პრიორიტეტების სიაში, სოფელში 2011 წლის 18 მარტს ჩატარებული კრების მიხედვით, დასახელებულია შიდა გზების შეკეთება, მოხრეშვა, არხის მოწყობა საყანეებში, ახალი მილხიდის მოწყობა ცენტრში, საბავშვო ბაღისა და ადმინისტრაციული შენობის შეკეთება, ამბულატორიისთვის ჭის ამოღება და წყალმომარაგების სისტემის მოწყობა, სასაფლაოს შემოღობვა ცენტრში (მე-6 ბრიგადა) და წყლის ტუმბოს შეძენა (მე-5 ბრიგადა).
მიუხედავად გარკვეული სამუშაოების შესრულებისა, არა ერთი მელექედურელი, აგრეთვე, მუნიციპალიტეტის საკრებულოს მაჟორიტარი დეპუტატი, ავთანდილ ხინთიბიძე ამბობს, რომ გამოყოფილი თანხა მიზნობრივად არ დახარჯულა, საკმაო ნაწილი წყალშია გადაყრილი და რაც მთავარია, ხალხს არავინ დაეკითხა, ნორმალურად დაედგინა პრიორიტეტები.
_ ჩვენთან ხალხს არავინ ჰკითხა, პირველ რიგში რის გაკეთება სურდა, რა იყო მთავარი. რწმუნებული ცხომელიძე და მისი მოადგილეები დადიოდნენ და ეკითხებოდნენ ასე: გსურთ საბავშვო ბაღის გაკეთება? ამ კითხვას სოფელში ვინ უპასუხებს უარყოფითად? ასეთი გამოკითხვის შედეგია ამბულატორიისთვის ამოღებული ჭა და წყალმომარაგების სისტემის გაკეთება, რაც 1 113 ლარი დაჯდა და, ფაქტობრივად, წყალში გადაყრილი ფულია, _ ამბობს დეპუტატი.
ამბულატორიას, რომელიც სოფლის ცენტრალური გზის პირას მდებარეობს, გვერდით გაუკეთეს ჭა. გზის მეორე მხარეს კი, ტერიტორიულად შედარებით მაღალ ადგილზე, მდებარეობს სოფლის სასაფლაო, იმდენად ახლოს, რომ ყოვლად დაუშვებელი უნდა ყოფილიყო მის სიახლოვეს ჭის ამოღება. ადვილი მისახვედრია, რომ მიწისქვეშა გრუნტი ადვილად ატარებს წყალს და სასაფლაოს მხრიდან, დროთა განმავლობაში, შესაძლოა, წყალი მოიწამლოს. ხინთიბიძე განმარტავს, რომ მას არავინ დაუჯერა და ჭა მაინც ამოიღეს. თითქოს, ამბულატორიის თანამშრომლებისთვის ხელის დასაბანად ამოღებული ჭა ახლა უმოქმედოა, შემოუღობავია და ირგვლივ ანტისანიტარია სუფევს.
კითხვაზე, რატომ არ მოხერხდა ხალხის შეკრება თვით დეპუტატის მიერ, ის ამბობს, რომ იყო ამის მცდელობა, მაგრამ ყური არავინ დაუგდო: _ სოფლის რწმუნებულმა დაიჩემა, მე ასე უნდა გავაკეთოო, _ ამბობს ავთანდილ ხინთიბიძე, _ ასევე სოფლის ცენტრში მდებარე სასაფლაოსაც ყოველ წელს ღობავენ _ ოთხ წელიწადში სამჯერ შეღობეს და მაინც შესაღობია. ასეთია მათი გაკეთებული, ნახეთ, შიგნით შეწიეს ღობე, რომელიც მოთავსებული იყო ერთ მეტრამდე სიმაღლის ბეტონის კედელზე. თუმცა, ახლა ისე შეწიეს შიგ მავთულბადე, რომ თხები, ბილიკისებურად დარჩენილ მონაკვეთზე, ადვილად ადიან და ხტებიან სასაფლაოს ეზოში.
