სტატისტიკის მიხედვით, მსოფლიოს ბევრ ქვეყანაში ნარკოტიკებით ზედოზირება ნარკომომხმარებელთა სიკვდილიანობის ძირითად მიზეზს წარმოადგენს. პრობლემის მაშტაბურობის მიუხედავად, სტატისტიკური მონაცემები ზედოზირების შესახებ მიახლოებითაც ვერ ასახავს რეალობას. საერთაშორისო გამოკვლევებით, ზედოზირების ყოველი 100 შემთხვევიდან დაახლოებით 50 დაზარალებულს უტარდება სპეციალიზებული სამედიცინო დახმარება, 46 დახმარებას ოჯახის წევრებისა და მეგობრებისაგან იღებს, ხოლო 4 მთავრდება ლეტალურად.
საქართველოში ზედოზირებით გარდაცვლილთა ზუსტი სტატისტიკა არ არსებობს, რაც გარკვეულწილად, ნარკომანიასთან დაკავშირებულ სტიგმას უკავშირდება. როგორც წესი, ოჯახი არასდროს ამბობს, რომ მათი ახლობლის გარდაცვალების მიზეზი ნარკოტიკებით ზედოზირება გახდა და მომხდარს სოკოთი მოწამვლას ან ინფარქტს აბრალებენ.
2010 წლის მონაცემებით, ზედოზირებით 16 ადამიანი გარდაიცვალა, თუმცა ეს ციფრი რეალობისგან ძალიან შორს დგას. ზედოზირებაში მყოფი ადამიანის შველა შესაძლებელია იმ შემთხვევაში, თუ მის გვერდით ინფორმირებული ადამიანია. დაზარალებულის გადასარჩენად მას 2 საათი აქვს.
საზოგადოებრივი გაერთიანება „ბემონის“ წარმომადგენლის, თამარ სირბილაძის განცხადებით, საქართველოში ზედოზირებით გარდაცვალების ბევრი შემთხვევა იმის გამო მოხდა, რომ ოჯახი პოლიციის შიშით, სასწრაფოს გამოძახებას მოერიდა.
სასწრაფოს, როგორც წესი, პატრული და კრიმინალური პოლიცია მოყვება, რაც ნარკომომხმარებლის დაჯარიმებით მთავრდება, პირველ ჯერზე 500 ლარით , ხოლო განმეორებით შემთხვევაში _ 2 ათასი ლარით. სამედიცინო დახმარების ექიმებს ნარკოტიკებით ზედოზირებაზე გამოძახების შემთხვევებზე პოლიციის ინფორმირებულობა ევალებათ.
„შინაგან საქმეთა მინისტრმა ვანო მერაბიშვილმა ზეპირი ინსტრუქცია გასცა იმასთან დაკავშირებით, რომ არ დაწყებულიყო სამართლებრივი დევნა ზედოზირებაში მყოფი ადამიანის და მისი ახლობლების მიმართ.თუმცა, ეს პირობა მხოლოდ თბილისის ცენტრალურ უბნებში მოქმედებდა. დღეს მინისტრი შეიცვალა, შესაბამისად, არ ვიცით რა გადაწყვეტილებას მიიღებს ახალაია და შესაბამისად, პრობლემა კვლავ გადაუჭრელია,“ _ აცხადებს ზიანის შემცირების საქართველოს ქსელის წარმომადგენელი პაატა საბელაშვილი..
ნარკოლოგთა განცხადებით, ზედოზირების პრევენციის ერთ-ერთი მთავარი პირობა არის ის, რომ კომაში ჩავარდნილი ადამიანი მარტო არ დატოვონ, თუმცა საქართველოში ხშირია შემთხვევები, როდესაც დაზარალებულის მეგობრები, ხშირ შემთხვევაში თავადაც ნარკომომხმარებლები, სასწრაფოს გამოძახების შემდეგ სახლიდან გარბიან და მოვლენებს შორიდან ადევნებენ თვალს. ყოფილა შემთხვევები, როდესაც კომაში ჩავარდნილ ადამიანი მეგობრებს პირდაპირ საავადმყოფოს კართან დაუტოვებიათ. სწორედ ასეთი, დროში გაწელილი შემთხვევები მთავრდება ლეტალურად, რადგან ზედოზირების დროს თითოულ წუთს აქვს მნიშვნელობა.
ნარკოლოგები თვლიან, რომ ლეტალური შემთხვევების შესამცირებლად აუცილებელია როგორც ნარკომომხმარებლების, ასევე სამედიცინო პერსონალის მომზადებაც, რადგან ყველა შემთხვევის დროს „ნალოქსინის“ გამოყენება მიზანშეწონილი არ არის.
„როდესაც ნალოქსინი კეთდება გვიან, ეს იწვევს ფილტვების შეშუპებას და შესაბამისად, პაციენტის სიკვდილს, დაგვიანებულ შემთხვევებში ხელოვნურ სუნთქვაზე გადაყვანაა გამოსავალი“_ აცხადებს თამარ სირბილაძე.
