ლანჩხუთში, კუპრეიშვილის ქუჩის #12-ში მდებარე მრავალბინიანი საცხოვრებელი სახლის მობინადრეების თქმით, კორპუსი, სადაც ისინი ცხოვრობენ, სავალალო მდგომარეობაშია და დანგრევის საშიშროება ემუქრება _ ერთ-ერთი სადარბაზოს სარდაფში მიწიდან წყალი ამოდის და სახლს ნელ-ნელა საძირკველს უთხრის.
"დღითი დღე უარესდება მდგომარეობა _ ამხელა საცხოვრებელ სახლს ძირი ეთხრება. არაერთხელ მივმართეთ ადგილობრივ ხელმძღვანელობას განცხადებით, მუნიციპალიტეტის გამგებელსაც შევხვდით, მაგრამ ამას შედეგი არ მოჰყოლია _ მოდიან, იღებენ ფოტოებს, თუმცა, ისევ ისეთივე მდგომარეობა. გეოლეოგების დასკვნაა საჭიროო _ ეს ჩვენც კარგად ვიცით. ინფრასტრუქტურის სამსახურის უფროსს, ლევან ჩხაიძესაც შევხვდით, მაგრამ უშედეგოდ _ მხოლოდ დაპირების გაცემა იციან კარგად.
ყველამ იცის ჩვენი მდგომარეობის შესახებ, მაგრამ არც დამხმარეა ვინმე და არც მომსმენი. უბედურება რომ დატრიალდება, მერე ხომ შეიწუხებენ თავს?! ჯერ კიდევ თვითმმართველობის არჩევნებისას დაგვპირდა გამგებელი, რომ აუცილებლად დაგვეხმარებოდა. იმის მერე ორ წელზე მეტი გავიდა, კიდევ ერთმა არჩევნებმა ჩაიარა, მაგრამ ჩვენს მდგომარეობას მაინც არაფერი ეშველა.
მივალთ გამგეობაში, მოგვისმენენ, დაგვპირდებიან და მორჩა _ რეალურად არაფერი კეთდება. ამხელა კორპუსს საძირკველი ეშლება და ამდენი ოჯახი ერთ დღეს შეიძლება, ღია ცის ქვეშ დარჩეს", _ ამბობენ კუპრეიშვილის ქუჩის #12-ში მაცხოვრებლები და შველას ითხოვენ.
მათი თქმით, მრავალბინიანი საცხოვრებელი სახლის სარდაფი ზამთარ-ზაფხულ წყლითაა სავსე. ზაფხულობით წყალს ისიც ემატება, რომ ქვეწარმავლებით ივსება აქაურობა:
"გველების კვლას ვერ ავუდივართ, მორიელებსა და ვირთხებს ნუღარ იკითხავთ, იმდენია. გვინდა, ყველამ გაიგოს, რომ ამ სახლშიც ჩვეულებრივი ადამიანები ვცხოვრობთ, გვყავს ბავშვები, ოჯახი. როდემდე შეიძლება ასე შიშის ქვეშ ვცხოვრობდეთ, რომ სადმე ღრიჭოდან ქვეწარმავლები სახლში არ შემოვიდნენ და ბავშვები არ დაკბინონ?! არ ვიცით, რა გზას დავადგეთ და ვის მივმართოთ! ჩვენი პრობლემა არაერთხელ გავხადეთ საჯარო პრესის საშუალებით, მაგრამ მდგომარეობა უცვლელია _ სახლი გვენგრევა და მთლად ღია ცის ქვეშ დარჩენის საშიშროება გვემუქრება", _ ემოციურად გამოხატავენ თავიანთ გულისტკივილს ავარიული კორპუსის მაცხოვრებლები.
როგორც მათი საუბრიდან ირკვევა, პრობლემის გადაჭრა წლების წინ სცადეს, თუმცა, იმდენად ცუდად, რომ მდგომარეობის გამოსწორების მაგივრად პირიქით მოხდა:
"შენობის სარდაფის ნაწილში, იქ სადაც წყალი ამოდის, ბეტონი დაასხეს, თუმცა, ამან უარესი შედეგი გამოიღო _ წყალი გარეთ ვეღარ გავიდა და შიგ საძირკველში დაგუბდა. მოკლედ, თუ პრობლემის მოსაგვარებლად დროულად არ გამოინახა რამე გზა, ერთ დღეს ეს ამხელა კორპუსი თავზე დაგვემხობა და შიგ მოგვიყოლებს. კეთილი ინებონ, სპეციალისტები მოიწვიონ და გამონახონ საშუალება, რომ ერთხელ და სამუდამოდ დაგვადგეს საშველი", _ ამბობენ აქაურები.
აღსანიშნავია, რომ ამ მრავალბინიანი საცხოვრებელი სახლის პრობლემის შესახებ "გურია ნიუსი", დაახლოებით, ორი წლის წინაც წერდა. სამწუხაროდ, დღესაც ჩვენთან საუბარი აქაურ მობინადრეებს იგივე საკითხზე უხდებათ. მაშინ ჩვენთან საუბრისას ლანჩხუთის მუნიციპალიტეტის გამგეობის ინფრასტრუქტურისა და არქიტექტურის სამსახურის უფროსის ლევან ჩხაიძე აქ არსებულ მდგომარეობას ურთულესად მიიჩნევდა და ამბობდა, რომ საკითხთან დაკავშირებით საქმის კურსში იყო მუნიციპალიტეტის ხელმძღვანელობა და შემდგომი რეაგირებისთვის გეოლოგების დასკვნისა და სამოქმედო გეგმის მოლოდინში იყვნენ.
ახლა, როგორც გამგეობიდან მიღებული პასუხით ირკვევა, კუპრეიშვილის #12-ში მდებარე მრავალბინიანი საცხოვრებელი სახლის თაობაზე გეოლოგებმა საკუთარი დასკვნა უკვე წარმოადგინეს და ჯერი თანხების მოძიებაზეა:
"გეოლოგების შემოწმების შედეგად აღმოჩნდა, რომ სახლის ქვემოთ გადის წყლის ნაკადი. რამდენჯერმე მოხდა წყლის ამოტუმბვა, მაგრამ ეს საკმარისი არ არის. პრობლემის გადაწყვეტა რთულია იმის გამო, რომ მიმდებარე ტერიტორიაზე თავმოყრილი წყლის ნაკადი ამოდის ამ სახლის ფუნდამენტში. გეოლოგების განმარტებით, თუ იატაკი ცემენტით დაისხმება, მაშინ წყლის ნაკადი ზემოთ ვერ ამოვა და სახლის ფუნდამენტს დაშლის.
2017 წელს ვგეგმავთ თანხების მოძიებას და მაქსიმუმის გაკეთებას პრობლემის აღმოსაფხვრელად. რაც შეეხება იმას, რომ უყურადღებოდ არიან მიტოვებულები, ეს სიცრუეა. გასულ წელს მოხდა შენობის უკანა მხარეზე თუნუქის ფურცლის გაკვრა, ხოლო წელს მისასვლელი გზის 300 მეტრი და რკინა-ბეტონის სანიაღვრე არხი მოწესრიგდა, ასევე, ხიდის აღდგენის სამუშაოები ჩატარდა", _ ასე პასუხობენ მოსახლეობის პრეტენზიებს ლანჩხუთის გამგეობის პრესასთან და საზოგადოებასთან ურთიერთობის განყოფილებაში.
