ვისი ვალი აქვს ჩოხატაურის მუნიციპალიტეტს

ჩოხატაურის მუნიციპალიტეტის ბიუჯეტიდან, გასულ წელს, სოციალური პროგრამების დაფინანსებისთვის 545,5 ათასი ლარი იყო გამოყოფილი. წლევანდელ ბიუჯეტში, ამავე პროგრამაში 500 000 ლარია გამოყოფილი.

ეს თანხა რამდენიმე კატეგორიისთვისაა განკუთვნილი. მათ შორის, მეორე მსოფლიო ომის ვეტერანებისა და ომში დაღუპულთა მარჩენალდაკარგული ოჯახების, საქართველოს თავისუფლებისა და ტერიტორიული მთლიანობისთვის ბრძოლის მონაწილე პირების დაკრძალვისთვის (ამისთვის 2 ათასი ლარია გამოყოფილი); მძიმე საცხოვრებელ პირობებში მყოფი, უბედური შემთხვევისა და სტიქიური მოვლენების შედეგად უსახლკაროდ დარჩენილი ოჯახებისთვის განსაზღვრულია 5 000 ლარამდე გაცემა ერთჯერადად; დროებით თავშესაფრის უზრუნველყოფისთვის გამოყოფილია თანხა ბინის ქირისთვის, არა უმეტეს 110 ლარისა _ ამისთვის ბიუჯეტში 105,0 ათასი ლარია გამოყოფილი.

ლტოლვილთა დახმარების პროგრამაზე წლევანდელ ბიუჯეტში 11 ათასი ლარია ჩასმული _ თანხა ეძლევა სამაჩაბლოდან და აფხაზეთიდან დევნილ ოჯახებს ზამთრისთვის სათბობის შეძენაზე _ 200 ლარი, სხვა აუცილებლობიდან გამომდინარე _ არა უმეტეს 100 (ასი) ლარისა, დაკრძალვის ხარჯი _ ერთჯერადად არა უმეტეს 250 ლარისა.

"ქართული ოცნების" წევრი, ჩოხატაურის მუნიციპალიტეტის საკრებულოს სოციალურ საკითხთა კომისიის თავმჯდომარე დავით შარაშიძე, რომელმაც ამ ბიუჯეტს მხარი არ დაუჭირა, ამბობს, რომ სოციალური პროგრამების ნაწილი არამინზობრივია. მათ შორის, უპატრონო ლტოლვილების დაკრძალვისთვის გამოყოფილი თანხა:

_ ამბობენ, რომ უპატრონო მიცვალებულის დაკრძალვის ხარჯია. თუ უპატრონოა, მაშინ მისი ქონება მუნიციპალიტეტს უნდა დარჩეს. არადა, ქონების მეპატრონე ყოველთვის ჩნდება. ეს კი იმას ნიშნავს, რომ უპატრონო არ არის, _ ამბობს შარაშიძე, რომელსაც არ ეთანხმება მუნიციპალიტეტის გამგებელი.

ირაკლი კუჭავას თქმით, მუნიციპალიტეტი ვერავისთან დაიწყებს ქონებრივ დავას:

_ ჩვენ დაკრძალვის ხარჯს _ 250 ლარს გამოვყოფთ იმ მიცვალებულების სარიტუალო მომსახურებისთვის, რომლებსაც მეზობლები კრძალავენ. ბევრი ასეთი შემთხვევაა. არ გამოვრიცხავთ, რომ მემკვიდრე ჰყავდეს, მაგრამ ადგილზე არ ჰყავს პატრონი და მათ გამოჩენამდე დაუმარხავს ვერავის დავტოვებთ, _ ამბობს კუჭავა.

სოციალური პროგრამების მუხლიდან დაფინანსებას, ასევე, მიიღებენ საქართველოს თავისუფლებისა და ტერიტორიული მთლიანობისთვის დაღუპულთა ოჯახები, რისთვისაც ბიუჯეტში 16,8 ათასი ლარია გამოყოფილი. ბიუჯეტში განმარტებულია, რომ თანხა ეძლევა თბილისში, 1989 წლის 9 აპრილს საქართველოს დამოუკიდებლობის მოთხოვნით გამართული მშვიდობიანი აქციის დარბევის, აფხაზეთის კონფლიქტისა და სამაჩაბლოში რუსეთის მიერ 2008 წლის 8 აგვისტოს გახორციელებული აგრესიის დროს დაღუპულთა ოჯახებს.

