გენერალური აუდიტორის ბრძანება ბეჭდურ მედიაზეც გავრცელდა.
„რეგიონალური მედიის ასოციაცია“ და გაზეთი „გურია ნიუსი“ ერთ კვირაზე მეტია ამაოდ ცდილობს დაადგინოს, კონკრეტულად რომელი მედიასაშუალებები მოხვდენ ახალ რეგულაციაში. გაუგებრობა კი იმან გამოიწვია, რომ სხვადასხვა უწყებები განსხვავებულად განმარტავენ ახალ კანონს.
მედიაზე კონტროლს ერთდროულად ორი უწყება _ სახელმწიფო აუდიტის სამსახური და კომუნიკაციების ეროვნული კომისია ახორციელებს.
კომისიის ვებგვერდი ახალი რეგულაციების შესახებ ამომწურავ ინფორმაციას იძლევა, ჟურნალისტების შეკითხვებს პასუხობს პრესსამსახურიც. ეროვნული კომუნიკაციების კომისიამ 15 აგვისტოს დადგენილებაში მიუთითა, რომ წინასაარჩევნო რეგულაციები ეხება მხოლოდ ცენტრალური და ადგილობრივი ბიუჯეტიდან დაფინანსებულ მედიასაშუალებებს და ორგანიზაციის ვებგვერდზე იმ გამოცემების სიაც გამოაქვეყნა, რომლებიც ბიუჯეტიდან ფინასდებიან. 16 აგვისტოსთვის აღნიშნული სია 14 სუბიექტისაგან შედგებოდა, მათი რიცხვი ყოველდღიურად იზრდება და დღეს 34 მედიასაშულებას აერთიანებს.
რაც შეეხება აუდიტის სამსახურს,მისი ვებგვერდი არანაირ ინფორმაციას არ აწვდის დაინტერესებულ ორგანიზაციებს, პრესსამსახურისაგან კომენტარის მიღება კი გადაულახავ სირთულეს წარმოადგენს.
„გურია ნიუსი“ და „რეგიონული მედიის ასოციაცია“ დღეს დილიდან ცდილობენ გაარკვიონ ეხება თუ არა ახალი რეგულაციები იმ მედიასაშუალებებს, რომლებიც ბიუჯეტიდან არ ფინანსდებიან. ვებგვერდზე მითითებელ ტელეფონის ნომრებზე ან არავინ პასუხობს, ან კომპეტენტურ პირთან არ ვხვდებით ან გადამისამართების შემდეგ ოთახში არ აღმოჩნდება ამ საკითხში გარკვეული თანამშრომელი.
საგულისხმოა, რომ გენერალური აუდიტორის ბრძანება დაფინანსების წყაროებზე არაფერს ამბობს და შესაბამისად, ამ უწყებას ნებისმიერი მედიასაშუალების დაჯარიმება შეუძლია. მცდელობის მიუხედავად, მედიასაშუალებისთვის ამ დრომდე გაურკვეველია, რა ფორმით (ელექტრონული, ფოსტით )უნდა მიეწოდოს აუდიტის სამსახურს ინფორმაცია ანგარიშსწორების შესახებ. საგულისხმოა, რომ ეს ინფორმაცია 24 საათში უნდა მიეწოდოს მაკონტროლებელს.
რამდენიმე დღის წინ, სახელმწიფო აუდიტის სამსახური „გურია ნიუსთან“ საუბარში აცხადებდა, რომ გენერალური აუდიტორის ბრძანება არ ახდენდა გამოცემების დაფინანსების წყაროების მიხედვით კლასიფიცირებას და შესაბამისად, პრესსასმსახურის უფროსის ფატი მამიაშვილის განმარტებით ახალი რეგულაციები ყველა მედიასაშუალებას უნდა შეხებოდა. აღსანიშნავია, რომ პრესსამსახურის უფროსი ამ საკითხში ბოლომდე დარწმუნებული არ იყო და გადამოწმებას დაგვპირდა.
კომუნიკაციების ეროვნული კომისია აცხადებს, რომ მათ და აუდიტის სამსახურს განსხვავებული რეგულაციები აქვთ და მედია ორივეს უნდა დაემორჩილოს.
„ჩვენ მონიტორინგს ვახორციელებთ კომისიის მიერ მიღებული # 9 დადგენილების შესაბამისად. ეს არის არჩევნების პროცესში მედიის მონაწილეობისა და მისი როლის შესახებ დადგენილება და ამ დადგენილებაშია ჩამოთვლილი, რომელი მედია საშუალებები მოექცა მონიტორინგის ქვეშ. თქვენ მეკითხებით, რომ აუდიტის სამსახურს განსხვავებული რეგულაციები აქვს. დიახ, სხვადასხვა რეგულაციებია, აუდიტის სამსახურის მოთხოვნებიც უნდა გაითვალისწინოთ და კომისიის მოთხოვნებიც. თუ თქვენ არ ფინანსდებით ბიუჯეტიდან, ჩვენი მონიტორინგის ქვეშ არ ექცევით. მაგრამ უნდა გაარკვიოთ აუდიტის სამსახურის რეგულაციებში ხომ არ ხართ. ეს განსხვავებული რეგულაციებია“ _ უთხრეს „გურია ნიუსს“ კომუნიკაციების ეროვნული კომისიის პრესსამსახურში.
„გურია ნიუსისა“ და რეგიონული მედიის ასოციაციის დღევანდელი მცდელობა საკითხში გარკვეულიყო, მარცხით დასრულდა.
_ იქნებ წერილობითი ფორმით მოგვმართოთ, ასე უფრო გაარკვევთ რაღაცას _ ურჩიეს „გურია ნიუსის“ ჟურნალისტს ნაცნობმა ადამიანებმა, რომლებიც აუდიტის სამსახურში მუშაობენ.
მართალია ამ მიწერ-მოწერას დრო დასჭირდება და საკითხის გარკვევამდე შესაძლოა ჯარიმასაც გამოვკრათ ხელი, მაგრამ თავზევით გზა არ არის.
