საერთო კრების ოქმს, რომელიც 2011 წლის 30 მარტით არის დათარიღებული, ნომერი არ აქვს. ოქმიდან, რომელსაც 114 ხელმოწერა ახლავს, ირკვევა, რომ კრებაზე რამდენიმე საკითხი დადგა _ სასაფლაოსთან დამაკავშირებელი ხიდის შეკეთება, შიდა გზების რემონტი, ახალგაზრდული ცენტრის მოწყობა და საბავშვო ბაღისთვის ოთახების კოსმეტიკური რემონტი. ოქმის თანახმად, ხმათა უმრავლესობით გადაწყდა, რომ გოგოლესუბანში სასაფლაოსთან დამაკავშირებელი ხიდი, შიდა გზები და ახალგაზრდული ცენტრი უნდა გაკეთებულიყო.
აღსანიშნავია, რომ ოქმზე, რამდენიმე იდენტური ხელმოწერაა. სოფლის რწმუნებულის თანაშემწე ზაირა აბდულაშვილი განმარტავს, რომ ხელმოწერები გაყალბებული არ არის:
_ კი, ნამდვილად არის ერთი ადამიანის მიერ რამდენიმე ხელმოწერა გაკეთებული, მაგრამ ის ადამიანი ოჯახის წევრების ნაცვლად აწერდა ხელს, _ ამბობს აბდულაშვილი.
მას არ აქვს კითხვაზე პასუხი, როგორ შეიძლება ოჯახის ყველა წევრს ერთნაირი შეხედულება ჰქონდეს და ყველას, თუნდაც, ახალგაზრდული ცენტრის მოწყობა სურდეს. ჩვენთან საუბრის დროს, აბდულაშვილმა ისიც აღნიშნა, რომ გამოკითხვა პირადად ჩაატარა. თუმცა, კითხვაზე, თუკი სოფელში გამოკითხვა ჩატარდა, რატომ არის დოკუმენტაციაში მითითებული, რომ კრება შედგა, უკვე სხვანაირ პასუხს გვცემს: _ კრებაც იყო და შემდეგ მოსახლეობაც გამოვკითხეთ სათითაოდ.
ახალგაზრდული ცენტრი
ახალგაზრდული ცენტრი ადმინისტრაციის შენობაშია განთავსებული. ორი ოთახი, რომელიც ხარჯთაღრიცხვის მიხედვით 7 407 ლარი დაჯდა, შეღებილია, ჩასმულია მეტალოპლასტმასის ფანჯრები და ერთ ოთახში დაგებულია ლამინირებული იატაკი. ცენტრს მცირე ინვენტარი აქვს _ ფანერით შეჭედილი ძველი სკამები, მუსიკალური ცენტრი დინამიკების გარეშე და ტელევიზორი, სატელიტური ანტენით.
უნდა ითქვას, რომ ეს ანტენები “მაესტროს” და “მეცხრე არხს” არ აჩვენებს. სოფლის გამგებელი და მისი თანაშემწე ამტკიცებენ, რომ ეს ტექნიკური ხარვეზია და ჩვენი იქ ყოფნის დროს, აღნიშნული არხები საერთოდ გათიშული იყო, თუმცა, გადამოწმებისას გაირკვა, რომ ჩოხატაურში, “მაესტროც” და “მეცხრე არხიც” ყველგან უჩვენებდა.
სოფლის რწმუნებული, დავით სიხარულიძე ვერ გვპასუხობს რატომ არის ახალგაზრდულ ცენტრში დაბლოკილი “მაესტრო” და “მეცხრე არხი”. ვერც იმას გვეუბნება, კონკრეტულად როგორ და რაში იყენებს სოფლის ახალგაზრდობა აღნიშნულ ცენტრს.
სიხარულიძის თანაშემწე, ზაირა აბდულაშვილი კი ამბობს, რომ ახალგაზრდები ცენტრში მუსიკას უსმენენ და თავისუფალი დრო მხიარულად გაჰყავთ. კითხვაზე _ როგორ უსმენენ მუსიკას ცენტრში დინამიკების გარეშე, გვპასუხობს, რომ დინამიკები რამდენიმე დღით გაანათხოვრეს.
როგორც გავარკვიეთ, გოგოლესუბნის ახალგაზრდულ ცენტრში რუსულ სიმღერებს _ განსაკუთრებით კი შუფუტინსკის უსმენენ. დავით სიხარულიძე ამბობს, რომ ხშირად, მუსიკის ხმა მთელ სოფელს ესმის. მისივე თქმით, რუსული სიმღერები მას პრობლემას არ უქმნის: _ ვისაც რა სიმღერის მოსმენა უნდა, იმას მოუსმენს, _ ამბობს გამგებელი, თუმცა, ავიწყდება, რომ ცოტა ხნის წინ, საქართველოს პრეზიდენტი ერთ-ერთ სკოლაში, რუსულწარწერებიანი რვეულის ნახვამ ისე გააღიზიანა, რომ რვეული ლამის მინისტრებს ესროლა.