რაც შეეხება სოფლის ადმინისტრაციულ შენობას, ამ ადგილზე კარიკატურული სურათი დაგვხვდა. შენობა, რომელიც დღესაც სავალალო მდგომარეობაშია, გასულ წელსაც გარემონტდა. სახურავის რემონტის ხარჯი 944 ლარით იყო განსაზღვრული. ახლა კი, 2012 წლის პროგრამით, უკვე საბავშვო ბაღს არემონტებენ. როგორც აქაურები ამბობენ, 15 სექტემბერს აქ საზეიმოდ უნდა გაიხსნას საბავშვო ბაღი, იქვე კი ერთი ოთახი, მოსახლეობის მისაღებად, სოფლის რწმუნებულისთვისაც გარემონტდება.
კითხვაზე, ახლა სად ხვდება სოფლის რწმუნებული თანასოფლელებს, მაჟორიტარი დეპუტატი ამბობს, რომ იქვე მოსაზღვრე ეზოში, მისი “ცოლოურები” ცხოვრობენ და დროებით ასე მუშაობსო(?).
რაც შეეხება საბავშვო ბაღის ეზო-გარემოს, ახლა აქ დაშლილი შენობის მასალაა მიმოფანტული. იქვე დგას ნახევრადდაშლილი პიანინო, რომლის შესახებაც, კითხვაზე, ვარგისია თუ არა ინსტრუმენტი, დეპუტატი ამბობს, რომ ისინი უვარგისად თვლიან: “ასე თუ დააგდებ, როგორ ივარგებს? ადამიანთა საოცარი უსულგულობის მაგალითია ღია ცის ქვეშ ასე დაყრილი ინვენტარი და სხვადასხვა მასალა, რაზეც გულისხმიერი ადამიანი, სხვა რომ არაფერი, ოთხიოდე მეტრი “ცელოფნის” გადაფარებას მაინც მოახერხებს, თუნდაც ის ჩინოვნიკი არ იყოს. რაც შეეხება შემოღობილ ტერიტორიას, ის ადრე ადმინისტრაციული შენობის საკუთრება იყო. ახლა კი ნაწილი გასხვისებულია ამავე სოფლის მკვიდრზე, სოსო ხინთიბიძეზე”.
_ თუ მან კანონიერად შეიძინა, ვის რა აქვს სათქმელი? ისე კი, აქ გაშლილი ეზო იყო, სხვადასხვა ხეხილით და ბავშვები თამაშობდნენ, _ ამბობენ მელექედურელები.
კურიოზულია საყანე ფართობის შეღობვის შარშანდელი ფაქტი, რომელიც სოფლის 40-მდე მკვიდრს ეკუთვნის. ხალხმა, რომელსაც სათავეში ჩაუდგა ამავე სოფლის მკვიდრი, გამოცდილი აგრონომი, მურმან ხინთიბიძე, წინასწარ ისესხა საჭირო თანხა მეზობლისგან, შეიძინეს შესაღობი მასალა და შარშან გაზაფხულზე, ხვნა-თესვის დაწყებამდე, საყანე ფართობი შეღობეს. მათ ეს გადაწყვეტილება სოფლის პროგრამის გახორციელებამდე იმიტომ მიიღეს, რომ დახვნა მოესწროთ.
_ სანამ ისინი სოფლის მხარდაჭერის პროგრამას განახორციელებდნენ, მანამ სიმინდი ამოსული იქნებოდა, შეუღობავში ხომ არ დავთესავდით? ამიტომ ვიჩქარეთ, გვიანდებოდა. მერე კი, ჟარგონით რომ ვთქვა, “გადაგვაგდეს” და ჯიბრზე არ მოგვცეს თანხა. ფული ჩემი გადასახდელი გახდა, მერე კი ხალხმა შეაგროვა. სულ 970 ლარი დაიხარჯა. საოცარი ახსნა-განმარტება მოგვცეს _ ეს კი არის თქვენი შემოღობილი, მაგრამ შემოუღობავი რომ იყო, იმის ფოტო არ გვაქვს და არ შეიძლებაო, _ ამბობს მურმან ხინთიბიძე და დასძენს: _ შრომაში მოვხუცდი, რა არ მინახავს, მაგრამ ასეთი დამოკიდებულება ადამიანების და შრომის მიმართ არ გამიგია. ეს თანხა, 970 ლარი, სოფლის მხარდაჭერის პროგრამაში მაინც გახარჯულად ჩაწერეს და ხალხმა იფიქრა, მურმანს აუღია ის ფული, ჩვენ რომ გადავიხადეთო. არადა, მოზვერი გავყიდე თავის დროზე, ის ნასესხები ფული რომ გადამეხადა, _ ამბობს ბატონი მურმანი.
