ლანჩხუთის მუნიციპალიტეტის საკრებულომ მოქალაქეთა ერთობლივი განაცხადი მიიღო პეტიციის ინიცირების დაწყებაზე. ამ საკითხზე, რიგით ლანჩხუთელებთან ერთად, საკრებულოს თავმჯდომარის მოვალეობის შემსრულებელმა (თავმჯდომარე გოგი ხელაძე შვებულებაში იმყოფება) ბესიკ ტაბიძემ იმსჯელა.
როგორც აღმოჩნდა, მოქალაქეებს, პეტიციის წესით, რამდენიმე, მათი თქმით, მნიშვნელოვანი საკითხის ინიცირება სურთ.
პეტიციის ინიციატორთა მოსაზრებით, აუცილებლობას წარმოადგენს ჯურუყვეთის, ჩიბათისა და ნიგვზიანის ადმინისტრაციულ ერთეულებში სანაგვე ურნების დადგმა.
გარდა ურნებისა, ლანჩხუთელები საზოგადოებრივი ტრანსპორტის მოძრაობის გრაფიკის მოწესრიგებასაც ითხოვენ. როგორც პეტიციის ინიციატორები ამბობენ, მუნიციპალიტეტის ადმინისტრაციულ საზღვრებში არსებულ ყველა სოფელში, საზოგადოებრივი ტრანსპორტის მოძრაობის გრაფიკი უნდა გაიზარდოს.
გარდა ამისა, მიაჩნიათ, რომ ლანჩხუთის მუნიციპალიტეტის ტერიტორიაზე, სოფელ მამათში, მდინარე სუფსაზე საყანე ფართობებთან დამაკავშირებელი ხიდის მოწყობა ერთ-ერთი მნიშვნელოვანი საკითხია. ხოლო სოფლებში: ჩიბათში, ხაჯალიასა და ნიგვზიანში სადრენაჟო სისტემაა გასაკეთებელი.
ზემოთ ნახსენები ინიციატივების ერთობლივი განხილვის შემდეგ, საკრებულოს თავმჯდომარის მოვალეობის შემსრულებელმა მოქალაქეებს უთხრა, რომ პეტიციის მხარდაჭერა ორგანული კანონის _ "ადგილობრივი თვითმმართველობის შესახებ" 120-ე მუხლის შესაბამისად წარიმართება.
თუმცა, საკრებულოს ასეთი მზაობა, გარკვეულწილად, პოლემიკის საგანი გახდა სოციალურ ქსელში _ როგორც ექსპერტმა ადგილობრივი თვითმმართველობის საკითხებში, ამირან გიგინეიშვილმა სოციალურ ქსელში აღნიშნა, პეტიცია საკრებულოში იმიტომ შედის, რომ დადგენილების მიღების, ან დადგენილების საპროექტო წინადადების წარდგენის ინიცირება ხდება:
"ასეა კანონით განსაზღვრული. ურნების დადგმის დადგენილება ცოტა უცნაურად ჟღერს. ინფრასტრუქტურული პროექტების შესრულება აღმასრულებელი რგოლის, გამგებლის ვალდებულებაა და საკრებულო არაფერ შუაშია. ერთი კაცის წერილი გამგებლის სახელზე ხომ საკმარისია, თუ ასეთი პოლიტიკური ნება იქნა და არა პეტიციაზე ხელმოწერების შეგროვება? და საბოლოოდ, საკრებულო ამ ნაწვალებ ხელმოწერებს გამგებელს ხომ გადაუგზავნის _ არაა ეს ჩემი საქმე და შენ გეხებაო? და რა გამოდის?!" _ წერს გიგინეიშვილი.
საკითხთან დაკავშირებით საკრებულოს პოზიციის გამყარება ეთიკის კომისიის თავმჯდომარემ, რომან ბიწაძემ სცადა:
"რა როგორ იქნება, კანონით დადგენილ ვადებში გადაწყდება. საინიციატივო ჯგუფმა მოითხოვა პეტიციის მხარდამჭერთა ხელმოწერის ბლანკები, რომელიც მათ გადაეცათ. შესაძლო საპეტიციო საკითხებზე მივეცით სათანადო რეკომენდაციები და შენიშვნებიც. დიახ, მოქალაქეთა ინიციატივებიდან ზოგიერთი იყო ხარვეზიანი. სხვათა შორის, ამ მოქალაქეების უკან არასამთავრობოები დგანან, რომლებიც ესწრებოდნენ ამ შეხვედრას და რომლებმაც გაიზიარეს ჩვენი შენიშვნები. ვფიქრობ, სწორად მოვიქეცით და არ დავაფრთხეთ მოქალაქეები საკუთარი ინიციატივების წარმოჩენაში. პეტიცია იქნება თუ კოლექტიური განცხადება, მომავალი გვიჩვენებს, დღეს მათ მხოლოდ ბლანკები წაიღეს", _ წერს სოციალურ ქსელში ბიწაძე.