2017 წლის ბიუჯეტში ფენილკეტონურიით დაავადებული ბავშვებისთვის 12,0 ათასი ლარია გამოყოფილი; 18 წელს ზევით ასაკის პირებისთვის, რომელთა სარეიტინგო ქულა 65000-დან 200 000 -ის ჩათვლითაა, სტაციონარულ სამედიცინო მომსახურებაზე და მედიკამენტების შეძენაზე 71,5 ათასი ლარი; 18 წელს ზევით ასაკის შშმ პირების სტაციონარულ სამედიცინო მომსახურებაზე და მედიკამენტების შეძენაზე _ 12,0 ათასი ლარი; ონკოლოგიური დაავადებით დაავადებულთა სტაციონარულ სამედიცინო მომსახურების, მედიკამენტების შეძენის და ოპერაციის შემდგომი გამოკვლევებისთვის 35,0 ათასი ლარია გამოყოფილი; მეორე მსოფლიო ომის ვეტერანების და ომში დაღუპულთა ქვრივებისთვის სტაციონარულ სამედიცინო მომსახურების და მედიკამენტების შეძენისთვის _ 5,1 ათასი ლარი; 0-დან 18-წლამდე ასაკის პირების სტაციონარულ სამედიცინო მომსახურებისთვის _ 7.1 ათასი ლარი; თირკმლის უკმარისობით დაავადებული პირებისთვის, რომლებიც გადიან დიალეზის კურსს _ 18,5 ათასი ლარი; გულის თანდაყოლილი პათოლოგიით (გულის მანკი) დაავადებული 0-დან 18-წლამდე ასაკის პირებისთვის _ 6,0 ათასი ლარი); 0-დან 18-წლამდე ასაკის შშმ პირების მედიკამენტების შესაძენად 7 ათასი ლარია გამოყოფილი; ეპილეფსიით დაავადებული ბავშვების ოჯახების დახმარებისთვის _ 10.2 ათასი ლარი; ჰემოფილიით დაავადებულ ბავშვთა და მოზრდილთა დახმარებისთვის _ 1,8 ათასი ლარი; C ჰეპატიტით დაავადებული პირების მკურნალობის ტაქტიკის განსაზღვრისთვის საჭირო კვლევების დაფინანსებაზე ჩოხატაურის მუნიციპალიტეტს 10 ათასი ლარი აქვს გამოყოფილი (თითო ბენეფიციარზე _ არა უმეტეს 200 ლარი).

დახმარება, ასევე, მიეცემათ იმ ოჯახებს, რომელთაც 4 და მეტი 18 წლამდე ასაკის ბავშვები ჰყავთ _ ამ მუხლში 28,0 ათასი ლარია გამოყოფილი.

ახალშობილთა ოჯახების დახმარებისთვის ბიუჯეტში 20 ათასი ლარია ჩასმული; დედ-მამით ობოლი ბავშვების დახმარებისთვის კი 2,4 ათასი ლარი; მარტოხელა (უპატრონო) პირთა სარიტუალო მომსახურებისთვის _ 2,0 ათასი ლარი; ხანდაზმულ პირთა დახმარებისთვის _ 2,0 ათასი ლარი; მეორე მსოფლიო ომის ვეტერანების და ომში დაღუპულთა ქვრივებისთვის მატერიალური მხარდაჭერისთვის, ფაშიზმზე გამარჯვების 72-ე წლისთავთან დაკავშირებით, ზამთრის სეზონისთვის სათბობის შეძენისთვის 5,5 ათასი ლარი დაიხარჯება; 0-დან 18-წლამდე ასაკის შშმ პირების ოჯახებისთვის კომუნალური გადასახადის გადახდისთვის _ 23,7 ათასი ლარი;

დავით შარაშიძის თქმით, გასულ წელს ამავე პროგრამის ფარგლებში შშმ პირებს დაფინანსება სამი თვის განმავლობაში არ მიუღიათ:

