წყნეთის მოსახლეობამ უახლოეს პერიოდში, შესაძლოა, საპროტესტო აქციები დაიწყოს. როგორც "გურია ნიუსისთვის" გახდა ცნობილი, მოსახლეობის ნაწილი იმ მიწების დაკანონებას ითხოვს, რომელიც მათ სარგებლობაში წლების განმავლობაში იყო.
როგორც მოსახლეობა აღნიშნავს, თბილისის მერიის მაღალჩინოსნებთან არაერთხელ შეხვედრის მიუხედავად, პრობლემა გადაუჭრელი რჩება და ისინი კანონმდებლობით მინიჭებული უფლებით მიწის დარეგისტრირებას ვერ ახერხებენ.
"გურია ნიუსთან" საუბრისას ერთ-ერთი მცხოვრები რეზო ხეჩუაშვილი ამბობს, რომ აღნიშნულ მიწებთან დაკავშირებით პრობლემები ჯერ კიდევ წინა ხელისუფლების დროს დაიწყო. ახალმა ხელისუფლებამ კი, ამ დრომდე საკითხის მოგვარება ვერ შეძლო.
"ნაციონალური მოძარაობის" დროს დილარ ხაბულიანის მოადგილემ ვინმე ბაჩილავამ წაიღო ეს საბუთები და დამალეს. რის გამოც, მოსახლეობამ მერე დარეგისტრირება ვერ შეძლო. სად წერია იმ განკარგულებაში, როცა მიწის ნაკვეთები გამოიყო, რომ იმ წელსვე უნდა დაერეგისტირებინა ხალხს? ამას გვეუბნება ახლა ნარმანიას მოადგილე კარლო ლაფერაძე, რომელსაც უფლება არ აქვს ასეთი განცხადება გააკეთოს. მიწის კანონი გამოვიდა და მაინც არ გვირეგისტრირებენ, როცა განკარგულება არსებობს, რომ ეს მიწა ჩვენ უნდა დაგვირეგისტრირონ საკუთრებაში. სპეციალურად აკეთებენ ამას, ხალხი უნდათ ააბუნტონ.
2000 წელს, როცა თბილისის მერიის დადგენილება გამოვიდა და მოსახლეობისთვის გამოიყო მიწის ნაკვეთები, ოჯახების ნაწილმა მიიღო ეს მიწის ნაკვეთები, დარჩენილია 40-45 ოჯახი, რომლებმაც ვერ დაირეგისტრირეს, რადგან თანხები იყო საჭირო და არ ჰქონდათ. იგივე სიით და დადგენილებით, რატომ ეუბნებიან ახლა ამ ოჯახებს უარს დარეგისტირებაზე? თუ მიწები 95%-მა მიიღო, დარჩენილმა 5%-მა რა დააშავა? მათ რატომ არ ეკუთვნით?
მაშინ პროექტირების თანხები იყო გადასახდელი და გენ. გეგმის თანხას ვერ იხდიდნენ, 400 ლარამდე იყო, ვერ შეაგროვეს, ამის შემდეგ, სიები და საბუთები გააქრეს და აღარც გვიკანონებენ. ისევ მერიის არქივშია სიები და მოიძიონ. ეს ტერიტორიები მერიას თავის ბალანსზე აქვს ახლა. დიდი ეჭვი გვაქვს, რომ აუქციონზე აპირებენ გატანას. ეს არის ამის თავი და თავი. თითო ოჯახისთვის 600 კვ.მ-ია გამოყოფილი. გაკეთებულია გენ გეგმა.
კარლო ლაფერაძეს ორი კვირის წინ შევხვდი, მისგან პასუხი იყო ის, რომ მე რომ სია მივუტანე და დავუდე, მითხრეს, გავარკვევთ ამას საჯარო რეესტრთან, მოვახსენებთ ბატონ დათო ნარმანიას და გეტყვით პასუხსო. მთლიანი სია მივუტანე, დავუტოვე ასლები. რომ შევეხმიანე მერიას, მითხრეს, ლაფერაძე ამბობს, არ გვაქვს უფლება ამ ხალხს მივცეთ რეგისტრაციაო. კანონი ხელში უჭირავთ და აბა, ვის აქვს უფლება? როგორც ჩანს დროის გაწელვას აპირებენ, მიწის რეგისტრაციის დრო რომ გავა, აუქციონზე გაიტანენ", _ ამბობს ხეჩუაშვილი.
მისივე თქმით, თუ მერია დროულად არ გადაჭრის აღნიშნულ პრობლემას, მოსახლეობა აქციების დაწყებას გეგმავს.
"შეუქმნიათ რაღაც მიწის აღიარების კომისია, რომელიც უკვე არაფერში გვჭირდება. გვაქვს დადგენილება, რომ გვეკუთვნის ეს მიწები, რაღად მინდა აღიარება? ხალხს აწვალებენ და ასე, უწყებიდან უწყებაში გადადის საქმე. მარტო ჩვენ არ გვაქვს ეს პრობლემა, კოჯორში, წავკისში ტაბახმელაშიც ანალოგიური პრობლემებია. გავარკვიეთ საჯარო რეესტრში და 5 ათასი განცხადებიდან 1 მოსახლესაც არ დაურეგისტრირეს მიწის ნაკვეთი.
2010 წლიდან ეს მიწები თვითმმართველობის საკუთრებაში, მიწა ჩვენ თან გვეკუთვნის, თან არა, შემოღობილი გვაქვს, ვფლობთ, მაგრამ საკუთრება არ გვაქვს. ინდივიდუალური ბინათმშენებლობისთვის არის ეს ნაკვეთები გამოყოფილი, ყველა სია და დადგენილება ხელში გვიჭირავს და მაინც ვერ ვიკანონებთ", _ ამბობს ხეჩუაშვილი.
