ასოციაცია “საქართველოს მოსამართლეთა ერთობამ“ საქართველოს იუსტიციის უმაღლესი საბჭოს მარეგულირებელი ნორმატიული აქტების პროექტების პრეზენტაცია ჩაატარა. პრეზენტაციის ფარგლებში წარმოდგენილი იყო ორგანიზაციის მიერ შემუშავებული ორი პროექტი:
· ორგანული კანონი იუსტიციის უმაღლესი საბჭოს შესახებ
· იუსტიციის უმაღლესი საბჭოს რეგლამენტი
საკანონმდებლო აქტების შემუშავების მიზანია საქართველოს იუსტიციის საბჭოს საქმიანობის ნორმატიული რეგულირება მისი დამოუკიდებლობის სტანდარტების გაუმჯობესება.
ორგანიზაციამ შეიმუშავა ორგანული კანონის და იუსტიციის საბჭოს რეგლამენტის შესაბამისი პროექტი. საკანონდებლო აქტები ითვალისწინებს იუსტიციის საბჭოს ორგანიზაციული მოწყობის და ფორმირების წესს, მისი საქმიანობის პრინციპებსა და ძირითად მიმართულებებს. ამასთან ერთად, ორგანული კანონი მოიცავს იუსტიციის საბჭოს წევრთა დამოუკიდებლობის კანონისმიერ გარანტიებს და მათი ანგარიშვალდებულების მექნიზმებს. ცალკე „იუსტიციის საბჭოს შესახებ“ კანონის შემოტანით, ორგანული კანონი „საერთო სასამართლოების შესახებ“ რჩება როგორც მატერიალური საფუძველი, საქართველოს საერთო სასამართლოების სისტემის მოსამართლეთა სამართლებრივი სტატუსის, მათი შერჩევის, თანამდებობაზე დანიშვნის და თანამდებობიდან განთავისუფლების, სხვა პოზიციაზე გადაყვანის, დაწინაურების, ადმინისტრაციულ თანამდებობებზე დანიშვნის კრიტერიუმების და პრინციპების, ასევე მოსამართლეთა სოციალური და სამართლებრივი დაცვის გარანტიების განმსაზღვრელი ნორმატიული აქტი, ხოლო წარმოდგენილი კანონპროექტი სრულად მოიცავს იუსტიციის საბჭოს საქმიანობის პროცედურულ პრინციპებს.
საკანონმდებლო აქტებით დადგენილია იუსტიციის საბჭოს საქმიანობის პრინციპები. ერთმანეთისგან გამიჯნულია იუსტიციის საბჭოს საქმიანობის მმართველობითი და იუსტიციური ფუნქციები, მოცემულია რა იუსტიციური ფუნქციების ამომწურავი ჩამონათვალი. გადმოცემულია იუსტიციური და მმართველობითი აქტების მისაღებად გამართული წარმოების თავისებურებები, სამართლებრივი აქტების რეკვიზიტები და გასაჩივრების პროცედურები. იუსტიციის საბჭოს შესახებ ორგანული კანონი ითვალისწინებს იუსტიციის საბჭოსთვის ინდივიდუალურთან ერთად ნორმატიული აქტების გამოცემის უფლებამოსილების მინიჭებას, განსაზღვრავს ნორმატიულად მოსაწესრიგებელ საკითხებს, მათ შორის ნორმატიულ ძალას ანიჭებს საბჭოს რეგლამენტს.კანონპროექტით შემოთავაზებულია თავად იუსტიციის საბჭოს წევრთა შორის ფუნქციების ახლებური განაწილება. საბჭოს მდივანი გათავისუფლებულია ადმინისტრაციული ფუნქციიდან გამომდინარე ტვირთისგან და საბჭოს მენეჯმენტის წარმოებით გამოწვეული მთელი დატვირთვა მოდის იუსტიციის საბჭოს ადმინისტრაციის ხელმძღვანელზე.
შემოთავაზებული აქტებით, მმართველობითი ფუნქციების განხორციელებისას დაცულია საბჭოს არამოსამართლე წევრთა ჩართულობა რიგითობის პრინციპით, რაც ხელს შეუწყობს მათ თანაბარ დატვირთვას და საკითხზე პასუხისმგებელი მომხსენებელი წევრის ინსტიტუტის დამკვიდრებას.
იუსტიციის საბჭოს სხდომის მოწვევის და ჩატრების, დღის წესრიგის შედგენის და საკითხის განსახილველად მომზადების წესები ასევე რეგლამენტირებულია წარმოდგენილი საკანონმდებლო აქტების პროექტებით. საჯაროობის და გამჭირვალობის უზრუნველყოფის მიზნით, შემოთავაზებულია „საერთო სასამართლოების შესახებ“ საქართველოს ორგანული კანონით, სასამართლო სხდომის საჯაროობის დადგენილი სტანდარტების გავრცელება იუსტიციის საბჭოს საქმიანობაზე, ასევე ვებ-გვერდზე სხდომის გამოქვეყნება და ოქმზე ხელმისაწვდომობა.
შემოთავაზებულია იუსტიციის საბჭოს მიერ ყოველწლიური ანგარიშის წარდგენის ვალდებულება.
საბჭოს წევრთა დამოუკიდებლობის დაცვის მიზნით, შემოღებულია საბჭოს წევრთან დაუშვებელი კომუნიკაციის აკრძალვის პრინციპი. გათვალისწინებულია იუსტიციის საბჭოს მოსამართლე და არამოსამართლე წევრთა შეზღუდვები, სოციალური გარანტიები, შეღავათები. კანონპროექტი ასევე ითვალისწინებს არამოსამართლე წევრთა დისციპლინური პასუხისმგებლობის საკითხს, რაც მაქსიმალურად მიახლოებულია მოსამართლის დისციპლინური პასუხისმგებლობის სტანდარტებთან.
"მოსამართლეთა ერთობის" ცნობით, შემოთავაზებული ცვლილებები აწესრიგებს იუსტიციის საბჭოს მიერ საკითხის განსახილველად წარდგენიდან გადაწყვეტილების კანონიერ ძალაში შესვლის ჩათვლით მიმდინარე ეტაპებს კოლეგიური ირგანოს საქმიანობის დამოუკიდებლობის, კანონიერების, მიუკერძოებლობის, პრინციპების დაცვით.
