_ “გურია ნიუსის” ინფორმატორის თქმით, ვახტანგ ლემონჯავას “ფოთის წყალი” კარგა ხანია შეყენებული აქვს და მან პოსტი დატოვა.
“ჯერ კიდევ გასულ წელს ხსნიდნენ მერს, როცა მიხეილ სააკაშვილი იყო ჩამოსული და ვახტანგ ლემონჯავასთან გვარიანი უთანხმოება მოუვიდა. ის კი არადა, გაბრაზებულ სააკაშვილს მერისთვის ტელეფონი უსვრია _ შენ ჩვენ ქალაქის გასალამაზებლად დაგნიშნეთ, თორემ დასანგრევად კი არაო. საუბარი იყო ქალაქში დანგრეულ გარაჟებსა თუ სავაჭრო ობიექტებზე. მერი ამას იმით ხსნიდა, რომ კორპუსებთან მოედნებისა და გასართობი ცენტრების გაკეთებას აპირებდა, მაგრამ დანგრეული ნარჩენები არ გაუტანიათ ადგილებიდან და ის ადგილები გასართობად კი არა, ბავშვებისთვის სახიფათოდ იქცა. მერი სიხისტით გამოირჩევა და ეს წინასაარჩევნოდ მით უფრო არ “აწყობს” ხელისუფლებას.
მოკლედ, ლემონჯავა მაშინ კი გადარჩა, მაგრამ მისი ხისტი ხასიათის გამო უპირებენ მოხსნას. ამჟამად შვებულებაში უნდა იყოს და მალე გადაბარგდება მშობლიურ ჩხოროწყუში. ამბობენ, იქ ავტორიტეტი აქვსო. თანაც იგი მშობლიური სოფლის, ლესიჭინეს გამგებელი და ჩხოროწყუს საკრებულოს თავმჯდომარეც იყო.
ფოთში ძალაუფლებას ისევ ვანო საღინაძე დაიბრუნებს _ ჩვენი წყაროს თქმით, საკრებულოს თავმჯდომარესაც არ აუშენებია ქალაქი, მაგრამ მასთან მისულ ადამიანს ხისტად არ დაელაპარაკება და თუ დახმარებაზე უარს ეტყვის, ამას ლამაზად მაინც გააკეთებს. ისე საღინაძე უფრო რბილი ხელმძღვანელია და ისიც უფრო კარგი შემსრულებელია, ვიდრე _ მმართველი”, _ გვითხრა წყარომ, რომელიც ფოთის მერიის კულუარებში გარკვეულია.
მისივე თქმით, წინა შემთხვევაშიც არავის წარმოედგინა, რომ ლემონჯავა პოსტს შეინარჩუნებდა, მაგრამ სამთავრობო ლობისტებს გადაურჩენიათ: “საერთოდ, ლემონჯავა კარგი შემსრულებელია და ვერ ვიტყვით, რომ სხვა ქალაქების თავკაცებზე უარესია, მაგრამ ამ ეტაპზე ფოთიდან ჩხოროწყუში გადაისვრიან. ფოთში ხუმრობით ამბობენ, ხელისუფლება მერს ეუბნება _ წადი შენს ჩხოროწყუში, თუ მოიგებ _ ხომ კარგი და თუ არადა _ ან ჩვენ დაგიჭერთ, ან “ოცნების” ხალხიო…”
არადა, საპორტო ქალაქის ხელმძღვანელს, წესით წასვლა არ უნდა უნდოდეს. აი, როგორი “შესავალი” აქვს გაკეთებული ფოთის მერის ბიოგრაფიას ქალაქის ოფიციალურ ვებ-გვერდზე”: “ტკბილი კოლხი დედა, არგონავტების ჰეროიკული მითი, პომპეუსის ლაშქრობა, ფაზისის ფილოსოფიისა და რიტორიკის უძველესი აკადემია, ქართველი ერის სულიერი განმანათლებელი მოციქული ანდრია პირველწოდებული, გმირობისა და მეგობრობის სიმბოლო ცოტნე დადიანი, უდიდესი მოაზროვნე ნიკო ნიკოლაძე ზღვის პატარძლის, საქართველოს საზღვაო კარიბჭის _ ფოთის ისტორიაა. დამოუკიდებელი საქართველოს რეფორმატორმა ხელისუფლებამ, სწორედ ამ მყარ საფუძველზე დაიწყო ქვეყნის