ოპოზიციის ყველაზე დიდი გაერთიანება „ქართული ოცნებიდან“ იყო, რომელსაც მანანა კობახიძე, დავით უსუფაშვილი, სოზარ სუბარი და სხვა წევრები წარმოადგენდნენ. შეხვედრას ასევე ესწრებოდა ნინო ბურჯანაძის წარმომადგენელი და დავით გამყრელიძე.
“გურია ნიუსთან“ ინტერვიუში „ქართული ოცნება“ _ დემოკრატიული საქართველოს თავმჯდომარემ, მანანა კობახიძემ განაცხადა:
„დავით გამყრელიძეს, ბატონმა ფულემ პირდაპირ ჰკითხა, _ ამხელა კოალიციაა ( „ქართულ ოცნებას“ გულისხმობდა) და შენ აქ რატომ არ ხარ გაწევრიანებულიო?
გამყრელიძემ პასუხი ვერ გასცა. ილაპარაკა ყველაფერზე, დაწყებული საბჭოთა დროიდან, შემდეგ გაიხსენა ზვიად გამსახურდია, ედუარდ შევარდნაძე და ბოლოს ისიც თქვა, რომ იმ ყველაფრის შემდეგ, რაც პარლამენტში არ შევიდნენ თუ ვერ შევიდნენ, მოკლედ, როგორც იყო, გადაწყვიტეს კომპრომისზე წასვლა. აი, ასე თქვეს პირდაპირ, რაც იმის თქმას ნიშნავს, რომ ხელისუფლებასთან კომპრომისზე არიან წასულები. ყოველ შემთხვევაში, ინგლისურად სწორედ სიტყვა „კომპრომისი“ გამოიყენა და მე ასე გავიგე. თუ რაიმეს არასწორად ვამბობ, შეგიძლიათ ჰკითხოთ, რას გულისხმობდა ამ სიტყვაში. მან განაცხადა, რომ ამ ყველაფრის შემდეგ, რა მოვლენებიცპოლიტიკაში ხდებოდა, გადავწყვიტეთ კომპრომისზე წასვლაო “
ამ საკითხთან დაკავშირებით „გურია ნიუსი“ დავით გამყრელიძეს დაუკავშირდა.
_ ბატონო დავით, გუშინ ბატონმა შტეფან ფულემ შეხვედრაზე გკითხათ, რატომ არ ხართ გაერთიანებული ამხელა ოპოზიციაშიო, იგულისხმა “ქართული ოცნება”. თქვენ მას კონკრეტული პასუხი არ გაეცით და განაცხადეთ რომ, მას შემდეგ რაც პარლამეტში არ შეხვედით და მანდატები დახევის შემდეგ, კომპრომისზე წახვედით.
რა იგულისხმეთ ხელისუფლებასთან კომპრომისზე წასვლაში?
_ თქვენ ვინც მოგიყვათ ეს ამბავი, მაშინ იმას ეთქვა ყველაფერი, მე რაზე გავეცი პასუხი. მე ძალიან კარგად გავეცი პასუხი. ჩვენ რევოლუციებში არ ვმონაწილეობთ და მიგვაჩნია, რომ კოალიცია “ქართული ოცნება” დღეს რევოლუციურ სცენარს ამზადებს საქართველოში, იმიტომ რომ, კონსტიტუციურ უმრავლესობას სხვანაირად ბიძინა ივანიშვილი ვერ აიღებს. ყველა შანსია იმისა, რომ ის სწორედ ამისკენ მიდის.
მე როგორც წინააღმდეგი ვიყავი სააკაშვილის რევოლუციის, ისე წინააღმდეგი ვიქნები ბიძინა ივანიშვილის კოალიციის.
მეორეც, _ მე არ მიმაჩნია, რომ პრინციპი „ვინც ჩემთან არ არის, ჩემი მტერია,“ – მისაღებია. ეს ბოლშევიკური პრინციპია, რომელიც ვერ ამოიგდო ქართველმა პოლიტიკოსების გარკვეულმა ნაწილმა ამდენი წელია თავიდან.
მესამე _ პრინციპი „ან ყველაფერი, ან არაფერი“, არასწორია ქართულ პოლიტიკაში. ანუ რადიკალიზმმა დაღუპა ქართული პოლიტიკა.
მე ესეც ვუთხარი. არ ვიცი, ვინც მოგიყვათ ეს ამბები, ბოლომდე რატომ არ მოგიყვათ…. თვითონ ფულემ ილაპარაკა, რომ პოლიტიკა კომპრომისების გარეშე არ არსებობს. დემოკრატია კომპრომისების გარეშე არ არსებობს. სწორედ კომპრომისები ითვლება ქართულ პოლიტიკაში ღალატად და მოღალატეობად არის შეფასებული ტრადიციულად, ამ ოცი წლის განმავლობაში. მაგრამ, სწორედ კომპრომისების ხარჯზე მიიღწევა პროგრესი და წინსვლა, ოღონდ არა რევოლუციით, არამედ ევოლუციური ცვლილებებით.
