“ახალგაზრდა ადვოკატების” ბრლადებების შესახებ, ხათუნა კალმახელიძის უწყებამ “გურია ნიუსისგან” ამ საკითხზე კომენტირებისას შეიტყო. უწყებამ სატელეფონო კომენტარისგან თავი შეიკავა და დაგვპირდა, რომ წერილობით გვიპასუხებდა. მართლაც, რამდენიმე წუთში, სამინისტროს ვებ-გვერდზე შემდეგი შინაარსის განცხადება გავრცელდა:
“სასჯელაღსრულების, პრობაციის და იურიდიული დახმარების საკითხთა სამინისტრო მიიჩნევს, რომ ზოგიერთი სუბიექტის მიერ უკვე დაწყებულია სასჯელაღსრულების სისტემაში საპარლამენტო არჩევნების პროცესის განხორციელებასთან დაკავშირებით დეზინფორმაციის მიზნობრივი გავრცელება და საზოგადოების შეცდომაში შეყვანა.
სამინისტრო კატეგორიულად უარყოფს გავრცელებულ ინფორმაციას და განმარტავს, რომ ისევე როგორც საქართველოს ნებისმიერ საარჩევნო ოლქსა თუ უბანში, ასევე სასჯელაღსრულების სისტემაში გახსნილ საარჩევნო უბნებში, ოქტომბრის საპარლამენტო არჩევნები ჩატარდება გამჭირვალედ, სამართლიანად და მოქმედი საარჩევნო ნორმების დაცვით.
ამ მიმართულებით სამინისტრო საქართველოს ცენტრალურ საარჩევნო კომისიასთან და საარჩევნო პროცესში ჩართულ საერთაშორისო და ადგილობრივ ორგანიზაციებთან ერთად ინტენსიურად მუშაობს პატიმრობისა და თავისუფლების აღკვეთის დაწესებულებებში საარჩევნო პროცესის სრულყოფილად ორგანიზების მიზნით.
მიმდინარე წელს, ბრალდებულებთან ერთად, პირველად საარჩევნო ხმის უფლებით ისარგებლებენ ასევე მსჯავრდებულები, რომლებსაც ჩადენილი აქვთ ნაკლებად მძიმე დანაშაული და შესაბამისად, საარჩევნო უბნები გაიხსნება ყველა იმ სასჯელაღსრულების დაწესებულებაში, სადაც განთავსებული არიან ზემოაღნიშნული პირები.
უნდა აღინიშნოს, რომ უპირველეს ყოვლისა სამინისტრო არის დაინტერესებული, რომ სასჯელაღსრულების სისტემაში მაქსიმალურად ორგანიზებულად წარიმართოს საარჩევნო პროცესი და საარჩევნო ხმის უფლების მქონე პატიმარმა არჩევნებში მონაწილეობის გზით დააფიქსიროს მოქალაქეობრივი ვალდებულება.
სამინისტროს გააჩნია საფუძვლიანი ეჭვი, რომ არჩევნების მოახლოებასთან ერთად უფრო და უფრო მოიმატებს დეზინფორმაციული განცხადებები სასჯელაღსრულების სისტემაში საარჩევნო პროცესთან დაკავშირებით და ასეთ შემთხვევებში სამინისტრო მაქსიმალურად შეეცდება საზოგადოებას მყისიერად მიაწოდოს ობიექტური ინფორმაცია.”
“სასჯელაღსრულების სამინისტრო ციხეში არჩევნების გამჭვირვალობის შესახებ სდუმს,” _ ეს განცხადება “ახალგაზრდა ადვოკატებმა” გაავრცელეს, რომლებიც აცხდებენ, რომ სამინისტრომ უპასუხოდ დატოვა მათი კითხვები ციხეებში გამჭვირვალე საარჩევნო გარემოს უზრუნველყოფასთან დაკავშირებით.
ორგანიზაცია მინისტრისგან მოითხოვდა პასუხს შემდეგ საკითხებზე: აპირებდა თუ არა სამინისტრო პოლიტიკური ნიშნით დაპატიმრებულთა საქმეების გადახედვას, ადვოკატთა ინსტიტუციონალური დევნის შეწყვეტას და 113 მსჯავრდებული ადვოკატის საქმეების გადახედვას; ემხრობოდა თუ არა ქვეყანაში ფართომაშტაბიანი ამნისტიის იდეას; მზად იყო თუ არა საზოგადოებისთვის გაეცნო ახალი უფლებამოსილების მანდატში ახალი პრიორიტეტები. როგორ გეგმავდა სამინისტრო, ციხეებში 1 ოქტომბრის საპარლამენტო არჩევნების ჩატარებას გამჭვირვალედ, წინასაარჩევნო კამპანიის დასაშვებობით და არასამთავრობო სექტორისა და დამკვირვებლების ჩართულობით.
სასჯელაღსრულებისა და პრობაციის სამინისტრომ “ახალგაზრდა ადვოკატებს” უპასუხა, რომ მათ მიერ მოთხოვნილი ინფორმაცია არ იყო საჯარო და ურჩია, საჭირო ინფორმაცია სამინისტროს ვებ-გვერდზე მოეძებნათ.
საარჩევნო კოდექსის თანახმად, წლევანდელ არჩევნებში მსუბუქი და ნაკლებად მძიმე დანაშაულში ბრალდებულები მიიღებენ მონაწილეობას; 2012 წლის 1 თებერვლის მონაცემებით კი, დღესდღეობით, ასეთი საარჩევნო ხმის უფლების მქონე 1 500 პატიმარია. ახალგაზრდა ადვოკატები ფიქრობენ, რომ სასჯელაღსრულების სამინისტრო ვერ უზრუნველყოფს გამჭვირვალე არჩევნებს ციხეებში.
“საქართველოს სასჯელაღსრულების, პრობაციისა და იურიდიულ საკითხთა მინისტრად ძველი მინისტრის კანდიდატურის დამტკიცება ახლა უფრო მეტ შეკითხვას და უნდობლობას აჩენს საზოგადოებაში; მინისტრის ახალი მანდატის შემთხვევაში კი, ჩნდებოდა განცდა, რომ საქართველოს სასჯელაღსრულება დაბრუნდებოდა სამართლებრივ წესრიგში და ადამიანის უფლებების კუთხით გატარებული ღონისძიებები პატიმრებსაც და მათი ოჯახის წევრებსაც მშვიდი ცხოვრების საშუალებას მისცემდა, მაგრამ სახელმწიფოს არ სურს სასჯელაღსრულების სისტემაში გადახედოს საკუთარ მკაცრ სისხლის სამართლებრივ პოლიტიკას და „ნულოვანი ტოლერანტობა” ისევ რჩება პრიორიტეტულ მიმართულებად”, _ აცხადებს ორგანიზაციის წარმომადგენელი არჩილ კაიკაციშვილი “გურია ნიუსთან” საუბარში.