წყნეთის მკვიდრი სოსო ელიზბარაშვილი კი აღნიშნავს, რომ 2000 წლიდან ყველა მოსახლეობამ იცოდა ეს მიწის ნაკვეთები საკუთრებაში უნდა მიეღო, თუმცა, არცერთ დოკუმენტში აღნიშნული არ იყო, რომ თუ მოსახლეობა გარკვეულ ვადებში ამას ვერ დაირეგისტრირებდა, პრობლემა შეექმნებოდათ.
"ნებისმიერი ძველი გაფორმების დოკუმენტი ამოიღონ და გააფორმონ მსგავსად. ყველა ნაკვეთი 600კვ.მ.-ია. მეტს ხომ არ ვითხოვთ. რატომ ქმნიან პრობლემას არ ვიცი. ეს არის იმ ოჯახებისთვის, ვისაც ეკუთვნოდა ეს ნაკვეთები, ზოგი მეწყერსაშიშ ზონაში ცხოვრობს, ზოგს სახლი ენგრეოდა და მაგისთვის უნდა მოგვცემოდა. მე გამგებლის მოადგილედ ვმუშაობდი 15 წლის წინ და ვიცი ამ ადამიანების პრობლემები, ახლა ჩემს პირადულ საკითხზე არ გესაუბრებით, დახმარება მთხოვეს და ორგანიზებას ვუწევ საკითხს რომ ხელისუფლებამდე მივიტანო. ვაგზავნით წერილს საჯარო რეესტრში, ის აგზავნის მიწის აღიარების და ლეგალიზების კომისიაში, რომელიც ერთიდაიგივეა, თუმცა, ტრაფარეტული პასუხი მოგვდის, რომ მას ეს საკითხი არ ეხება და ვერ განიხილავს. ეს კომისია განიხილავს მიწაზე მდებარე შენობა-ნაგებობების საკითხს და არა იმას, რომელ მოსახლეს დაუკანონოს მიწა. გამოდის, რომ მთავრობა პურზე რკინოულობის მაღაზიაში გვაგზავნის, სადაც პური არ არის.
თუ ერთ მაგალითს მაინც გვეტყვიან, რომლის საბუთებიც მიწის აღიარების კომისიაში განხილვის შემდეგ (თუ ამ მიწაზე შენობა-ნაგებობა არ იდგა) პირს დაუკანონდა, არაფერს არ ვიტყვით. მაგათი გაფორმებული ნაკვეთი მე არ მინახავს. დღეში რეესტრში 5 ათასი განცხადება შედის და უმეტესობას, განხილვას რომ ვერ ასწრებენ, მიწის აღიარების კომისიაში აგზავნიან. იქედან კი პასუხი მაინც არ მოდის. ასე გადის დრო.
წინა ხელისუფლების დროს დაიწყო ეს პრობლემები და გრძელდება აგერ უკვე 20 წელზე მეტია. ბაჩილავამ რომ წაიღო საბუთები და ხალხს ემუქრებოდა, თუ არ გაჩუმდებით დაგიჭერთო, ბევრმა ხმა ვეღარ გაიღო. უშიშროებასაც კი შეგვახვედრეს მაშინ, პარლამენტის თავმჯდომარე იყო წყნეთში და მივედით ყველა. წყნეთის გარშემო უამრავი ნაკვეთი ჩააბარა ხალხმა, წაართვეს, მერიაზე გადააფორმეს, დათმობა დააფორმებინეს. ვინ აჩუქებდა თავისი ნებით მთავრობას ნაკვეთს, მაგრამ ისეთი შიშიანობა იყო, ვინ გაიღებდა ხმას?! ახლა ცოტა იმედი მიეცათ, რაღაც შეიცვალაო, გაფორმება მოისურვეს და მაინც არაფერი იცვლება, იგივე დროა. თუ არაფერი შეიცვალა, პასუხი არ გვითხრეს, მერიასთან ჩამოვალთ და იქ გავმართავთ აქციებს, მეტი გზა არ გვაქვს", _ ამბობს ელიზბარაშვილი.
"გურია ნიუსი" წყნეთის მოსახლეობის მოთხოვნებთან დაკავშირებით თბილისის მერიასთან დაკავშირებას ცდილობს. მათ პოზიციას მოგვიანებით შემოგთავაზებთ.
ცნობისთვის, წყნეთის მოსახლეობის პროტესტის შესახებ "გურია ნიუსი" 2016 წლის ივნისშიც წერდა. მაშინ მოსახლეობა სასაფლაოს ტერიტორიის სოფლისთვის დაბრუნებას ითხოვდა, რომელიც მათივე ინფორმაციით, გასხვისებულია და ახალი მეპატრონე მშენებლობის დაწყებას აპირებს. ამ მოთხოვნით, რამდენიმე მათგანი 5 დღის განმავლობაში შიმშილობდა კიდეც.
"გურია ნიუსის" არაერთი მცდელობის მიუხედავად, თბილისის მერიიდან და ვაკის რაიონის გამგეობიდან აღნიშნულთან დაკავშირებით პასუხი მიეღო, შედეგი არ მოჰყოლია. უწყებები ან ერთმანეთთან გვამისამართებდნენ, ან ვაკის რაიონის გამგებლის წარმომადგენელთან წყნეთში, რომელიც მოსახლეობის პროტესტს იზიარებდა, თუმცა ამბობდა, რომ პრობლემის მოგვარება არ შეეძლო.
შენიშვნა: ფოტოები "გურია ნიუსის" მიერ 2016 წლის ივნისში, მოსახლეობის საპროტესტო აქციების დროს არის გადაღებული.
ამავე თემაზე:
