ზესტაფონის მუნიციპალიტეტში ეპილეფსიითა და პარკინსონით დაავადებულ პირებს გამგეობიდან გამოყოფილი დახმარება დროებით შეუწყდათ, თუმცა, "გურია ნიუსის" ინფორმაციით, ისინი პროგრამით სარგებლობას თებერვლის ბოლოდან ისევ შეძლებენ.
"გურია ნიუსს" ზესტაფონიდან პროგრამით მოსარგებლე ორი ბენეფიციარი დაუკავშირდა, რომლებიც აღნიშნავენ, რომ დეკემბერსა და იანვარში ეპილეფსიითა და პარკინსონით დაავადებული პირების დახმარების პროგრამა შეწყდა. მათივე თქმით, მედიკამენტები, რასაც ისინი ამ პროგრამის მეშვეობით იღებდნენ, ორი თვეა არ მიუღიათ.
როგორც ერთ-ერთი ბენეფიციარი ელენა ხვედელიძე აღნიშნავს, უკვე რამდენიმე წელია მძიმედ არის დაავადებული ეპილეფსიით, რისთვისაც მუდმივად ესაჭიროება მედიკამენტოზური მკურნალობა, ამისთვის საკმარისი თანხა კი არ აქვს.
"ჩემი შემოსავალი მხოლოდ პენსიაა, რაც წამლებისთვის ნახევარი თვეც არ მყოფნის. კვირაში, დაახლოებით, 50 ლარის წამალი მჭირდება. ამდენხანს გამგეობა მეხმარეობა და მედიკამენტებს მაძლევდნენ, ახლა ორი თვეა არ ამიღია და გაჭირვებით თითო დღის წამალს ვყიდულობ", _ აღნიშნა ხვედელიძემ.
ანალოგიური პრობლემა აქვს ხათუნა გაჩეჩილაძესაც, რომელსაც 10 წლის შვილი ცერებრალური დამბლითა და ეპილეფსიით ჰყავს ავად. მისი თქმით, ბავშვმა წამალი თუ ყოველდღე არ მიიღო, მდგომარეობა უარესდება.
"2016 წლის აგვისტოდან ვიღებ შვილისთვის ამ დახმარებას, მაგრამ 2 თვეა არ მიგვიღია. შეჩერების მიზეზი არ უთქვამთ, როგორც ვიცი, ტენდერია ჩასატარებელი. გვეუბნებიან, რომ წამლები არ არისო. 120 ლარი მჭირდება ერთი თვის წამლის მარაგი რომ მქონდეს. ყოველდღიური მოხმარების წამალია და თუ არ დავალევინე, ბავშვის მდგომარეობა უარესდება", _ ამბობს გაჩეჩილაძე.
ინფორმაციის გადასამოწმებლად და იმის გასარკვევად, თუ როდის შეეძლებათ პროგრამაში ჩართულ პირებს დახმარებების მიღება, "გურია ნიუსმა" ზესტაფონის მნიციპალიტეტის გამგეობას წერილობით მიმართა.
როგორც მუნიციპალიტეტში აღნიშნავენ, ეპილეფსია – პარკინსონით დაავადებულთა პროგრამაში ჩართული ამჟამად 320 ბენეფიციარია ჩართული, რაც წინა წელთან შედარებით, 7 ერთეულით გაიზარდა.
პროგრამის 2017 წლის ბიუჯეტი 100 000 ლარია, წინა წელს კი, 75 000 ლარი ფინანსდებოდა.
"მუნიციპალიტეტმა დაიჭირა თადარიგი და 2016 წლის დეკემბრერში გამოაცხადა ტენდერი მთელი წლის მედიკამენტების მარაგის შესაძნად, 100 000 ლარის ღირებულებით. სამწუხაროდ, ტენდერი 2-ჯერ არ შედგა. ამიტომ მუნიციპალიტეტმა გაითვალისწინა რა მედიკამენტების შესაძლო გაძვირების ფაქტორი, ტენდერი გამოაცხადა 6 თვის მარაგის შესაძენად, 65 000 ლარის ღირებულებით. აქვე განვმარტავთ, რომ წლის ბოლომდე (მეორე ნახევრის) საჭირო მედიკამენტების შესაძენად მუნიციპალიტეტი გეგმავს პროგრამის დაფინანსებას. ამ ეტაპზე მიმდინარეობს გამარჯვებულ ორგანიზაციასთან ხელშეკრულების გაფორმების პროცედურები. მომწოდებელი მოწვეულია ხელშეკრულების გასაფორმებლად. კანონის თანახმად, ხელშეკრულების გაფორმების პროცესი დასრულდება 5 სამუშაო დღეში. აქედან გამომდინარე, ჩვენი ვარაუდით, 20 თებერვლიდან განახლდება მედიკამენტების გაცემა", _ აღნიშნულია "გურია ნიუსისთვის" მოწოდებულ წერილში.
ცნობისთვის, პროგრამა მუნიციპალიტეტში 1998 წლიდან მოქმედებს. ზესტაფონი ერთ-ერთი პირველი რაიონი იყო საქართველოში, რომელმაც მსგავსი პროგრამა განახორციელა.
