ინსტიტუტს გაუჩნდა დავალიანება თავისი თანამშრომლების, ვადიანი ხელშეკრულებით დაქირავებულთა, ოფისის მფლობელის მიმართ; ინსტიტუტი ვეღარ იხდის კომუნალურ გადასახადებს, სატელეფონო და ინტერნეტის მომსახურების საფასურს,” _ ეს განცხადება საქართველოს განვითარების კვლევითი ინსტიტუტის ხელმძღვანელმა თეონა აქუბარდიამ დღევანდელ პრესკონფერენციაზე გააკეთა.
ორგანიზაცია, რომლის ანგარიში “პროგრესბანკში” 25 ივლისს დაყადაღდა, დღემდე უშედეგოდ ცდილობს მიზეზის გარკვევას. ბოლო ხანს გახორციელებული საკანონმდებლო ცვლილებით საბანკო ანგარიშების დაყადაღებასთან დაკავშირებული ინფორმაცია კონფიდენციალურია.
საქართველოს განვითარების კვლევითი ინსტიტუტმა საბანკო ანგარიშის დაყადაღებასთან დაკავშირებით განცხადება გაავრცელა, რომელსაც უცვლელად გთავაზობთ.
“2012 წლის 25 ივლისს თბილისის საქალაქო სასამართლოს გადაწყვეტილებით ყადაღა დაედო ინსტიტუტის ანგარიშებს სს „პროგრეს ბანკში”. ყადაღის დადების გადაწყვეტილება ინსტიტუტს არც წერილობით და არც ზეპირი ფორმით არ მიუღია.
იმისათვის, რომ დაგვედგინა ყადაღის მიზეზი და გასაჩივრების პროცედურები, ამა წლის 26 ივლისს წერილობით მივმართეთ თბილისის საქალაქო სასამართლოს სამივე კოლეგიას. ასლი გადაეგზავნა ასევე საქართველოს მთავარ პროკურატურას და შემოსავლების სამსახურს. 31 ივლისს მივიღეთ თბილისის საქალაქო სასამართლოს კანცელარიის განყოფილების სისხლის სამართლის საქმეთა სექტორის უფროსის ბატონ ნიკოლოზ მარგველაშვილის პასუხი, სადაც ნათქვამია:
„გაცნობებთ, რომ მოქმედი სისხლის სამართლის საპროცესო კანონმდებლობით, სასამართლოს შეუძლია სისსხლისსამართლებრივი დევნის ორგანოს (მხარის) შუამდგომლობის საფუძველზე ყადაღა დაადოს პირის ქონებას, მათ შორის, საბანკო ანგარიშებს, თუ არსებობს ამავე კანონმდებლობით დადგენილი საფუძვლები. სასამართლოს განჩინება ქონებაზე ყადაღის დადების შესახებ გადაეცემათ მხარეებს, რომელთაც უფლება აქვთ გაასაჩივრონ სასამართლოს განჩინება საქართველოს სისხლის სამართლის საპროცესო კოდექსის 207-ე მუხლით გათვალისწინებული წესით. ამასთან, გაცნობებთ, რომ საქართველოს სისხლის სამართლის კოდექსის მე-3 მუხლის მე-5 ნაწილის თანახმად, მხარეს წარმოადგენენ ბრალდებული, მსჯავრდებული, გამართლებული, მათი ადვოკატი, გამომძიებელი და პროკურორი.
ზემოაღნიშნულიდან გამომდინარე, მოკლებული ვართ შესაძლებლობას დავაკმაყოფილოთ თქვენი მოთხოვნა.” ზემოაღნიშნული პასუხიდან ირკვევა, რომ ინსტიტუტს სისხლის სამართლის საპროცესო კოდექსის 207-ე მუხლის თანახმად უფლება არ აქვს გაასაჩივროს თბილისის საქალაქო სასამართლოს გადაწყვეტილება სასამართლოში. ამ გადაწყვეტილებით სს „პროგრეს ბანკში” ინსტიტუტის საბანკო ანგარიშების ყადაღის მოხსნის საკითხი გაურკვეველია, რაც ფაქტობრივად იწვევს ინსტიტუტის საქმიანობის პარალიზებას.
