ამ დროისათვის მათ ბანკების წინაშე რამდენიმე მილიონი ლარის დავალიანება ერიცხებათ.
27 ივლისს, ლაურა ღაჭავას სამკერვალო ფაბრიკამ და სს “პირიმზემ ” თბილისის საქალაქო სასამართლოში. კომპანიების გაკოტრების პროცესი წამოიწყეს. განმცხადებელთა მტკიცებით, ორგანიზაციებს არ გააჩნიათ არანაირი ქონება, ფული და შესაბამისად, საპროცესო ხარჯებსაც ვერ დაფარავენ.
7 აგვისტოს განჩინებით, სასამართლომ აღნიშნული საქმეები წარმოებაში ერთადერთი მოტივით არ მიიღო _ კომპანიებს არ გააჩნდათ საპროცესო ხარჯების გადახდის საშუალება.
სასამართლომ მიუთითა, რომ ლაურა ღაჭავას სამკერვალო ფაბრიკა და სს “პირიმზე” (ოფიციალურად “პირიმზე” აუქიონზე გაიყიდა, თუმცა როგორც ამბობენ, მყიდველი კოდუების ოჯახის ახლობელია) გაკოტრებულად გამოცხადდებიან ერთი თვის ვადაში რეგისტრაციის გაუქმების შემდეგ, თუ ამ პერიოდის განმავლობაში კრედიტორმა იმავე მოვალის მიმართ არ შეიტანა სასამართლოში განცხადება გადახდისუუნარობის შესახებ.
27 ივლისს, გაკოტრების საქმე კიდევ ერთმა კოდუამ წამოიწყო: შპს “ალსს+” დირექტორმა დავით კოდუამ სასამართლოს განცხადებით მიმართა და კომპანიის გაკოტრებულად გამოცხადება მოითხოვა. განმცხადებლის მითითებით შპს “ალსს+”-ს 943 469 ლარის დავალიანება ერიცხება, საწარმოს კი არ გააჩნია არანაირი ქონება. დავით კოდუამ სასამართლოს განუცხადა, რომ მის კომპანიას არც საპროცესო ხარჯების გადახდა შეეძლო, რის შემდეგაც სასამართლოსგან საქმის განხილვაზე უარი მიიღო.
იურისტი არჩილ კბილაშვილი “გურია ნიუსთან” საუბარში აცხადებს, რომ კომპანიის გაკოტრების ორი გზა არსებობს, პირველი სასამართლოს გზით, როდესაც კომპანიას კიდევ აქვს პოტენციალი და შესაძლებელია მისი რეაბილიტაცია, ან როდესაც გააჩნია ქონება, რომლითაც კრედიტორებს დააკმაყოფილებენ. რეგისტრაციიდან მოხსნით გაკოტრება კი, რაც კოდუებმა აირჩიეს, პირდაპირ ნიშნავს ვალების ჩამოწერას.
“როდესაც კომპანია აცხადებს, რომ არანაირი თანხა და ქონება არ გააჩნია, შესაბამისად, იქ გასაყოფიც არაფერია. თუ კრედიტორები მას 1 თვის ვადაში არ აღმოუჩენენ რაიმე ქონებას და განცხადებით არ მიმართავენ სასამართლოს, კომპანია რეგისტრაციიდან მოიხსნება და შესაბამისად, ყველა ვალი ჩამოეწერება?” _ აცხადებს არჩილ კბილაშვილი “გურია ნიუსთან” საუბარში.
დავით კოდუამ სასამართლოს განუცხადა და საჯარო რეესტრიდან შესაბამისი დოკუმენტაციაც წარმოადგინა, რომ “ალსს+”არ გააჩნდა არც უძრავი ქონება და არც სატრანსპორტო საშუალებები. შესაბამისად, კრედიტორები მისგან ვერაფერს მიიღებდნენ.
12 სექტემბერს, კანონით დადგენილი ერთთვიანი ვადა ამოიწურება და კოდუას კომპანია გაკოტრებულად გამოცხადდება, თუ რა თქმა უნდა კრედიტორმა შემთხვევით არ აღმოუჩინა ქონება.
არადა, გაკოტრებულ დავით კოდუას რამდენიმე თვის წინ საკმაოდ ამბიციური გეგმა ჰქონდა: ლუქს-კლასის სასტუმრო “ჰილტონისგან” 20-წლიანი ლიცენზიის მიღების შემდეგ, მას საქართველოში ახალი ბრენდი შემოჰყავდა , “ჰილტონი” სასტუმრო “საქართველოს” ბაზაზე გაკეთდებოდა და ამ პროექტში 10 მილიონი დოლარის ჩადება იგეგმებოდა.