ეკონომიკური ხერხემლის შენება. ოქროს საწმისთან გაიგივებული ოქროს საწყისი ჩვენი ქალაქისათვის ახალი, აღმშენებლობის სულის შთაბერვის საწინდარია. სწრაფი ტემპით შენდება ფოთის ინდუსტრიული ზონა (აკი, პრეზიდენტმაც თქვა, არ გაამართლაო? მაინც შენდება?! რედ.), მისი ლიცენზიანტები მსოფლიოში ცნობილი ბრენდები გახდნენ, საფუძველი ჩაეყარა ახალი საზღვაო ნავსადგურის მშენებლობას, რომელიც არსებულზე სამჯერ დიდი უნდა გახდეს და წელიწადში 25 მილიონ ტონა ტვირთბრუნვის ზღვარზე გავიდეს (თუმცა, ამ ცოტა ხნის წინ 400 კაცი უმუშევარი დატოვეს!!! რედ.). ქალაქის საკურორტო ზონაში აფხაზეთიდან დევნილთათვის დაიწყო ახალი მიკრორაიონის მშენებლობა, სადაც 20 ათასი მოსახლე მიიღებს ბინას (!!!), ინტენსიურად ხორციელდება ინფრასტრუქტურული ძვირადღირებული პროექტები _ სასმელი წყლით მომარაგება, გაზიფიკაცია, კანალიზაციის შიდა ქსელის შექმნა და არსებულის რეაბილიტაცია. დასრულების სტადიაშია საკათედრო ტაძრის და თეატრის მშენებლობა. შემდგომ სამ წელიწადში ქალაქს ექნება საერთაშორისო სტანდარტების შესაბამისი აეროპორტი. მუდმივი ძიების პროცესი ფოთის განვითარებისა ლოგიკური აპოგეისკენ მიდის… ზღვის პატარძალი მალე ზღვის დედოფალი უნდა გახდეს.”
ჩვენ “ჩხოროწყუში გადასროლამდე” რამდენიმე დღით ადრე დავუკავშირდით ფოთის მერს, ვახტანგ ლემონჯავას:
_ ბატონო ვახტანგ, როგორც გვითხრეს, მერის თანამდებობას ტოვებთ და ჩხოროწყუში მაჟორიტარ კანდიდატად იყრით კენჭს…
_ არ არის სწორი, ოფიციალურად ჯერ არაფერი მსგავსი არ ხდება.
_ ანუ თქვენ ისევ მერის თანამდებობაზე ბრძანდებით?
_ კი, ბატონო…
_ არც შვებულებაში ხართ და ამჟამადაც ასრულებთ მოვალეობას…
_ დიახ.
_ თქვენი მაჟორიტარობა არ იგეგმება?
_ ტყუილია.
თუმცა. ეს “ტყუილი” უკვე ფაქტია. წყარომ ისიც გვითხრა, რომ ლემონჯავას ფოთში დატოვება იმიტომ არ “აწყობდათ”, რომ ქალაქის “აღმშენებელი” ინდუსტრიული ზონის პროექტი ჩავარდა, პლუს ამას, ხელისუფლებამ სხვა არაპოპულარული განცხადებებიც აკეთებინა. მათგან ყველაზე გამორჩეული თვეების წინ, ფოთის პორტიდან დათხოვნილი 400 მუშა-მოსამსახურის სკანდალზე გაკეთებული “განმარტება” გახლდათ _ ფოთის მერმა მაშინ თქვა, რომ დათხოვნილთაგან 248 პენსიონერი იყოო. პორტში რომ გაცილებით მაღალი ანაზღაურება იყო და 2 წელია დაპირებულ 100-დოლარიან და რეალურად 100-ლარიან პენსიაზე მრავალჯერ მეტი, ამის შესახებ მერს აღარაფერი უთქვამს. სწორედ ამ არაპოპულარული განცხადებების გამო, მისი გზა ფოთის მერიიდან ჩხოროწყუს გავლით ან პარლამენტისკენ მიდის, ანაც საუკეთესო შემთხვევაში პროფესიულ საქმიანობას, სამედიცინო სფეროს დაუბრუნდება _ ხარისხიანი ონკოლოგი რამდენად შეძლებს “სახელისუფლო სენის განკურნებას”, ამას მოახლოებული არჩევნები გამოაჩენს.