მიუხედავად სოფლის ხელმძღვანელობის მტკიცებისა, რომ ამ ცენტრში ახალგაზრდებს დრო გაჰყავთ, აღმოჩნდა, რომ ისინი თავისუფალი დროის გატარებას ე.წ. ბირჟაზე ამჯობინებენ. მათი ნაწილი ამბობს, რომ ცენტრს არ იყენებს, ნაწილი ამბობს, რომ როცა უხარიათ, მაშინ სარგებლობენ. სოფელში ახალგაზრდების ის ნაწილიც ვნახეთ, რომელმაც ამ ცენტრის არსებობის შესახებ არაფერი იცის.
მოხრეშილი შიდა გზები
კიდევ ერთი სამუშაო, რომელიც გასულ წელს სოფელ გოგოლესუბანში ჩატარდა, შიდა გზების მოხრეშვაა. ხარჯთაღრიცხვის მიხედვით, მოხრეშვა 1 077 ლარი დაჯდა, თუმცა, არც ერთ შიდა გზაზე, დღეს ხრეშის ნაკვალევი არ არის. გოგოლესუბნის მოსახლეობა აღნიშნავს, რომ ამ სოფლის ყველაზე დიდი პრობლემა სწორედ შიდა გზებია. ამბობენ იმასაც, რომ მოხრეშვით საქმე არ კეთდება და ზოგიერთი მათგანი ეჭვობს, რომ ამით ვიღაც ფულს აკეთებს.
_ გზების პრობლემის შესახებ ადგილობრივ ხელმძღვანელობას ბევრჯერ ვესაუბრე, თუმცა, რწმუნებულის მოადგილემ მითხრა _ თქვენ უბანში კი არა, ცენტრში არ არის გზაო, _ ამბობს ჩვენთან საუბრისას “მჭედლების სერის” უბანში მცხოვრები მაყვალა სიხარულიძე.
სიხარულიძე ამბობს, რომ სოფლის კრებაზე, სადაც აღნიშნული საკითხები განიხილეს, არ მიუწვევიათ: _ ბოლო დროს ორჯერ ვიყავი შეხვედრებზე ჩასული. ჯერ ოპოზიციის შეხვედრაზე, შემდეგ, როცა “ნაციონალები” იყვნენ მოსულები. ორივეს აზრი მინდოდა გამეგო და არჩევანი ამის შემდეგ გამეკეთებინა. თუმცა, იმის გამო, რომ ოპოზიციის შეხვედრაზე ვიყავი, საყვედური მითხრეს, _ გვითხრა ქალბატონმა მაყვალამ, რომლის თქმით, სოფელში არაფერი კეთდება.
_ გარე განათების ბოძები დაარჭეს. თუმცა, ყველგან არა. ამან ცოტათი გამოასწორა სიტუაცია, მაგრამ არის ადგილები, სადაც ბოძები არ შეუცვლიათ და ყოველი ქარის დროს, შუქი ქრება.
_ ქალბატონო მაყვალა, პროექტების თანახმად, გასულ წელს, სოფლის შიდა გზები მოიხრეშა. როგორ ფიქრობთ, ამან შედეგი გამოიღო?
_ მოხრეშვა კია შედეგიანი, მაგრამ ერთს რომ აქ დაყრიან, მეორეს ნახევარ კილომეტრში ყრიან. ათი რეისი თუ გააკეთა, ალბათ წერს 20 გავაკეთეო. რა ვიცი, რა გითხრათ _ რა ეტყობა ამ გზას მოხრეშილის და გაკეთებულის?! _ ამბობს “გურია ნიუსთან” საუბრისას მაყვალა სიხარულიძე.
“მჭედლების სერის” უბანში დაახლოებით 100 კომლი ცხოვრობს. როგორც ამბობენ, მათთვის მიცვალებულის დამარხვაც პრობლემაა. აღნიშნავენ, რომ წვიმის დრო გზა ისე ტალახდება, რომ სასაფლაოსთან მისვლა შემოვლითი გზით, რამდენიმე კილომეტრის გავლის შემდეგ უწევთ:
_ ამ სოფელში ყველაფრის პრობლემაა. ეზოში, უგზოობის გამო ვერ ამოვდივარ. როცა გაწვიმდება, აქ გავლა პრაქტიკულად შეუძლებელია. მიცვალებულიც კი ვერ დაგვიმარხავს წესიერად, _ ამბობს ნაზი დიასამიძე.
