მმართველ პარტიას უკვე ტრადიციად ექცა პარტიული ატრიბუტიკით სახალხო დღესასწაულების გამრავალფეროვნება და ნებისმიერი თავყრილობის საკუთარ ელექტორატად გადაქცევა. თეთრ-წითელ მაისურებში ჩაცმული ახალგაზრდები შატილობაზე ამოსულ ადამიანებს პარტიულ ატრიბუტიკას ურიგებდნენ მუნიციპალიტეტის თანამშრომლების მკაცრი ზედამხედველობის ქვეშ. ასე და ამრიგად იქცნენ ნაციონალთა მხარდამჭერად ხინკლის მომხვევი ქალბატონები, ფოლკლორული ანსამბლების მომღერალ-შემსრულებლები, ხელნაკეთი ნივთებით მოვაჭრენი.
თეონა აქუბარდია, რომელიც “შატილობას” სტუმრის სტატუსით დაესწრო , “გურია ნიუსთან” საუბარში ამბობს, რომ “პარტიული ატრიბუტიკის სიმრავლემ სახალხო დღესასწაულს ხიბლი და აზრი დაუკარგა”.
საქართველოს სხვადასხვა ქალაქებიდან ნაციონალური მოძრაობის წინასაარჩევნო კამპანიაზე დასასწრებად შატილში არავინ ასულა, თუმცა ადგილობრივი მუნიციპალიტეტის თავკაცთა ახირებასთან შეგუება ყველას მოუწია.
“გურია ნიუსმა” დუშეთის მუნიციპალიტეტში სცადა სახალხო დღესასწაულზე პარტიული მაისურების დარიგების ინიციატორის პოვნა, თუმცა, როგორც მოსალოდნელი იყო, რამდენიმე გადამისამართების შემდეგ ტელეფონი საერთოდ გაგვითიშეს.
პოეტი გელა დაიაური, რომელიც შატილობის დღესასწაულს ესწრებოდა, “გურია ნიუსთან” საუბარში აცხადებს, რომ არანაირი მნიშვნელობა არა აქვს, ვის რა მაისური ეცვა იმ დღეს, რადგან “ყველანი მაინც ქართველები ვართ”: “რა მნიშვნელობა აქვს რა მაისური გაცვია? მე ბევრჯერ მითქვამს და ვამბობ, რომ მნიშვნელობა არ აქვს რა მაისური გაცვია, ყველანი ვართ ქართველები. “შატილობა” იყო არა პარტიული, არამედ სახალხო დღესასწაული. ვის რა მაისური ეცვა და ვის რა შარვალი, მაგისთვის არ მიმიქცევია ყურადღება. ნეტა, ვინ გაწვდით ეგეთ ინფორმაციებს, რა?” _ ამბობს დაიაური “გურია ნიუსთან” საუბარში.
“გურია ნიუსის” ინფორმაციით, შატილობაზე რამდენიმე ანსამბლი უკრავდა: “დები ნაყეურები”, “ქართველო”, “გენი”. იყვნენ ინდივიდუალური შემსრულებლებიც _ ფანდურა და მისი მეგობრები, სულთან ბორჩაშვილი, გიორგი ჩიტაური.
საპატრიარქოს ანსამბლ “დები გოგოჭურების” მენეჯერი იოსებ ოხანაშვილი “გურია ნიუსთან” საუბარში ამბობს, რომ შატილობაზე მის ანსამბლს ეცვა ე. წ. “ვაჟა ფშაველას მაისურები”. სახალხო დღესასწაულზე პარტიის ატრიბუტიკის გამოყენება მისთვის მიუღებელია.
თვითმხილველებმა დაინახეს, რომ პოლიციის პიკაპებში რომლებიც თავისუფალ გადაადგილებას ზღუდავდნენ, მრავლად ეწყო წითელი კეპები.
მიუხედავად იმისა, რომ პარტიების ქცევის დეკლარაციის ინიციატორი ნაციონალური მოძრაობაა, მისი წინაასარჩვენო კამპანია სულ უფრო მეტად მოდის წინააღმდეგობაში დეკლარირებულ პრინციპებთან.
