_ დავების გამხილველი საბჭოში შევიტანეთ საჩივარი, ახლა გურამ ბაქანიძის საქმეს მისი შვილი აგრძელებს. 2012 წლის 13 აპრილს გარდაიცვალა ბატონი გურამ ბაქანიძე, ეს ჯარიმა შემოსავლების სამსახურმა სიცოცხლეშივე მოუხსნა და მისი გარდაცვალებიდან 10 დღეში კი ამავე სამსახურმა დააჯარიმა, _ გვითხრა კახა ჩავლეშვილმა.
ადვოკატის მიერ მოწოდებულ მასალებში, საუბარია გურამ ბაქანიძის ჩვენებაზე, ვკითხულობთ:
_ გურიის საგადასახადო ინსპექციამ 2009 წლის 17-23 ივნისს ჩემს საწარმოში ჩაატარა სასაქონლო მატერალურ ფასეულობათა ინვენტარიზაცია. ინვენტარიზაციის შედეგად 23.06.2009 წელს გამოიცა სამართალდარღვევის ოქმი: სერია სას #002434 საბუღალტრო საბუთებში აღურიცხავი სასაქონლო მატერიალური ფასეულობის შესახებ, რომლის საფუძველზე გურიის საგადასახადო ინსპექციის უფროსმა ალექსანდრე ბაქანიძემ 30.06.2009 წელს გამოსცა ბრძანება #2376 და 01.07.2009 წლის საგადასახადო მოთხოვნა #230. რომელთა მიხედვითაც დამატებით გადასახდელად დამეკისრა 9882 ლარი.
საგადასახადო მოთხოვნას არ დავეთანხმე და წარვადგინე საგადასახადო საჩივარი ფინანსთა სამინისტროს შემოსავლების სამსახურში, რომელმაც თავისი 2009 წლის 5 ოქტომბრის #3390 ბრძანებით არ დააკმაყოფილა ჩემი საჩივარი. რის შემდეგაც საჩივარი შევიტანე ფინანსთა სამინისტროსთან არსებულ დავების განმხილველ საბჭოში, რომელმაც თავისი 2009 წლის 9 ნოემბრის გადაწყვეტილებით, ჩემი საგადასახადო საჩივარი განუხილველი დატოვა.
ზემოხსენებულის შემდეგ სარჩელით მივმართე ოზურგეთის რაიონულ სასამართლოს, რომელმაც 10.05.2010 წლის გადაწყვეტილებით ჩემი სარჩელი არ დააკმაყოფილა. ხსენებული გადაწყვეტილება ჩემს მიერ გასაჩივრებული იქნა ქუთაისის სააპელაციო სასმართლოში, რომელმაც თავისი 03.09.2010 წლის განჩინებით სააპელაციო საჩივარი არ დააკმაყოფილა. ამის შემდეგ საკასაციო საჩივრით მივმართე საქართველოს უზენაეს სასამართლოს. უზენაესი სასამართლოს 30.03.2011 წლის გადაწყვეტილებით დააკმაყოფილა ჩემი საჩივარი – გააუქმდა ქუთაისის სააპელაციო სასამართლოს 03.09.2011 წლის განჩინება და ბათილად იქნა ცნობილი:
1. საქართველოს ფინანსთა სამინისტროს შემოსავლების სამსახურის, გურიის საგადასახადო ინსპექციის 2009 წლის 1 ივლისის #230 საგადასახადო მოთხოვნა;
2. საქართველოს ფინანსთა სამინისტროს შემოსავლების სამსახურის 2009 წლის 5 ოქტომბრის ბრძანება #3390;
3. საქართველოს ფინასთა სამინიტროსთან არსებული დავების განმხილველი საბჭოს 2009 წლის 9 ნოემბრის გადაწყვეტილება.
ამასთანავე ამავე გადაწყვეტილებით დაევალა სსიპ შემოსავლების სამსახურს ახალი აქტის გამოცემა. სსიპ შემოსავლების სამსახურმა სასამართლოს დავალების საფუძველზე 19.12.2011 წელს გამოსცა ბრძანება #4688105 და 20.12.2011 წელს საგადასახადო მოთხოვნა #061-1. რომელთა მიხედვითაც ჩემს გადასახადის გადამხდელის პირად აღიცხვის ბარათზე დარიცხული იქნა სსიპ შემოსავლების სამსახურის მიერ იძულების წესით ამოღებული თანხა 9882 ლარი.
აქვე გაცნობებთ, რომ პირველი ინსტანციის სასამართლოს გადაწყვეტილების მიღების შემდეგ, გურიის საგადასახადო ინსპექციამ შუამდგომლობით მიმართა ოზურგეთის რაიონულ სასამართლოს და მოითხოვა ოზურგეთის რაიონული სასამართლოს 10.05.2010 წლის გადაწყვეტილების საფუძველზე ჩემს საკუთრებაში არსებული დაყადაღებული ქონების რეალიზაცია. ოზურეგთის რაიონულმა სასამართლომ დააკმაყოფილა შუამდგომლობა 13.08.2010 წლის ბრძანებით. იმისათვის, რომ თავიდან ამეცილებინა ჩემს საკუთრებაში არსებული ქონების რეალიზაცია, იძულებული გავხდი, გამეყიდა ჩემს საკუთრებაში არსებული საცხოვრებელი ბინა ქალაქ ბათუმში და გადამეხადა დავალიანება.”
ამ საქმით ცენტრალური მედია მას შემდეგ დაინტერესდა, რაც უზენაესმა სასამართლომ ორი მეწარმის ადმინისტრაციულ საქმეზე გადაწყვეტილება მეწარმეების სასარგებლოდ გამოიტანა. ერთ-ერთი მათგანი გურამ ბაქანიძე იყო.
სიუჟეტშიც ისიც აღინიშნა, რომ ეს ორი ინდმეწარმე საგადასახადო ორგანოების მიერ დარიცხულ თანხას აღარ გადაიხდიდნენ.
_ შეგვამოწმეს, უკანონოდ დაგვარიცხეს თანხები. ჩვენთვის ეს გადაწყვეტილება ნიშნავს იმას, რომ ამ ქვეყანაში კიდევ შეიძლება რაღაცაზე ფიქრი და იმედია იმისა, რომ სამართალს მიაღწევ, _ განაცხადა მაშინ გურამ ბაქანიძემ ცენტრალური მედიის წარმომადგენლებთან.
ალბათ, ბატონი გურამი ვერც კი წარმოიდგენდა, რომ მისი გარდაცვალების შემდეგ, ყველაფერი თავიდან დატრიალდებოდა…