ამ უბანში გზის გასაკეთებლად, რამდენიმე ოჯახს მიწის ნაკვეთიც კი ჩამოაჭრეს, თუმცა, უხარისხოდ შესრულებულმა სამუშაომ, მიწა ჩამოშალა და გზა უფრო მეტად გააფუჭა.
სოფლის რწმუნებულის თანაშემწე, ზაირა აბდულაშვილი ამტკიცებს, რომ გზა ყველგან მოიხრეშა:
_ ყველგან მოიხრეშა, სადაც საჭირო იყო, მაგრამ წაიღო წყალმა…
_ და ფული, რომელიც სოფელს ეკუთვნოდა და ხალხს უნდა მოხმარებოდა, წყალს გაჰყვა?
_ ასეა და რა ვთქვათ? სხვანაირად არ ხდება. როცა წყალი წამოვიდა, აივსო კანალიზაცია. ეგ კი არა, სულ დაინგრა ოჯახები და ეგ რა არის?
_ ფაქტია, რომ ეს მოხრეშვა უშედეგოა…
_ ჰო. გარკვეულ მომენტში, სანამ გაწვიმდება, კი არის.
სასაფლაოსკენ მიმავალი გზა
გოგოლესუბნის სასაფლაოსკენ მიმავალი გზა ავარიულია _ მთიდან წყალი ჩამოდის და წვიმის დროს, მიმდებარე ტერიტორია, სრულად იტბორება. ადგილობრივები ამბობენ, რომ ამ პრობლემის მოსაგვარებლად ხელისუფლებას არაერთხელ მიმართეს, თუმცა, უშედეგოდ. სოფლის რწმუნებულის, დავით სიხარულიძის თქმით, ის ახალი რწმუნებულია და შარშანდელ პროექტებზე ინფორმაციას არ ფლობს:
_ 4 თვეა, რაც რწმუნებულად დავინიშნე. ნამდვილად არ ვიცი, შარშან რა გაკეთდა.
_ თქვენ ხომ ამ სოფლის მკვიდრი ხართ? გასულ წელს, პრიორიტეტების შერჩევაში არ მიგიღიათ მონაწილეობა?
_ არა. ჩემი სამსახური მქონდა და…
_ სასაფლაოსთან საცალფეხო ხიდია გაკეთებული, რაშიც 12 000 ლარზე მეტია დახარჯული. თუმცა, გოგოლესუბნელების უმრავლესობა ამბობს, რომ ყოველი წვიმის დროს, სასაფლაოსთან მისასვლელი გზა იტბორება.
_ მართლა არ ვიცი და თუ რამე გაინტერესებთ პრესსამსახურს მიმართეთ.
დავით სიხარულიძე ამბობს, რომ “მჭედლების სერზე”, საიდანაც წვიმის დროს, წყალი ნიაღვარივით მოდის, გზა უნდა გაკეთდეს და მიწა უნდა შემაგრდეს, თუმცა, არ იცის, რა თანხით და როდის.
სარიტუალო დარბაზი და საბავშვო ბაღი
მიმდინარე წელს, სოფლის პროგრამის ფარგლებში, სოფელ გოგოლესუბანში სარიტუალო დარბაზი გაკეთდა, რომლის გამოყენებაც კლუბადაც შეიძლება. მისი გაკეთება 18 388 ლარი დაჯდა. დარბაზი, ადმინისტრაციულ შენობაშია განთავსებული. იატაკზე მეტლახია დაგებულია, ჩასმულია მეტალოპლასმასის კარ-ფანჯრები. რამდენიმე ოთახი საკუჭნაოსთვის და სამზარეულოსთვის არის გამოყოფილი, თუმცა, როგორც გვითხრეს, სარემონტო ფული არ ეყოთ, დარბაზში არც საჭირო ინვენტარი აქვთ.
გოგოლესუბნელების ნაწილი ფიქრობს, რომ სარიტუალო დარბაზი აუცილებელია, ნაწილს კი მიაჩნია, რომ უმთავრესი პრობლემა სოფლისთვის შიდა გზები და წყალია, რომელიც მხოლოდ სოფლის ნახევარს მიეწოდება.
გოგოლესუბნის ადმინისტრაციულ შენობაშივეა განთავსებული საბავშვო ბაღიც, რომელიც წელს გაიხსნა და რომელიც, გოგოლესუბნელების თქმით, სოფელს ნამდვილად სჭირდებოდა. როგორც გვითხრეს, ბაღი არასამთავრობო ორგანიზაციამ გააკეთა და თანადაფინანსება, ადგილობრივი ბიუჯეტიდან მოხდა.
