4 ოქტომბერს მომხდარი ფაქტის გამოძიების მასალებს, რომელიც "ერთიანი ნაციონალური მოძრაობის" წარმომადგენლის, გივი თარგამაძის აფეთქებას შეეხება, პროკურატურა დაზარალებულს არ აცნობს, _ აღნიშნულის შესახებ დღეს გამართულ ბრიფინგზე გივი თარგამაძემ ისაუბრა.
თარგამაძის თქმით, არჩევნების შემდეგ საგამოძიებო უწყებებმა ინტერესი დაკარგეს.
„4 ოქტომბრის აფეთქების გამოძიებასთან დაკავშირებით, შემიძლია ვთქვა, რომ არჩევნების შემდგომ საგამოძიებო უწყებებმა ინტერესი დაკარგეს. ამიტომ, მე, ჩემი ძალებით მიწევს ისინი ვაიძულო ჩაატარონ თითოეული ის საპროცესო მოქმედება, რომელიც მათი ვალდებულობაა.
გამოძიების დაწყებიდან 2 თვის შემდეგ ჩემი ძალისხმევით მივაღწიე იმას, რომ დაზარალებულად მცნეს, რაც პროკურატურას ავტომატურად უჩენს ვალდებულებას, საქმის მასალები გამაცნონ, რაზეც ჯიუტად აცხადებენ უარს.
საგამოძიებო უწყების ასეთი მიდგომა საფუძვლიან ეჭვს მიჩენს, რომ პროკურატურა ცდილობს, გამოძიება საკუთარი ინტერესების დაცვით წარმართოს, რათა შედეგიც თავიანთ ინტერესებს შეუსაბამონ.
აღსანიშნავია, რომ პოლიცია, რომელიც გამოძიებას აწარმოებს, თავის მხრივ, მზადაა მასალები გამაცნოს, თუმცა, მათ პროკურატურის ნებართვა სჭირდებათ, რასაც ამ დრომდე ვერ მივაღწიეთ. შესაბამისად, საქმის გამოძიებასთან დაკავშირებით, ჯერჯერობით, მხოლოდ კითხვები არსებობს, პასუხები კი აგვიანებს.
კიდევ ერთხელ მივმართავ ხელისუფლებას, პროკურატურას შეასრულონ თავიანთი მოვალეობა და გამაცნონ საქმის მასალები".