“თუკი რამ კარგად გაკეთდა 2011 წლის “სოფლის მხარდამჭერი პროგრამით” მელექედურში, ეს სოფლის ცენტრში არხის გაწმენდითი სამუშაოებია, რაზეც 1 085 ლარი დაიხარჯა, საერთოდ კი შარშან სოფლის მხარდამჭერი პროგრამით გამოყოფილი თანხის _ 26 186 ლარის საკმაო ნაწილი წყალში გადაყრილია, არაეკონომიურად და არამიზნობრივად გახარჯული”, _ მიიჩნევს მაჟორიტარი დეპუტატი და იმავეს ადასტურებს არაერთი თანასოფლელიც.
ოზურგეთის მუნიციპალიტეტის სოფელ მელექედურის რწმუნებული გაგა ცხომელიძე “გურია ნიუსთან” საუბარში აღნიშნავს, რომ მაჟორიტარი დეპუტატის, ავთო ხინთიბიძის მიერ მოწოდებული ინფორმაციები სინამდვილეს არ შეესაბამება.
_ ბატონო გაგა, საბავშვო ბაღისთვის შარშანდელი რემონტი რატომ არ აღმოჩნდა საკმარისი? თან იქ ადმინისტრაციული ნაწილიც ყოფილა განთავსებული.
_ არაფერი არ გაკეთებულა იქ ისეთი. 400 ლარი იყო გამოყოფილი საბავშვო ბაღის სახურავისთვის, 10 ცალი “შიფერი” გამოვცვალეთ. ბაღს ხომ არ გავაუქმებდით და ასე ამიტომ მოვიქეცით.
_ ამბობენ, რომ 900 ლარზე მეტი დაიხარჯა შარშან სახურავისთვის. ასე წერია თქვენს პროგრამაში.
_ მე ჩემი თანხა მქონდა ნარჩენი, 200 ლარი და იმით ელექტროგაყვანილობა გავუკეთე ბავშვებს.
_ თქვენი თანხა რას ჰქვია, რა ნარჩენზე საუბრობთ?
_ იმავე სოფლის პროგრამიდან იყო. ხომ მოხდა ასეც _ თანხების შემჭიდროება. გიჟები არ ვართ, რომ ისე რაიმე დავხარჯოთ.
_ საყანე ფართობის შემოღობვაზე რას იტყვით? ხალხმა პრიორიტეტად მიიჩნია, შემოღობეს, საკუთარი, უფრო სწორად, ნასესხები ფულით და თქვენ არ დაეხმარეთ ამ 40 ოჯახს.
_ ასე არ იყო. კერძო მესაკუთრეებმა შეღობეს ფართობი. დეპუტატი თვითონ დადიოდა ფურცლებით და ამბობდა, სოფლის პროგრამა იქნებაო. მერე თქვა, ის თანხა გამოწერილი იყო და სად წავიდაო. ხომ იცით, როგორ კეთდება სოფლის პროგრამა? წინასწარ ხდება დადგენა, რა უნდა გახორციელდეს.
_ ისინი ამბობენ, რომ თქვენ ჯიბრში ჩაუდექით, რადგან მაჟორიტარი დეპუტატი “ქრისტიან-დემოკრატიული მოძრაობის” წარმომადგენელია.
_ რას ჰქვია, ჯიბრში ჩავუდექი? სულ 400 კომლია სოფელში და თუ 40 კაცს ჯიბრში ჩავუდგები, რა მინდა მე აქ? ისინი, ხარჯთაღრიცხვა რომ გაკეთდა, მერე ითხოვდნენ ფულს და ეს ასე არ ხდება.
_ რას იტყვით ამბულატორიის გვერდით გათხრილ ჭაზე?
_ ამ ჭის წყალი მხოლოდ ხელის დასაბანად ან ტუალეტისთვის თუ გამოიყენება. სასმელი დანიშნულება არ აქვს. ამიტომ გაკეთდა.
