2011 წელს სოფლის მხარდამჭერი პროგრამით გასახორციელებელი სამუშაოების ჩასატარებლად, სოფელ შრომასა და მის თემში შემავალი სოფლებისთვის 85 958 ლარი გამოიყო; აქედან, შრომას 13 331 ლარი ერგო მემორიალის რეაბილიტაციის, ხანძარსაწინააღმდეგო სახის სამუშაოების, შიდა გზების რემონტის, ადმინისტრაციული შენობის მოაჯირების მოწყობის, ავზის აღდგენის, მოსაცდელის მოწყობის, კომპიუტერული ტექნიკის შეძენის მიზნით.
2011 წელს, სოფლის მხარდამჭერი პროგრამით, სოფელ შრომის ცენტრის კეთილმოწყობისთვის დაიხარჯა 3 703 ლარი, ადმინისტრაციული შენობის მოაჯირების მოწყობისთვის _ 871 ლარი, შრომის ცენტრში 
მდებარე ავზის რემონტისთვის _ 806 ლარი, მოსაცდელის მოწყობისთვის _ 3583 ლარი, კომპიუტერული ტექნიკის შეძენისთვის _ 425 ლარი, გზების რემონტისთვის კი _ 4 555.
თუმცა, იქ მისულ "გურია ნიუსის" ჟურნალისტებს რეალურად სულ სხვა სურათი დაგვხვდა.
ოზურგეთის მუნიციპალიტეტის სოფელ შრომის ტერიტორიული ერთეულის სპეციალისტი, კახა ქადეიშვილი "გურია ნიუსთან" სოფლის უმთავრეს პრობლემად უგზოობას და აბონენტთა გამრიცხველიანებას ასახელებს: _ სოფელს არ მიეწოდება ცენტრალური წყალი. თითქმის, ყველა ოჯახს აქვს ინდივიდუალური ჭა. ასევე ერთ-ერთ პრობლემად შეიძლება ჩაითვალოს ის, რომ სოფელში არ არის გაზი; არაა ინდივიდუალური გამრიცხველიანება და საჭიროა გზის კაპიტალური რემონტი. ესენი სოფლის უმთავრესი პრობლემებია, რომლებიც უმოკლეს დროში აუცილებლად მოგვარდება და გადაიჭრება.
_ ბატონო კახა, სოფელ შრომის კეთილმოწყობისთვის დაიხარჯა 3703 ლარი, რა სამუშაოები ჩატარდა კონკრეტულად? გზა ისევ ავარიულ მდგომარეობაშია, წყლის ავზი უფუნქციოდაა, ცენტრში მდებარე შენობების ფასადები შეუღებავია…
_ ცენტრის კეთილმოწყობაში იგულისხმება სამამულო ომში დაღუპულთა მემორიალის მოაჯირის გაკეთება, ასევე ადმინისტრაციული შენობის მოაჯირის გაკეთება, წყლის ავზი ამოვწმინდეთ.
_ რა თანხაა დახარჯული წყლის ავზის შესაკეთებლად?
_ კონკრეტულ თანხებს ვერ გეტყვით, არ მახსოვს ზუსტი ციფრი. ეს არის სახანძრო ავზი. ამოიწმინდა ჭაობი. აქ დასაქმებული იყო 3-4 ადამიანი.
_ ბატონო კახა, სად გაკეთდა ადმინისტრაციული შენობის რემონტი?
_ აი, შეხედეთ, რკინის მოაჯირები გავაკეთეთ ისე, როგორც მემორიალზე. სამი მოაჯირი გაკეთდა.
_ მოაჯირის შეკეთებაში რამდენი გადაიხადეთ?
_ ხომ გითხარით, ციფრები არ მახსოვს-მეთქი. რომ მცოდნოდა, წინასწარ რაღაცას მოვიფიქრებდი, ჩამოვწერდი, სად და რამდენი დაიხარჯა. ან მომეცით საშუალება, რომ მოვნახო და ჩავიხედო აქტებში.
_ ბატონო კახა, გზების რემონტისთვის გამოყოფილი იყო 4 555 ლარი. ცენტრში ვხედავთ, რომ გზა ძალიან დაზიანებულია…
_ როგორც ხედავთ, ჩვენთან არის ღორღი. ეს ძლიერი წვიმების შედეგად ჩამოირეცხა. ამ გზას სჭირდება ყოველწლიური რეაბილიტაცია. ახლა დაგეგმილია ურეკი-ნატანების გზის კაპიტალური რემონტი. მალე დაიწყება მოასფალტება. გზის რემონტთან დაკავშირებით, გეტყვით, რომ არც ერთხელ კაპიტალურად არ გაკეთებულა, უბრალოდ, შეკეთდა და როგორ დაგიმტკიცოთ ახლა, გაკეთებულია თუ არა?
