საქართველოში კანონში „საექიმო საქმიანობის შესახებ" ცვლილება შედის, რომლის თანახმად, უმცროს ექიმს, რომელსაც 2015 წლის 1 ოქტომბრამდე აქვს დაწყებული დიპლომისშემდგომი განათლების (პროფესიული მზადების) პროგრამის ფარგლებში მზადება, პროფესიული განვითარების საბჭოს გადაწყვეტილებით, მიეცემა უფლება, ჩააბაროს სახელმწიფო სასერტიფიკაციო გამოცდა და მიიღოს დამოუკიდებელი საექიმო საქმიანობის უფლება იმ შემთხვევაში, თუ მას დასრულებული აქვს დიპლომისშემდგომი განათლების (პროფესიული მზადების) კურსი.
კანონპროექტი პირველი მოსმენით განხილვისთვის ჯანმრთელობის დაცვისა და სოციალურ საკითხთა კომიტეტის წევრებს შრომის, ჯანმრთელობისა და სოციალური დაცვის მინისტრის მოადგილემ, ნინო ბერძულმა წარუდგინა, რომელმაც ცვლილების მომზადების მიზეზებზეც ისაუბრა და დეპუტატების შეკითხვებს უპასუხა. მისივე ინფორმაციით, კანონში კიდევ ერთი _ ტექნიკური ხასიათის ცვლილება შედის, რომლის მიხედვითაც, ტერმინი „პროფესიული რეგულირების საბჭო" ტერმინით „პროფესიული განვითარების საბჭო" ჩანაცვლდება.
„რამდენადაც ვიცი, შრომის, ჯანმრთელობისა და სოციალური დაცვის სამინისტრო მუშაობს უწყვეტი განათლების და პროფესიული მზადების ახალ საკანონმდებლო ინიციატივებზე. ჩვენ, კომიტეტს, მიგვაჩნია, რომ ეს არის ერთ-ერთი უმნიშვნელოვანესი მიმართულება იმ რეფორმისა, რომელსაც შემდგომი 4 წლის განმავლობაში განვახორციელებთ. ეს იქნება ერთ-ერთი ყველაზე სერიოზული თემა, რომელზეც ერთიან ფორმატში – არამარტო საკანონმდებლო და აღმასრულებელი ხელისუფლების, არამედ ექსპერტების, ასოციაციების, საპარლამენტო და არასაპარლამენტო ოპოზიციის ჩართულობით მუშაობის დიდი სურვილი გვექნება, რადგან ვფიქრობ, რომ ეს არის ძალიან მნიშვნელოვანი თემა, რომელიც ჩვენს შემდგომ თაობებსაც ეხება", _ განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარემ, აკაკი ზოიძემ. კენჭისყრის შედეგად, პარლამენტის წევრებმა წარმოდგენილ კანონპროექტს მხარი დაუჭირეს.
დღესვე, დეპუტატებმა საქართველოს მთავრობის მიერ რატიფიცირებისთვის წარდგენილი კონვენცია „საქართველოს მთავრობასა და ლიხტენშტეინის სამთავროს მთავრობას შორის შემოსავლებსა და კაპიტალზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ" განიხილეს. დოკუმენტი ფინანსთა მინისტრის მოადგილემ, ლაშა ხუციშვილმა წარმოადგინა და აღნიშნა, რომ ხელშეკრულება ქვეყნებს შორის ეკონომიკური თანამშრომლობის გაღრმავებასა და ინვესტიციების მოზიდვას ისახავს მიზნად. მისივე განმარტებით, კონვენციის თანახმად, იურიდიული და ფიზიკური პირის მიერ მეორე ქვეყანაში გაწეული საქმიანობით მიღებული შემოსავალი იმ ქვეყანაში დაიბეგრება, სადაც იგი იქნა მიღებული. კენჭისყრის შედეგად, კომიტეტის წევრებმა კონვენციის რატიფიცირებას მხარი დაუჭირეს.