_ დეკემბრის ბოლოს ჩაურიცხეს სამი თვის თანხა ერთად. ასევე, დაგვიანებით გადაიხადეს შშმ პირების ოჯახებისთვის განკუთვნილი კომუნალური გადასახადები. მუნიციპალიტეტს დღემდე აფთიაქებისა და საავადმყოფოების ვალი აქვს. საგარანტიო წერილებით უშვებდნენ ბენეფიციარებს დაწესებულებებში და ეს თანხები დღემდე ვერ გადაიხადეს. თანაც, ვალადაც კი არ აქვთ აღიარებული, _ აღნიშნა "გურია ნიუსთან" საუბრისას შარაშიძემ და განმარტა, რომ ერთ-ერთი ძირითადი მიზეზი იმისა, თუ რატომ არ დაუჭირა მხარი ბიუჯეტს, სწორედ სოციალური პროგრამების არასწორი განაწილებაა.

შარაშიძის ბრალდებებს კატეგორიულად უარყოფენ ჩოხატაურის მუნიციპალიტეტის გამგეობის საფინანსო სამსახურში:

_ 22 ათას ლარამდე გვაქვს აფთიაქების და კლინიკების დავალიანება, რომელიც ვალად გვაქვს აღიარებული და ძალიან მალე გავისტუმრებთ, _ ამბობს საფინანსო სამსახურის უფროსი მაია გოგოლაძე.

სოციალური პროგრამების მუხლში 60.5 ათასი ლარია გათვალიწინებული საინვესტიციო პროგრამების თანადაფინანსებისთვის. როგორც გავარკვიეთ, ამ თანხის დიდი ნაწილით _ 50 000 ლარით ორგანიზაცია "წითელი ჯვარი" ფინანსდება:

_ გაუგებარია, რისთვის ვაძლევთ ამ თანხას "წითელ ჯვარს", რომელიც შეიძლება ითქვას, რომ არანაირ აქტივობას არ ახორციელებს. თუ დააკვირდებით, სულ ერთი და იგივე ხალხია იქ. სოფლებიდან არც კი მოჰყავთ არავინ და შესაბამისად, ეს თანხაც არასწორად იხარჯება. მე როგორც ვიცი, 40 000 ლარი ხელფასებისთვისაა მხოლოდ, _ გვითხრა შარაშიძემ.

 ირაკლი კუჭავა ამბობს, რომ "წითელ ჯვარს" ბევრი აქტივობა აქვს:

 _ ორგანიზაციასთან მემორანდუმი გვაქვს გაფორმებული და მის ფარგლებში ვაძლევთ ამ თანხას. "წითელ ჯვარს", რომელიც განსაკუთრებულად ზრუნავს მოხუცებზე, გასულ წელს ბევრი აქტივობა ჰქონდა და ამის ნახვა ნებისმიერ დაინტერესებულ პირს მათ ვებგვერდზე შეუძლია, _ განმარტავს გამგებელი.

ჩოხატაურის მუნიციპალიტეტის ბიუჯეტის სოციალური პროგრამაში, წელს პირველად გაითვალისწინეს 3 900 ლარი "განსაკუთრებით მძიმე ჯანმრთელობის მდგომარეობის მქონე პირთა პატრონაჟისა და მონიტორინგისთვის". როგორც გამგებელი განმარტავს, ეს პროგრამა მძიმე სენით დაავადებული ბავშვების მკურნალობის დაფინანსებას ითვალისწინებს:

_ ჩოხატაურში სამი ბენეფიციარია, რომელსაც მძიმე დაავადება აქვთ. მათ მუდმივი მკურნალობა და კონსულტაციები სჭირდებათ. ამის გათვალისწინებით ჩაიდო ეს თანხა ბიუჯეტში, _ აღნიშნავს ჩვენთან საუბრისას ირაკლი კუჭავა.

ჩოხატაურის მუნიციპალიტეტის კიდევ ერთი სოციალური პროგრამა დამქირავებლის სოციალური ფულადი დახმარებაა, რაც საავადმყოფო ფურცლის ანაზღაურებას ითვალისწინებს და რისთვისაც 8,0 ათასი ლარია გამოყოფილი.