განცხადებაში ეროვნული პლატფორმა ყურადღებას ამახვილებს მრავალფეროვანი ინფორმაციის ხელმისაწვდომობასა და მედიისა და ჟურნალისტების საქმიანობასთან დაკავშირებულ გამოწვევებზე. საქართველოს ეროვნული პლატფორმა აცხადებს მზაობას, პროცესში ჩართულობით, ხელი შეუწყოს არსებული პრობლემების გადაჭრას და მიმართავს ხელისუფლებას, ევროკავშირის ინსტიტუტებს, საქართველოში აკრედიტებულ დიპლომატიურ წარმომადგენლობებსა და საერთაშორისო ორგანიზაციებს პრიორიტეტულად განიხილონ განცხადებაში გამოკვეთილი საკითხები.
„მიმდინარე წლის 1 ოქტომბერს საქართველოში დაგეგმილი საპარლამენტო არჩევნები უმნიშვნელოვანესი ეტაპია ქვეყნის დემოკრატიული განვითარებისა და ევროკავშირთან ინტეგრაციის თვალსაზრისით. შესაბამისად, თავისუფალი და კონკურენტული საარჩევნო გარემოს უზრუნველყოფა უმთავრეს ამოცანას წარმოადგენს. ჯანსაღი მედია გარემო კი, ამ პროცესის უმნიშვნელოვანესი შემადგენელია. მიუხედავად სიტუაციის გარკვეული გაუმჯობესებისა მედიაპლურალიზმის თვალსაზრისით, მრავალფეროვან ინფორმაციაზე თანაბარი ხელმისაწვდომობა ყველა მოქალაქისათვის, ამომრჩევლისთვის კვლავ სერიოზულ გამოწვევად რჩება,“ _ ნათქვამია განცხადებაში.
განცხადების ავტორებს მიაჩნიათ,რომ საკანონმდებლო ცვლილებებით ე.წ. must carry/must offer-ის პრინციპების ამოქმედება წინასაარჩევნო პერიოდში, რომლის საფუძველზეც საკაბელო ოპერატორებმა საერთო მაუწყებლები თავიანთ პაკეტებში ჩართეს, წინ გადადგმული ნაბიჯია. თუმცა, იქვე აღნიშნავენ, რომ ეს რეგულაცია სრულად ვერ აკმაყოფილებს საზოგადოებრივ ინტერესს, რამდენადაც საკაბელო ტელევიზიების მომსახურებით შეუძლია ისარგებლოს მხოლოდ ქალაქების მაცხოვრებელთა ნაწილმა. რეგიონების მოსახლეობის უდიდესი ნაწილისათვის კი, მრავალფეროვან ინფორმაციაზე წვდომის ერთადერთ საშუალებად კვლავ სატელიტური ანტენები რჩება.
„ჩვენს შეშფოთებას იწვევს ტელეკომპანია „მაესტროს“ სატელიტური ანტენების დაყადაღების ფაქტი. აღნიშნული ქმედება მიუღებელია, რამდენადაც ზღუდავს კონსტიტუციური უფლებებისა და თავისუფლებების, მათ შორის სიტყვისა და გამოხატვის თავისუფლების, ასევე ინფორმაციის მიღებისა და გავრცელების, საკუთრების უფლების რეალიზებას და სცდება სამართლებრივ ფარგლებს. ამავდროულად, ეს გადაწყვეტილება წინააღმდეგობაშია ხელისუფლების მიერ აღიარებული must carry-ისა და must offer-ის პრინციპების სულისკვეთებასთან და დისკრიმინაციულ პირობებში აყენებს საქართველოს მოსახლეობის მნიშვნელოვან ნაწილს, რომელსაც არ გააჩნია საკაბელო მაუწყებლობაზე წვდომა. ამასთან მიგვაჩნია, რომ must carry-ისა და must offer-ის წესების მოქმედებისათვის კანონით დადგენილი ვადები, რაც გულისხმობს მის შეწყვეტას არჩევნების წინა დღეს, არაგონივრულია და სრულად ვერ ასახავს საზოგადოებრივ ინტერესს. არჩევნებთან მიმართებაში, მრავალფეროვან ინფორმაციაზე ხელმისაწვდომობა უზრუნველყოფილი უნდა იქნას განგრძობითად, ვინაიდან მას არ გააჩნია მხოლოდ ამომრჩევლის წინასაარჩევნოდ ინფორმირების ფუნქცია. პლურალისტული მედია გარემო, ამავე დროს, არის არჩევნების მთლიანი პროცესის გამჭვირვალობის და მისდამი ნდობის უზრუნველყოფის უმნიშვნელოვანესი მექანიზმი და ზოგადად, დემოკრატიული პროცესის განუყოფელი კომპონენტი,“ _ ნათქვამია განცხადებაში.
განსაკუთრებულ შეშფოთებას არასამთავრობო ორგანიზაციები ბოლო დროს ჟურნალისტების წინააღმდეგ მიმართული ძალადობისა და პროფესიული მოვალეობის შესრულებაში ხელის შეშლის ფაქტებთან დაკავშირებით გამოთქვამენ. „
„ჟურნალისტებისათვის საარჩევნო ღონისძიებებზე დასწრებისა და გაშუქებისათვის შეუფერხებელი პირობების უზრუნველყოფა, აუცილებელი წინაპირობაა იმისთვის, რომ ამომრჩეველმა მიიღოს სრულფასოვანი ინფორმაცია. ხელისუფლებისაგან მოვითხოვთ, დაუყონებლივ მიიღოს შესაბამისი ზომები, რათა უზრუნველყოს ჟურნალისტების წინააღმდეგ ძალადობის თითოეული ფაქტის სრულყოფილი გამოძიება, დააკისროს შესაბამისი პასუხისმგებლობა ძალადობის ინიციატორ და განმახორციელებელ პირებს და, ამგვარად, მოახდინოს მსგავსი ფაქტების პრევენცია“, _ აღნიშნულია გავრცელებულ განცხადებაში.
არასამთავრობო ორგანიზაციები, რომლებიც აღნიშნულ განცხადებას მხარს უჭერენ, მოუწოდებენ ხელისუფლებას ქმედითი ნაბიჯების გადადგმისაკენ მოქალაქეებისათვის მრავალფეროვან ინფორმაციაზე ხელმისაწვდომობის უზრუნველსაყოფად, მათ შორის, კერძო ტელევიზიის მიერ სატელიტური ანტენების გავრცელებაზე შეზღუდვების მოხსნის გზით.
ეროვნული პლატფორმა ეხმაურება და იზიარებს ელჩების სამუშაო ჯგუფის განცხადებას (18 აგვისტო, 2012 წელი), რომელიც ეხება საარჩევნო, მათ შორის მედია გარემოსთან დაკავშირებულ პროცესებს და გამოთქვამს მზადყოფნას, რეგულარულად მიაწოდოს ინფორმაცია საარჩევნო პროცესებზე საქართველოში აკრედიტებულ დიპლომატიურ წარმომადგენლობებს, ევროკავშირის შესაბამის ინსტიტუტებსა და საერთაშორისო ორგანიზაციებს.
