ქეთა, გუგა, ნანუჩი, ნიკოლოზი, სანდრო, ლუკა და ანეტი … ყველაზე უფროსი 10 წლისაა, ყველაზე უმცროსი კი 5-ის.
წარმოიდგინეთ ასეთი სურათი: სახლის აივანზე დგას დიდი მრგვალი მაგიდა, ზედ მიმოფანტული ფურცლებით, გარშემო შემომსხდარი არიან პატარები, თითოეულ მათგანს ავტოკალამი აქვს ხელში, მათივე შექმნილი დოკუმენტები უწყვიათ წინ და რაც მთავარია, საუბრობენ არაბავშვური ტერმინოლოგიით, აგრესიული და გაღიზიანებული ტონით.
თამაში, რომლის მოწმეც თავად გავხდი, რამდენიმე საათის განმავლობაში გრძელდებოდა. ბავშვებს მათთვის მეტად სერიოზული და არაბავშვური როლები ჰქონდათ გადანაწილებული: ბანკის დირექტორი, ბანკის თანამშრომლები, კრედიტორი, სესხების ამომღები, მევალე…
კიდევ უფრო არაბავშვური იყო ტერმინოლოგია, რომელსაც ისინი ამ "თამაშის" დროს იყენებდნენ: "აუქციონი", "ყადაღა", "სახლის გაყიდვა", "უპროცენტო განვადება" "სესხი", "ფულის ამოღება", "ბანკის ვალი"…
ამ თამაშს (თუკი შეიძლება თამაში ეწოდოს), როგორც ბავშვებმა ამიხსნეს, სახელად "კრედიტობანა" და "ბანკობანა" ჰქვია.
თამაში სესხის გამოტანით დაიწყო და სახლებისა და მანქანების წართმევით დასრულდა! პატარები საკუთარი ოჯახების პრობლემებს თამაშობდნენ.
ეპიზოდი 1 _ სესხის გამოტანა
_ შენ სესხის გამოტანა გინდა თუ სესხის შეტანა? თუ ამ სეზონზე ვერ გადაიხდი, ხომ იცი, რომ სახლს გაგიყიდიან? თვეში 450 ლარი გექნებათ გადასახდელი, გაწყობს?
_ არა, ქსეროქსის გამოტანაც მინდა სესხით და რამდენში შეგიძლია უფრო იაფად?
_ 370 ლარში გაგიკეთებ ყველაფერს…
_ კაი, იყოს…
7 და 8 წლის ქობულეთელი ბავშვები საკრედიტო პირობაზე შეთანხმდნენ. დიალოგისა და მიღწეული შეთანხმების მოწმეც თავად გავხდი. მაგიდაზე გაშლილ რაღაც ფურცლებზე ხელიც მოაწერეს, მაგრამ ყველაფერი ამით არ დასრულებულა.
ეპიზოდი 2 _ "ფულის ამომღები"
ტილილიმ – ტილილიმ _ ტილილიმ _ ეს სატელეფონო ზარია ბანკში, რის შემდეგაც, ფულის ამომღები სამუშაოს შესასრულებლად მიდის.
სესხის ამოღების პროცედურას უცვლელად გთავაზობთ:
"თქვენ სეზონურად გქონდათ შემოტანილი… არ ვიცი ზუსტად, ეხლა გადავხედავ… (გადახედა და შემდეგ გააგრძელა. ავტ) თქვენ ძალიან დიდი დანაშაული გაქვთ. მანქანას წაგართმევთ, თუ არადა, სახლს. დავწერე განცხადებაც, რაშიც მეთანხმება დირექტორიც, ქეით ვილიამიც, რუსკა ვილიამიც, მარიამ ვილიამიც, ელენე ვილიამიც (ესენი წარმოსახვითი პერსონაჟები არიან. ავტ). აი, განცხადება, დაბეჭდილი და ბეჭედდარტყმული. შეხედეთ თქვენც, თემურ ლაზიშვილი, სესხი გამოიტანეთ 5 000 ლარი და კაპიკიც არ შემოგიტანიათ. ეხლა წამოხვალთ ბანკში, მე წავალ და 4 საათზე ბანკში იქნებით, თუ არადა, მოვალთ ყველა ჩემი წევრები და მანქანას წაგართმევთ! ბოდიშით, მანქანას თუ არა, სახლს! სამწუხაროდ, სახლი აუქციონზე გაიყიდება! ბოდიშით! მოდით, განცხადებას იქ მოგცემთ და წაიკითხეთ!"
ეპიზოდი 3 _ იაფი კრედიტი
"ბანკის დირექტორმა" გუგამ (გუგა სასულიერო გიმნაზიის მოსწავლეა) "სამეთვალყურეო" საბჭო შეკრიბა და იაფი საკრედიტო პირობების შემუშავება დაავალა. მიზანი ძალიან კეთილშობილური გახლდათ _ ხალხი გასახლების პირასაა, უნდა დავეხმაროთ. რომელი ბანკიც ("პროკრედიტ ბანკსა" და "საქართველოს ბანკს" შორის იყო შეჯიბრი) გასცემს უფრო იაფ სესხს, ის დარჩება, მეორე _ დაიხურება.
დანარჩენის მოყოლას მე აღარ გავაგრძელებ, თავად მოისმინეთ ამ აუდიოჩანაწერში, რომლის გაკეთებისთვისაც, ბოდიშს ვუხდი ამ პატარებს.
საინტერესოა, როგორ თამაშებს თამაშობენ სააკაშვილის, მერაბიშვილის, უგულავას, ადეიშვილის და ხელისუფლების მაღალჩინოსანთა შვილები?
