ამ დროს, მეგის ქარდავამ პლატონ მამარდაშვილს მაკრატლით ამოაჭრა ერთი ბღუჯა თმა და ჩაუდო ჯიბეში, როდესაც პლატონ მამარდაშვილმა უთხრა, გეყოფა ამდენი დამცირებაო, იქვემდგომმა ნიღბიანმა სახის არეში დაარტყა რკინიანი ხელი, რა დროსაც მოტყდა კბილი და ცხვირპირიდან წამოუვიდა სისხლი. დაინახა, რომ ხელკეტებს ურტყამდნენ ვიბლიანსაც და ავალიანსაც… დერეფანში აიძულეს ჩაკუზულიყო და ამ მდგომარეობაში მყოფს დაახლებით 10 წუთი ურტყამდნენ ხელკეტებს. შემდეგ ლ. ცინდელიანთან ერთად გაიყვანეს ეზოში, სადაც მიწაზე ეყარნენ ვიბლიანი და ავალიანი. იქაც გააგრძელეს ცემა, რა დროსაც გაიგო პატიმრების ხმა, რომლებიც მოუწოდებდნენ შეეწყვიტათ ცემა. შემდეგ ოთხივენი გადაიყვანეს #7 საპყრობილეში, სადაც საერთოდ გააშიშვლეს და გააგრძელეს ცემა, რის შემდეგაც შიშვლები შეყარეს საკანში. პლატონ მამარდაშვილი უარყოფს ვინმესთან ბუნტზე და არეულობაზე საუბარს, აცხადებს, რომ არც არავისთვის გაუწევია წინააღმდეგობა და არც დაუმორჩილებლობისაკენ მოუწოდებია. მისი აზრით არეულობის და ხმაურის დაწყების მიზეზი გახდა პატიმრების ცემის ფაქტი სამკურნალო დაწესებულების ეზოში.
2006 წლის 13 აპრილის საქართველოს იუსტიციის სამინისტროს საგამოძიებო დეპარტამენტის დადგენილებით, ბრალდებულის სახით პასუხისგებაში მიცემულ იქნა პლატონ მამარდაშვილი, რომ მან ჩაიდინა სასჯელაღსრულების დაწესებულების თანამშრომლის კანონიერი მოთხოვნისადმი დაუმორჩილებლობა ამ დაწესებულების საქმიანობის დეზორგანიზაცია, სასჯელაღსრულების დაწესებულების ადმინისტრაციაზე თავდასხმა და ამავე მიზნით დანაშაულებრივი დაჯგუფებისშექმნა, მანვე ჩაიდინა ზემოთ აღნიშნული ქმედება ჩადენილი განსაკუთრებით მძიმე დანაშაულისთვის. მანვე, ჩაიდინა კანონიერი ქურდობა.
მსჯავრდებრალდებულად დაკითხვისას პლატონ მამარდაშვილმა წარდგენილ ბრალდებაში თავი არ სცნო დამნაშავედ. მან აჩვენა, რომ ოთხი თვის წინ უარი განაცხადა კანონიერ ქურდობაზე.
სახალხო დამცველის არქივში კი მეტად საინტერესო მასალა ინახება. ჩანაწერში, პლატონ მამარდაშვილი ყვება, როგორ აპირებდნენ დანაშაულის პროვოცირებას ბაჩო ახალაია და მეგის ქარდავა.
“14 იანვარს გადამიყვანეს… მეგის ქარდავას დავუკავშირდი და ვუთხარი, რომ უარს ვამბობ-მეთქი ჩემს ტიტულზე და თუ შეღავათები მექნება და გამათავისუფლებთ, ვითანამშრომლებ. გავიდა დაახლოებით ერთი თვე და მითხრეს, რომ დაუძახებთ ზევიდან ვიღაც პატიმარს და მოაწყობთ ასეთ რაღაცას: თვითონ დაიზიანებდა სხეულს, ჩვენ კი მივმართავდით სახალხო დამცველს ან ნანა კაკაბაძეს, რომ ბაჩო ახალაიამ აწამაო. ამ დროს კი ბაჩოს ექნებოდა ჩანაწერი, რომ ყოველაფერი ეს ჩვენ დავგეგმეთ.“(სტილი დაცულია)
პლატონ მამარდაშვილმა, მოგვიანებით ეს ჩვენება შეცვალა. ეს მას სემდეგ მოხდა, რაც მოსამართლემ ის დაჩქარებული წესით არ დაკითხა.
ციხის ბუნტის” საქმის ერთ-ერთი ბრალდებულის, ზედელაშვილის ადვოკატი, გელა ნიკოლაიშვილი იხსენებს, რომ “ბუნტის საქმის” სასამართლო პროცესზე, მამარდაშვილი ავადმყოფობის მოტივით აღარ მიჰყავდათ.