გავრცელებული ინფორმაციით, დავით და ერეკლე კოდუები ფლობენ სასტუმრო საქართველოში განთავსებულ სამორინე”გრანდ საქართველოს”. აღნიშნულ სამორინეს მოწყობა, 320-კაციანი პერსონალის გადამზადება, თურქი და აზერბაიჯანელი ბიზნესმენებისთვის მოსასვენებელი ნომრების მოწყობა კოდუებს 20 მილიონი დოლარი დაუჯდათ.
დავით კოდუა ქავთარაძის ქუჩაზე მდებარე “ლეჩკომბინატში” განთავსებული სამკურნალო ცენტრ DKC-ს დირექტორია, ხოლო ცენტრის მფლობელი ლაურა ღაჭავაა. DKC რამდენიმე სადაზღვევო კომპანიას ემსახურება, მათ შორის “ალფას” და მის მიერ დაზღვეულ თავდაცვის სამინისტროს თანამშრომლებს.
თავის მხრივ, კოდუების დედა – ლაურა ღაჭავა არაერთგზის გაკოტრებული და მაინც მრავალი კომპანიის, მიწის ნაკვეთისა და შენობის მფლობელია. ლაურა ღაჭავა ფლობს “ლილო სიტის” რომელიც ლილოს ბაზრობის ახლოს, ტერმინალ “ოპიზას” გვერდით მდებარეობს; შპს “მეიდიანი 777”-ს 100%-იან წილს, შპს სამკურნალო კომბინატი ე.წ. ლეჩკომბინატის 100%-იან წილს.
2012 წლის 30 იანვარს, ლაურა ღაჭავა აფუძნებს შპს “შოფინგ თაუნ”-ს ისანი-სამგორის რაიონში და ამ სავაჭრო ცენტრში 100 % -ს ფლობს.
კოდუებს ეკუთვნით შპს “საქართველო”, რომელიც მელიქიშვილის 12-ში მდებარეობს, 2011 წლის ბოლომდე ღაჭავა აქ 100% წილს ფლობდა, 26 დეკემბერს კი, 73% ისრაელში მცხოვრებ იოსებ ფიჩხაძეს გადასცა.
შპს “ელ-ჯი”, მდებარეობს ისანი-სამგორის რაიონში, ჭირნახულის 1-ში, დაარსდა 2011 წლის სექტემბერში, 100% წილს ფლობს ლაურა ღაჭავა.
შპს “ფანტასტიკაც” ლაურა ღაჭავას მფლობელობაშია.
სამკერვალო ფაბრიკის გაკოტრების საქმის დაწყების დროისათვის, ლაურა ღაჭავა მედიასთან არ მალავდა, რომ სამკერვალო ბიზნესთან დაკავშირებით დიდი გეგმები ჰქონდა. კერძოდ, 10 აგვისტოს, comersant.ge წერდა, რომ კოდუების დედა უახლოეს მომავალში საქსოვი მანქანების შეძენას და ქართულ ბაზარზე ყველა სახის ტანსაცმლის გატანას აპირებდა: “ღაჭავას ინფორმაციით, უკვე გააფორმეს 5-წლიანი კონტრაქტი ევროპულ ბრენდ “მონკლერთან”, რომელიც საქართველოში შეკერილ ქურთუკებს უცხოეთში 1200 ევროდ ყიდის. მიმდინარე წლის ნოემბერში, სამკერვალო სახლი კონტრაქტს კიდევ ერთ მსოფლიო ბრენდ “არმანისთან” გააფორმებს”.
ლაურა ღაჭავას სამკერვალო ფაბრიკას 26 მაისის სამრეწველო გამოფენაზე ყველაზე დიდი პავილიონი ეკავა და ათასობით დამთვალიერებლის თვალში აყვავებულ სამამულო ბიზნესს განასახიერებდა.
ლაურა ღაჭავა “ქართუ ბანკის” ის ერთ-ერთი მსხვილი კრედიტორია, რომელიც არ უარყოფს დავალიანებას და აცხადებს, რომ ვალს გადაიხდის.
კოდუების დედა, რამდენიმე კომპანიას ფლობს, მათ შორისაა შპს “კავკასიის უძრავი ქონების ჯგუფი”, რომელიც ორ ფირმას – შპს “საჩოგბურთო კლუბ დინამოსა” (92%) და შპს “ბულიტებს” (8%) – ეკუთვნის. ორივე ფირმის მესაკუთრე ლაურა ღაჭავაა.
ლაურა ღაჭავას ურთიერთობა “ქართუ ბანკთან” 2010 წელს იწყება.
მის მიერ 2010 წლის 23 ივნისს დაფუძნებული შპს “კავკასიის უძრავი ქონების ჯგუფმა”, დაფუძნებიდან 2 დღეში, “ქართუ ბანკისგან” 10 მილიონი დოლარი ისესხა, აღნიშნული ვალი უზრუნველყოფილი იქნა იპოთეკით.