_ იცით თუ არა შრომაში, სოფლის მხარდამჭერი პროგრამით გახორციელებული სამუშაოების შესახებ? რამდენი ლარია დახარჯული თითოეულის შესასრულებლად და ესწრებოდით თუ არა კრებას, სადაც სოფლისთვის სასიცოცხლოდ მნიშვნელოვანი პრიორიტეტები დასახელდა? _ ამ კითხვებით მიმართა "გურია ნიუსმა" შრომის მცხოვრებლებს, რომელთა უმრავლესობამ გვითხრა, რომ კრებას იმის გამო არ ესწრებოდნენ, რომ მათთვის არავის შეუტყობინებია. რამდენიმე მათგანმა საერთოდ არ ისურვა ჩვენთან ამ თემაზე საუბარი; რამდენიმემ კი უმთავრეს პრობლემად უგზოობა და გამრიცხველიანება დაასახელა. ერთ-ერთმა პედაგოგმა გვითხრა, რომ დღეს ცხოვრება უფრო გაუმჯობესებულია, ვიდრე რამდენიმე წლის წინ იყო: _ ჩვენ გვაინტერესებს, რაც გასაკეთებელია ის თუ გაკეთდება და როდის, როდის გვექნება გზა? როდის გვექნება ინდივიდუალური გამრიცხველიანება? გვეღირსება გაზი? გამრიცხველიანება რომ არ არის ამხელა სოფელში, დავალიანების გამო მეზობლები ერთმანეთს გადაკიდებულები ვართ, ეს საქმეა? ანდა პრიორიტეტებს ვინ უყურებს? _ გვითხრა ერთ-ერთმა პედაგოგმა.
როსტომ კვაჭანტირაძე: _ არ ვიცი ზუსტად. ვიცი, რომ სადღაც გზები გაკეთდა, მოსაცდელები, სტადიონები. რამდენი ლარია დახარჯული, ეს მე რა ვიცი, ვინ მეტყვის?! სად მოვიკითხო, გლეხი ვარ, ასე თქვეს, 30 მეტრის სიგრძის გზაზე 9 ათასი ლარია დახარჯულიო. გაკეთებულს რას ვხედავ და ცენტრში მოაჯირები გააკეთეს, თხები რომ არ შევიდეს შენობაში. არც კრებაზე ვყოფილვარ არასდროს, არც გამიგია, თორემ რატომ არ დავესწრებოდი? პრობლემების მეტი რაა _ გზა არაა, წყალი არაა, ყანა ვერ დავთესეთ, სასუქი ვერ ვიყიდეთ, რა ვიცი, რომელი პრობლემა ჩამოგითვალოთ.
ლამარა კაჭარავა: _ დანგრეული და დაქცეულია, ისედაც ხრიოკი გზებია… თუ კითხულობს ვინმე სოფლის მეურნეობის დარგში რა ხდება, რითი ვსულდგმულობთ? ეს არის ყანა და ციტრუსი. სამი წელია, სოფლის პროექტები კეთდება, სასაფლაოზე მიცვალებული ვერ ჩაგვყავს, გამგებელს დავურეკე და ვუთხარი, არ გვინდა მოსაცდელები, რა ჭირად გვინდა ადგილი, სადაც ძროხების მეტი არავინ ჩერდება? ეკლესიასთან ერთი ნათურა დაგვამადლეს _ მაგათ რატომღაც თავისი ბიუჯეტი ჰგონიათ ეგ და თავისი ჭკუით ხარჯავენ. ვინ გაგაგებინებს, რაშია დახარჯული ეგ თანხა? პასუხს გაგცემს ვინმე?
გელა ბოლქვაძე: _ სტადიონი რომ გაკეთდა, ვიცი და ისიც არაა დამთავრებული. კრებას არ დავსწრებივარ, არ ვიცი, როდის ჩატარდა. თანხას ვერ გეტყვით, რამდენი ლარია დახარჯული. ცენტრი არის კეთილმოწყობილი? _ კეთილმოწყობილი არა და ნაომარს კი ჰგავს.
ნანა სამხარაძე, პედაგოგი: _ ვიცნობ სოფლის პროექტებს, სპორტული დარბაზი გაკეთდა და კმაყოფილი ვარ. რაც შეიძლებოდა გაკეთებულიყო, გაკეთდა. რაც კარგი გაკეთდება, ძალიან კარგია. რა აუცილებელია, რომ თითოეულმა იცოდეს, რაში დაიხარჯა თითოეული თეთრი?! ყველაფერი გაკეთდა, ვიცი, რომ ნამდვილად მუშაობენ. რა პრობლემებია სოფელში? შედარება არაა, ისე უკეთესად ვცხოვრობთ, რამდენიმე წლის წინ საკვების ფული არ გვქონდა. მოსკოვი ერთ დღეს არ აშენებულა და იმედი მაქვს, რომ გზაც მალე გაკეთდება კაპიტალურად.