გელა ნიკოლაიშვილი: “პლატონ მამარდაშვილმა, მანამდე “კანონიერ ქურდობაზე” ნებაყოფილობით თქვა უარი. ეს ჩაწერილი და დადასტურებულია. მან სახალხო დამცველთან, რომელიც ფირზეა ჩაწერილი თქვა: “ბაჩო ახალაიას, კაბინეტში ვყავდი მიყვანილი. მე და ბაჩო ახალაიამ მოვილაპარაკეთ, გაგვეკეთებინა აღნიშნული ფარული ჩანაწერი 25 მარტს და არეულობის პროვოცირება მოგვეხდინაო. მან დეტალურად აღწერა ახალაიას კაბინეტიც.
შემდეგ, ალბათ, რაღაცას დაპირდნენ, ან შეაშინეს და უარყო ეს ყველაფერი. შემდეგ როცა ჰკითხეს, _ თუ ბაჩო ახალაიას კაბინეტში ნამყოფი არ ხარ, მისი ოთახი როგორ აღწერეო, განაცხადა ტელევიზორში ვნახეო. ეს გამორიცხული იყო, რადგან როცა ახალაია დანიშნეს, იგი მე-7 საპყრობილეში იჯდა. შემდეგ, ციხის რეპუბლიკურ საავადმყო¬ფოში, აბსოლუტურად იზოლირებულ საკანში გადაიყვანეს და ამ პირობებში, მას ტელევიზორის ყურება არსად შეეძლო.”
მას შემდეგ, რაც მამარდაშვიმა ბაჩო ახალაიას წინააღმდეგ სახალხო დამცველისთვის მიცემული ჩვენება უარყო, ის ციხის საავადმყოფოში გადაიყვანეს და საკმაოდ ძვირადღირებული ოპერაციაც გაუკეთეს.
მიუხედავად იმისა, რომ მაშინ ეს აუდიოჩანაწერი სასამართლომ მტკიცებულებად ცნო, მისი გამოკვლევა არ მომხდარა და არც თანამდებობის პირების მხრიდან დანაშაულის პროვოცირების ფაქტი შეუსწავლია ვინმეს.
სახალხო დამცველის 2008 წლის პირველი ნახევრის ანგარიშში ვკითხულობთ:
_ საქმის მასალებით დასტურდება, რომ 26 მარტს სასჯელაღსრულების მთელ ტერიტორიაზე იყო სიმშვიდე. 27 მარტს, დაახლოებით 01:00 საათზე, ბაჩო ახალაიამ თავის კაბინეტში დაიბარა “სად”-ის უსაფრთხოების სამსახურის ოპერატიულ–სამძებრო განყოფილების უფროსი დავით ჭაკუა, რომელსაც უთხრა, მოეხდინათ ბუნტის ორგანიზებაში ეჭვმიტანილი პატიმრების #7 საპყრობილეში გადაყვანა, რისთვისაც ჭაკუას ორგანიზება უნდა გაეკეთებინა თავისი განყოფილების თანამშრომლებისთვის. დ. ჭაკუამ აღნიშნულზე გააფრთხილა სად უსაფრთხოების სამსახურის ოპერატიულ სამძებრო განყოფილების უფროსი ინსპექტორი გ. ხუხია,სხვა თანამშრომლები დ. მარგებლიძე, ზ. ბოხუა, გ. შონია, სად უსაფრთხოებისსამსახურის უფროსი გ. აბსანაძე, მისი თანამშრომლები კ. ოქრუაშვილი და დ.შამუკაძე, ზემოთ აღნიშნულ პირებთან ერთად ბ. ახალაია მივიდა სამკურნალო დაწესებულების ტერიტორიაზე, სადაც დაიწყო პატიმრების გამოყვანა, მაგრამ ეს პროცესი იმდენად ხმაურიანად წარიმართა, რომ არა თუ მოსალოდნელი არეულობა აღკვეთა, პირიქით, უფრო დაჩქარდა და თუ გამოძიების ვერსიას გავიზიარებთ, ბ. ახალაიას მიერ დაწყებულმა პროცესმა ხელი შეუწყო ბუნტის ორგანიზატორებს არეულობის მოხდენაში, ანუ ბაჩო ახალაიამ დააჩქარა პროცესი.”
ბაჩო ახალაია ამ საქმის შემდეგ დააწინაურეს და თავდაცვის მინისტრად დანიშნეს, ახლა შინაგან საქმეთა სამინისტრო გადააბარეს და არ არის გამორიცხული, უახლოეს მომავალში, ის ადამიანის უფლებების დაცვის სფეროში ექსპერტადაც ვიხილოთ…
