ორგანიზაციის მიერ ჩატარებულმა სადაზღვევო ბაზრის კვლევამ აჩვენა, რომ საავადმყოფოებზე დახარჯული თანხა სადაზღვევო კომპანიებმა ბენეფიციარებისთვის მომსახურების გაუარესების ხარჯზე ამოიღეს. ერთ-ერთი წარმატებული კომპანია “იმედი-ელი” კი ამ პროგრამამ გაკოტრებამდე მიიყვანა.
2010 წელს, ხელისუფლებამ მიიღო დადგენილება მოსახლეობის ჯანმრთელობის დაზღვევის შესახებ. 2010 წელს, ამ დადგენილებაში ცვლილება შევიდა, რომლშიც საავადმყოფოების მშენებლობაზე საქართველოს მთავრობის გადაწყვეტილება აისახა. 2010 წლის 1 აპრილის ცვლილებით, ვალდებულების შეუსრულებლობისთვის 1 მილიონი ლარის ოდენობის პირგასამტეხლო განისაზღვრა.
“საერთაშორისო გამჭვირვალობა _ საქართველოს” მკვლევარი მიშა კუკავა ვარაუდობს, რომ სადაზღვევო კომპანიები აიძულეს საავადმყოფოების მშენებლობა დაეწყოთ. ამ საკითხზე კომპანიები ხმამაღლა არ საუბრობენ. “აისი ჯგუფი” ერთადერთი სადაზღვევო კომპანიაა, რომელმაც “გამჭვირვალობის” მკვლევარებს უთხრა, რომ არა ხელისუფლების ინიციატივა, საავადმყოფოს აშენება კომპანიის ბიზნესინტერესებში არ შედიოდა.
სახელმწიფო აუდიტის სამსახურის ანგარიშის თანახმად, 2008-2010 წლებში სადაზღვევო კომპანიების მოგების საშუალო მარჟა 51% იყო, რაც საკმაოდ მაღალია… რეალურად კი, ჰოსპიტალურ სექტორში ჩადებული ხარჯების გათვალისწინებით, ზარალის ერთობლივი მაჩვენებელი სახელმწიფო სამედიცინო დაზღვევის ყველა პროვაიდერისათვის საშუალოდ 93%, -ია. მოგების მარჟა კი, შესაბამისად _ 7%.
ასევე ირკვევა, რომ სახელმწიფოს, დადგენილებაში ცვლილების შეტანის შესახებ, რაც ჯარიმის სახით, მილიონი ლარის გადახდას ითვალისწინებდა, კონსულტაცია არ გაუვლია არც ერთ სადაზღვევო კომპანიასთან და შესაბამისად ეს შეზღუდვა თვითნებურად დააწესა.
სადაზღვევო კომპანიებს შეეძლოთ დაეტოვებინათ სახელმწიფო დაზღვევის პროგრამა, მაგრამ ეს არც ერთმა კომპანიამ არ გააკეთა, მიუხედავად იმისა, რომ ბიზნესთვალსაზრისით ეს უფრო მომგებიანი ქმედება იქნებოდა, ვიდრე ამ პროგრამაში დარჩენა.
“სახელმწიფო დაზღვევის პროგრამაში კომპანიების დარჩენა შემდეგი ფაქტორებით აიხსნება: მთავრობის ზეწოლა, რომ არ გასულიყვნენ ამ პროგრამიდან და მზღვეველების მიერ რისკების შეუფასებლობა” აცხადებს “საერთაშორისო გამჭვირვალობა – საქართველოს” მკვლევარი მიშა კუკავა.
რისკების უგულებელყოფამ გაკოტრებამდე მიიყვანა სადაზღვევო კომპანია “იმედი ელი”. ამ კომპანიას თერთმეტზე ნაკლები საავადმყოფოს მშენებლობის ვალდებულება რომ აეღო, გაკოტრებას გადაურჩებოდა. როგორც ცნობილია “იმედი ელ”-მა 11 საავადმყოფოს მშენებლობა ითავა, საიდანაც მხოლოდ 6-ის აშენება შეძლო.
სახელმწიფოს მხრიდან სადაზღვევო კომპანიების დაბეგვრას უკვალოდ არ ჩაუვლია, ეს თანხა კომპანიებმა დაზღვეულებისგან ამოიღეს მომსახურების ხარისხის გაუარესების გზით.
“სახელმწიფოს მხრიდან თავსმოხვეული ვალდებულებების კვალდაკვალ მოიმატა ხელოვნური ბარიერების რიცხვმაც, რომლებსაც სახელმწიფო დაზღვევის ბენეფიციარები აწყდებიან. ეს ბარიერები ძირითადად “უარების”რიცხვის ზრდით გამოიხატება, _ აცხადებს მიშა კუკავა.
საერთაშორისო გამჭვირვალობის გათვლებით სადაზღვევო კომპანიების მიერ საავადმყოფოების აშენების ფასი დაზღვეული ბენეფიციარებისთვის ნათქვამ 45 ათასი უარის ტოლია.
სადაზღვევო სექტორის მკვლევარი ფიქრობს, რომ ახლადაშენებულ კლინიკებში საეჭვოა მომსახურების ხარისხი. სახელმწიფო კი დაზღვევის ბენეფიციართა ზრდის პარალელურად სადაზღვევო კომპანიების მონიტორინგის სამსახურის შექმნაზე ჯერჯერობით არ ფიქრობს.