ინსტიტუტი დაფუძნდა ზაზა შათირიშვილის, ვახტანგ ხმალაძისა და ნოდარ ხუხაშვილის მიერ 2011 წლის ოქტომბერში არასამეწარმეო იურიდიული პირის სახით. მისი მთავარი მიზანია დემოკრატიის განვითარების, პოლიტიკური, ეკონომიკური, სოციალური და სხვა რეფორმების ხელშეწყობა სამეცნიერო კვლევის, კონფერენციების, სემინარების, სათანადო ნაშრომების გამოცემა-გავრცელებისა და საზოგადოებრივი აზრის კვლევის მეშვეობით. კვლევების შედეგები ხელმისაწვდომია როგორც სამთავრობო, ასევე ადგილობრივი და საერთაშორისო არასამთავრობო ორგანიზაციებისთვის, კერძო სექტორისთვის და სხვა დაინტერესებულ პირთათვის. 2011 წლის ოქტომბრიდან 2012 წლის მარტამდე ინსტიტუტის საბჭოს თავმჯდომარე გახლდათ ინსტიტუტის დამფუძნებელი ნოდარ ხუხაშვილი. მას შემდეგ, რაც მან დატოვა საბჭოს შემადგენლობა და საბჭოს თავმჯდომარის თანამდებობა, დამფუძნებელთა გადაწყვეტილებით ეს თანამდებობა დაიკავა ინსტიტუტის საბჭოს ახალმა წევრმა თეონა აქუბარდიამ. ამასთან ერთად, ამა წლის 9 ივლისს ინსტიტუტის მეორე დამფუძნებელმა ვახტანგ ხმალაძემ იმის გამო, რომ ის კენჭს იყრის პარლამენტის არჩევნებში, ასევე დატოვა არა მხოლოდ ინსტიტუტის საბჭოს წევრის, არამედ სამართლის დეპარტამენტის ხელმძღვანელის თანამდებობაც.
ინსტიტუტის მმართველი ორგანოა საბჭო, რომლის წევრებიც არიან: თეონა აქუბარდია (თავმჯდომარე), ზაზა შათირიშვილი და მალხაზ შევარდნაძე. ინსტიტუტის წესდების თანახმად, ყველა გადაწყვეტილება, გარდა საბჭოს წევრების არჩევისა, მიიღება საბჭოს მიერ”.
ახლა, მოკლედ იმის თაობაზე, თუ რა გააკეთა ინსტიტუტმა თავისი 9-თვიანი არსებობის მანძილზე და რის გაკეთება ჰქონდა დაგეგმილი უახლოესი რამდენიმე თვის განმავლობაში. ინსტიტუტში შესრულდა სამეცნიერო კვლევები საქართველოს განვითარების რამდენიმე მნიშვნელოვანი მიმართულებით, კვლევა განხორციელდა ინსტიტუტის თანამშრომლებისა და მოწვეული სპეციალისტების მიერ. კვლევის შედეგები განხილული იქნა 7 კონფერენციაზე, რომელშიც მონაწილეობა მიიღეს შესაბამისი სფეროს სპეციალისტებმა, არასამთავრობო ორგანიზაციების, პოლიტიკური პარტიებისა და დიპლომატიური კორპუსის წარმომადგენლებმა;
ინსტიტუტის ვებ-გვერდზე განთავსდა, გამოიცა და გავრცელდა 8 სამეცნიერო ნაშრომი და 12 ანალიზი. ინსტიტუტის დაკვეთით ჩატარდა სოციოლოგიური კვლევა, რომლის შედეგები და ანალიზი გაშუქდა კონფერენციაზე და განთავსდა ინსტიტუტის ვებ-გვერდზე. დღეისათვის დასრულებულია კიდევ 4 კვლევითი სამუშაო: ეკონომიკის, სოფლის მეურნეობისა და კონკურენციის პოლიტიკის განვითარების კონცეფციები, ოფიციალური სტატისტიკის რეფორმაციისა და სრულყოფის კონცენფცია, რომელთა გამოცემასაც ინსტიტუტი ვეღარ ახერხებს ანგარიშის დაყადაღების გამო. დასრულების სტადიაზეა ცნობილი მეცნიერის კახა კაციტაძის შრომათა კრებულის მომზადება და სახელმძღვანელო არჩევნებზე დამკვირვებელთათვის, რომლის გამოცემაც დაგეგმილი გვქონდა ძალიან დიდი ტირაჟით დამკვირვებელი ორგანიზიებისთვის უსასყიდლოდ გადასაცემად. სექტემბრისთვის უნდა დასრულებულიყო პოლიტიკური პარტიების დაფინანსების ევროპული სისტემების ანალიზი და მომზადებულიყო დაფინანსების კონცეფცია საქართველოსთვის, რომელიც შესაძლებელს გახდიდა, ერთი მხრივ, პარტიული საქმიანობის ფინანსურ უზრუნველყოფას და, მეორე მხრივ, შეზღუდავდა არჩევნების დროს „დიდი ფულის” გამოყენების შესაძლებლობას (ამ თემას იკვლევენ ინსტიტუტის თანამშრომლები და გერმანელი კონსულტანტი).
ინსტიტუტის ანგარიშების დაყადაღების გამო ვერც ერთი ზემოაღნიშნული სამუშაო ვეღარ დასრულდება. უფრო მეტიც, აუნაზღაურებელი დარჩება შესრულებული სამუშაო.
ყოველივე ზემოაღნიშნული, გამოიწვია თბილისის საქალაქო სასამართლოს სრულიად უსამართლო გადაწყვეტილებამ.
ისიც უნდა აღვნიშნოთ, რომ მიმდინარე შემოსავალი დაკარგა ინსტიტუტის 22 მუდმივმა და 12 დროებითმა თანამშრომელმა.
ამის მიუხედავად ინსტიტუტი აპირებს სამართლებრივი გზით დაიცვას თავისი ინტერესები, რაშიც დახმარებას ახალგაზრდა იურისტთა ასოციაცია გაგვიწევს.”
