ლანჩხუთის მუნიციპალიტეტის ნიგოითის ადმინისტრაციული ერთეულის მცხოვრებლები კონკრეტულ პასუხს ითხოვენ, მოხდება თუ არა 2017 წელს ამ ზონაში შემავალი სოფლების გაზიფიცირება.
"გასულ წელს, როცა ჩვენი თემის მოსახლეობამ აქცია გამართა გაზიფიცირების მოთხოვნით, გვითხრეს, რომ ეს ზონა უკვე გეგმაში იყო შეტანილი, სამუშაოები 2017 წლის ბოლოსთვის დასრულდებოდა და არც ერთი ოჯახი ბუნებრივი აირის გარეშე არ დარჩებოდა.
დაახლოებით სექტემბერი იქნებოდა, როცა დაგვაიმედეს, რომ საპროექტო სამუშაოებზე ტენდერი უკვე გამოცხადებული იყო და რამდენიმე დღეში გამარჯვებულიც გამოვლინდებოდა, ამის შემდეგ კი პროექტირება დაიწყებოდა. მოკლედ, იმ დაპირებებიდან გამომდინარე, რასაც გვაძლევდნენ, უკვე ნათლად უნდა იყოს გარკვეული, როდის დაიწყება ნიგოითის ზონაში გაზიფიცირების სამუშაოები. ვის არ დავუსვით ეს კითხვა, მაგრამ კონკრეტული პასუხი, როდის დაიწყება შესაბამისი სამუშაოების გახორციელება ჩვენს ზონაში, ვერავისგან მივიღეთ.
მარტო ის, რომ გეგმა არსებობს, დიდი ვერაფერი შეღავათია _ ასე 2016 წელს გეგმაში წყალწმინდა, აცანა და აკეთიც კი იყო, მარა არ გაგვიგია, ამ სოფლებში გაზი შესულიყოს. მხოლოდ შუხუთში, ისიც მოსახლეობის აქტიურობის ფონზე, გაიყვანეს გაზის მაგისტრალი, მაგრამ ბოლომდე არც აქაა საქმე მიყვანილი", _ ამბობენ "გურია ნიუსთან" საუბარში ნიგოითის ზონის მაცხოვრებლები და ისინი საკითხით დაინტერესებას და პრობლემის გადაჭრაში დახმარებას პარლამენტში მაჟორიტარ დეპუტატს ნინო წილოსანსაც თხოვენ. ცნობისთვის, ამ პრობლემით დაინტერესება მუნიციპალიტეტის მაჟორიტარს პირადად საკრებულოს წევრებმაც თხოვეს.
ნინო წილოსანი "გურია ნიუსთან" საუბრისას ამბობს, რომ ლანჩხუთის და ჩოხატაურის სოფლების გაზიფიცირების საკითხი ერთ-ერთი პრიორიტეტული საკითხია მისთვის და ამასთან დაკავშირებით მუდმივი კომუნიკაცია აქვს ენერგეტიკის სამინისტროსთან.
"ძალიან კარგად ვიცი და მესმის, რომ ეს მოსახლეობისთვის უმნიშვნელოვანესი პრობლემაა. ცხადია, ვფლობ, როგორც ოფიციალურ ინფორმაციას, ასევე, მაქვს მუდმივი კონტაქტი ადგილობრივი ხელისუფლების წარმომადგენლებთან და ჩემი ყველა ჩასვლა გურიაში, ამ საკითხის ერთგვარ მონიტორინგსაც წარმოადგენს. ჩემთვის სასიხარულოა, რომ ამ ეტაპზე აქტიურად მიმდინარეობს ლანჩხუთის და ჩოხატაურის სოფლების გაზიფიცირების პროცესი. ჩოხატაურში, სხვადასხვა სოფელში, წელს 800-ზე მეტ მოსახლეს აქვს გაზი და მათ რიცხვს წლის ბოლომდე 1 000 მდე აბონენტი დაემატება. ლანჩხუთში 1 000-ზე მეტი მოსახლე უკვე მოიხმარს გაზს და 2017 წლის ბოლოს მათ, დაახლოებით, ამდენივე აბონენტი შეუერთდება. მაქვს მუდმივი კომუნიკაცია ენერგეტიკის სამინისტროსთან, რათა აბონენტთა რაოდენობის დამატების თითოეული რეალური შანსი ჩემი რეგიონის სასარგებლოდ გამოვიყენო", _ ამბობს ნინო წილოსანი.
როგორც საკრებულოს წევრთა სხდომებზე გამოსვლებიდან ირკვევა, გარდა ნიგოითისა, გაზიფიცირების საკითხი ერთ-ერთი უმთავრესი პრობლემაა მუნიციპალიტეტის სხვა სოფლებისთვისაც. საკრებულოს ერთ-ერთ ბოლო სხდომაზე დეპუტატი გიორგი ჩახვაძე დაინტერესდა, როდისთვის იგეგმებოდა სოფელ ჩიბათში ბუნებრივი აირის შეყვანა:
"სოფლის საზღვრამდეა მოსული გაზი. მთელს სოფელს აინტერესებს, როდის შემოვა ჩვენთან, არის თუ არა ამ კუთხით რაიმე სიახლე?!", _ იკითხა დეპუტატმა, რომელსაც ბანი ღრმაღელისა და ნიგოითის ადმინისტრაციული ერთეულების მაჟორიტარებმაც შეაწიეს, კითხვით მიმართა გამგებელს.
პასუხად მუნიციპალიტეტის გამგებელი ზაზა ურუშაძე დეპუტატებს შეპირდა, რომ საკითხით აუცილებლად დაინტერესდებოდა და ენერგეტიკის მინისტრთან შეხვედრისას დეტალურად გაარკვევდა ყველაფერს. ინფორმაციისთვის ისიც დასძინა, რომ ლესელი ბიზნესმენი ზაზა ზოიძეა დაინტერესებული სოფელში ბუნებრივი აირის შეყვანით და მზადაცაა, საამისოდ გარკვეული თანხა გაიღოსო.
საქართველოს მთავრობის მიმდინარე წლის 24 იანვრით დათარიღებული განკარგულებით, რომელსაც ხელს პრემიერ-მინისტრი კვირიკაშვილი აწერს, ირკვევა, რომ გაზიფიცირებისთვის საჭირო სამუშაოების შესრულება წელს ლანჩხუთის მუნიციპალიტეტის რამდენიმე სოფელში იგეგმება. ამ ჩამონათვალშია სოფელი წყალწმინდა და ნიგოითის ადმინისტრაციულ ერთეულში შემავალი ხუთივე სოფელი.
