალაგაშვილმა _ ჩოხატაურისა და ლანჩხუთის დეპუტატობის ყოფილმა კანდიდატმა დაგვიდასტურა, რომ მეორე ტურის წინ ნინო წილოსანს პირადად შეხვდა.
ჩალაგაშვილი დარწმუნებულია, რომ მეორე ტურში სწორი გადაწყვეტილება მიიღო, თუმცა, წილოსანის დასახელებულ "შეცდომებზე" კომენტარს არ აკეთებს:
_ ბატონო გურამ, რა დაჯდა თქვენი მხარდაჭერა იმ ფონზე, როცა პირველ ტურში დოკუმენტების თანხლებით ხმამაღლა საუბრობდით წილოსნების ოჯახის კორუფციულ გარიგებებზე, მიიჩნევდით, რომ თემით პროკურატურა უნდა დაინტერესებულიყო… თუმცა, მეორე ტურის წინ, ძალიან მალე, პოზიცია შეიცვალეთ…
_ ღრმად ვარ დარწმუნებული, რომ აბსოლუტურად სწორი გადაწყვეტილება მივიღე და თუ რატომ, ამის თაობაზე სწორედ ბოლო ინტერვიუში მივუთითე მოკლედ და გასაგებად. რაც შეეხება თანხას, ძალიან გადატვირთული გრაფიკი მაქვს და სიმართლე გითხრათ, ჯერ არ დამითვლია. როგორც კი გადავითვლი, მყისვე მოგახსენებთ, _ გვითხრა ჩალაგაშვილმა.
