დღეს გაიმართა საქართველოს პარლამენტის განათლების, მეცნიერებისა და კულტურის კომიტეტის სხდომა. დღევანდელ სხდომაზე დეპუტატებმა კომიტეტის მიერ მომზადებული საკანონმდებლო პაკეტის ინიცირება მოახდინეს. პაკეტში შემავალი „მეცნიერების, ტექნოლოგიებისა და მათი განვითარების შესახებ" საქართველოს კანონში ცვლილების შეტანის თაობაზე" კანონპროექტი საჯარო სამართლის იურიდიული პირის – სამეცნიერო-კვლევითი დაწესებულების დირექტორის დანიშვნის პროცედურას აწესრიგებს.
დამოუკიდებელი საექიმო საქმიანობის უფლების მოპოვების მიმართულებით უმცროსი ექიმების ხელშეწყობის მიზნით, „საექიმო საქმიანობის შესახებ" კანონში ცვლილება შედის, რომელიც განათლების, მეცნიერებისა და კულტურის კომიტეტის დღევანდელ სხდომაზე განიხილეს.
კომიტეტის თავმჯდომარის, მარიამ ჯაშის განცხადებით, ადამიანური რესურსის მართვის დაგეგმარება ისევე, როგორც სხვადასხვა სფეროში, სამედიცინო სფეროშიც იყო საკმაოდ ფრაგმენტული. „რთული იყო ერთიან კონტექსტში მოქცევა დიპლომამდელი და დიპლომისშემდგომი სწავლების, მათ შორის, რეზიდენტურის ეტაპის, რომელიც არის ძალიან მნიშვნელოვანი და რომლის დაფინანსების მექანიზმებზე ჩვენ ცალკე უნდა ვიმსჯელოთ, რათა რეალურად შეიქმნას ახალი კვალიფიციური კადრების მომზადების საფუძვლები", _ აღნიშნა მარიამ ჯაშმა.
„გრანტების შესახებ" საქართველოს კანონში ცვლილების შეტანის თაობაზე კანონპროექტი გრანტის გამცემ და გრანტის მიმღებ პირთა წრეს აფართოებს. კერძოდ, გრანტის გამცემ პირთა წრეს დაემატება საჯარო სამართლის იურიდიული პირი, რომლის წესდების ან დებულების მიზანსაც წარმოადგენს განათლების სფეროში სწავლა – სწავლების ხარისხის გასაუმჯობესებლად გრანტების გაცემა.
„უმაღლესი განათლების შესახებ", საქართველოს კანონში ცვლილების შეტანის თაობაზე"კანონპროექტით გამარტივდება უმაღლესი საგანმანათლებლო დაწესებულებების ბალანსზე რიცხული მოძრავი ქონების განკარგვის წესი და მოხდება მართლმადიდებლურ საღვთისმეტყველო პროგრამებზე ჩარიცხული სტუდენტების უფლებების დაცვა. როგორც დავით ლომინაშვილმა განაცხადა, დარეგულირდება მასწავლებლის მომზადების ბაკალავრიატის უმაღლეს საგანმანათლებლო პროგრამაზე 2017 წელს აბიტურიენტების მიღების შესაძლებლობები.
მისი მოსაზრებით, განათლების სფეროში არსებული დღეს მოქმედი კანონმდებლობა არ იძლევა საზღვარგარეთ აღიარებული ზოგადსაგანმანათლებლო პროგრამის საქართველოში აღიარების შესაძლებლობას. მისივე განმარტებით, კანონპროექტით მოხდება საზღვარგარეთ აღიარებული ზოგადსაგანმანათლებლო პროგრამების აღიარებისათვის შესაბამისი საკანონმდებლო მექანიზმების შემოღება.
