კომპანია, რომელიც კასპის მოსახლეობის ჯანმრთელობას საფრთხეს უქმნის, 5 000 ლარით არის დაჯარიმებული, თუმცა ჯარიმა შესაძლოა გასამმაგდეს. ამის შესახებ "გურია ნიუსს" გარემოს დაცვის ზედამხედველობის სამსახურში განუცხადეს.
"ჰაიდელბერგ ცემენტის" ქარხანას ჯარიმა გადახდილი ჯერჯერობით არ აქვს, ამ ეტაპზე ვადების განსაზღვრა მიმდინარეობს.
შეგახსენებთ, რომ "გურია ნიუსი" 11 ნოემბერს, კავკასიის გარემოს დაცვითი არასამთავრობო ორგანიზაციების ქსელის, CENN-ის ორგანიზებით კასპში მედაიტურზე იმყოფებოდა. მედიატურის ფარგლებშიც, ჟურნალისტებს კასპის მოსახლეობასთან გასაუბრების და მათი პრობლემების ადგილზე გაცნობის საშუალება მიეცათ.
როგორც კასპის მოსახლეობა აღნიშნავს, მათ მთავარ პრობლემას "ჰაიდელბერგ ცემენტის" ქარხნის მიერ წარმოებული ცემენტის მტვერი წარმოადგენს, რადგან ის უარყოფითად მოქმედებს მათ ჯანმრთელობაზე.
აღსანიშნავია, რომ მოსახლეობის პრეტენზიებს ცემენტის მწარმოებელი კომპანია უპასუხოდ ტოვებს.
იმის გასარკვევად თუ რა მდგომარეობაა ამჟამად "ჰაიდელბერგ ცემენტში" და გეგმავს თუ არა გარემოს დაცვის სამინისტრო მსგავსი ტიპის საწარმოებისადმი კონტროლის გამკაცრებას "გურია ნიუსი" გარემოს დაცვითი ზედამხედველობის დეპარტამენტის გარემოს დაბინძურების კონტროლის განყოფილების უფროსს, ვერიკო აღლემაშვილს ესაუბრა.
როგორც აღლემაშვილი ამბობს, მსგავსი ტიპის საწარმოები წელიწადში ერთხელ მოწმდება.
"სამთო მოპოვებითი საწარმოები შეიძლება შევამოწმოთ როგორც გეგმიურად, ასევე არაგეგმიურად. გეგმიური შემოწმება წელიწადში ერთხელ ხორციელდება, ხოლო არაგეგმიური შემოწმება ფორსმაჟორის შემთხვევაში ხდება,"_ამბობს აღლემაშვილი.
გარემოს ინტეგრირებული კონტროლის სამსახურის დაბინძურების კონტროლის განყოფილების უფროსის თქმით, ჰაიდელბერგ ცემენტი 2016 წლის იანვარში შემოწმდა და ამჟამად 5 000 ლარით არის დაჯარიმებული.
"ჰაიდელბერგ ცემენტის" საწარმო, რომელიც კასპში მდებარეობს, გარემოს ზედამხედეველობის სამსახურის ნებართვა აქვს და მისი შემოწმება 2016 წლის იანვარში სწორედ ამ ნაკისრი ვალდებულებების მიხედვით მოხდა. რის შედეგადაც, ატმოსფეროსთან მიმართებაში, და ასევე უსაფრთხოებასთან დაკავშირებული დარღვევები გამოვლინდა,"_ამბობს აღლემაშვილი.
მისივე თქმით, თუ კომპანია დაკისრებულ ჯარიმას განსაზღვრულ ვადებში არ გადაიხდის, მას დამატებითი სანქციები დაუწესდება, რაც ახლანდელი დავალიანების გასამმაგებას ითვალისწინებს.
"ამ დროისთვის მიმდინარეობს კომპანიისთვის ჯარიმის გადახდის კონკრეტული ვადების განსაზღვრა და ამ ვადების დარღვევის შემთხვევაში კომპანიას დაწესებული ჯარიმა გაუსამმაგდება,"_ამბობს გარემოს ინტეგრირებული კონტროლის სამსახურის დაბინძურების კონტროლის განყოფილების უფროსი.
როგორც აღლემაშვილი "გურია ნიუსთან" საუბრისას აღნიშნავს, გარემოს დაცვის სამინისტრო კანონში ცვლილებებსაც გეგმავს.
"გარემოს დაცვის სამინისტრო საწარმოების შემოწმების ტექნიკის შეცვლას არ გეგმავს, თუმცა კანონში პატარ-პატარა რეგლამენტების შეტანა მოსალოდნელია, რაზეც სამინისტროში უკვე მუშაობენ და ახალი კანონპროექტი პარლამენტს მალე წარედგინება,"_აცხადებს აღლემაშვილი.
ამავე თემაზე:
ცემენტის მტვერში გახვეული ქალაქი_ კასპი ეკოლოგიური კატასტროფის წინაშე