2011 წლის 24 ნოემბერს (3 კვირაზე უფრო მოკლე დროში მას შემდეგ, რაც პირველად ძალაში შევიდა საგადასახადო ყადაღის კანონები) შპს “კავკასიის უძრავი ქონების ჯგუფის” “ქართუ ბანკში” დაგირავებული აქტივები გადაეცა სს “პირიმზეს,” რომელიც ასევე ეკუთვნოდა ლაურა ღაჭავას.
შპს “კავკასიის უძრავი ქონების” ჯგუფსა და სს “პირიმზეს” შორის 2011 წლის 24 ნოემბრით დათარიღებული წილის ნასყიდობის ხელშეკრულების ღირებულება 12,853,978 ლარია.
“პირიმზის” მიერ “ქართუ ბანკის” აქტივების ყიდვის შემდეგ, შემოსავლების სამსახურმა მოულოდნელად “აღმოაჩინა”, რომ სს “პირიმზეს” 2005 წლიდან ჰქონდა საგადასახადო ვალდებულება 25 000 000 ლარის ოდენობით.
22 დეკემბერს, სს “პირიმზე” “ქართუ ბანკში” დატვირთული აქტივებიანად ნატურის სახით გადაეცა სახელმწიფოს.
შემდგომში, “პირიმზე” აუქციონზე გაიყიდა და როგორც ჩვენი წყარო ამბობს, “ის კოდუების სამეგობრომ შეიძინა”.
სხვათაშორის, ლაურა ღაჭავას საქმე იმ სარჩელშიც მოხვდა, რომელსაც იურიდიული კომპანია “სკადენი” საერთაშორისო არბიტრაჟში ბიძინა ივანიშვილის სახელით შეიტანს.
“ეს იყო ბანკისათვის ყველაზე მეტად უზრუნველყოფილი კრედიტი, რომელიც ხელოვნურად იქნა ჩამოშორებული ბანკისაგან. ივანიშვილისა და “ქართუ ბანკისათვის” ეს უკვე დაკარგული აქტივია. ხვალ და ზეგ რა მოხდება, ეს მხოლოდ და მხოლოდ შეფასების საგნად გამოდგება. ის ფაქტი, რომ მოხდა ამ აქტივის ხელოვნურად ჩამოშორება და მერე გაკოტრების პროცედურაში გადატანა, შესაძლოა ზიანის დამტკიცებადობის კუთხით გამოდგეს, რომ ეს იყო გამიზნული პოლიტიკა, რომელიც დაიწყო, განვითარდა და საბოლოოდ, გაკოტრების შედეგად, გამოვიდა გასუფთავებული კომპანია, რომელიც ისევ იმ პირებს ეკუთვნით,” _ აცხადებდა კბილაშვილი “გურია ნიუსთან” საუბარში.
“ქართუ ბანკში” მიიჩნევენ, რომ ლაურა ღაჭავამ ბანკს 23 მილიონი დოლარის ზარალი მიაყენა. თუმცა, პირველ ეტაპზე, ბანკი მას მხოლოდ 7 მილიონის გადახდას სთხოვდა.
“პირიმზის” ჩამორთმევამდე, ლაურა ღაჭავა შენობაში ჰოლანდიელ პარტნიორებთან ერთად, სავაჭრო ცენტრ “ევროპა პლაზას” გახსნას გეგმავდა.
გაკოტრებულია კოდუების კიდევ ერთი წარმომადგენელი გიორგი კოდუა, რომელიც აცხადებს , რომ ხელისუფლება განზრახ უშლიდა ხელს მის ავიაკომპანია SKY GEORGIA-ს და ის გაკოტრებამდე მიიყვანა. გაკოტრებულმა კოდუამ 3 თვის წინ, ახალი კომპანია Wico consultant-ი დააფუძნა, რომლის 100% წილის მფლობელია. მასვე ეკუთვნის “სქაი ლიზინგის” 81%.
არჩილ კბილაშვილი აცხადებს, რომ არსებული კანონმდებლობით, ნებისმიერ კომპანიას რომელიც გაკოტრებას გადაწყვეტს და დაამტკიცებს, რომ აღარაფერი გააჩნია, ვალები ჩამოეწერება. ეს კი მხოლოდ იმ შემთხვევაში ხდება, როდესაც კრედიტორი კერძო ბიზნესის წარმომადგენელია და არა სახელმწიფო.
“ქართუ ბანკის შემთხვევაში, სახელმწიფომ წაიღო ეს ფული, ანუ მიითვისა ლაურა ღაჭავას კუთვნილი კომპანიები იმისათვის, რომ ის “ქართუ ბანკს” არ დარჩენოდა. სახელმწიფოს არ აინტერესებს კერძო ინტერესები. ამ შემთხვევებშიც, რაზეც თქვენ მეკითხებით, სახელმწიფოს ფული რომ ყოფილიყო, ამ ადამიანებს კი არ გააკოტრებდნენ, არამედ, დაიჭერდნენ” _ აცხადებს კბილაშვილი “გურია ნიუსთან” საუბარში.
