მიმდინარე საპარლამენტო არჩევნებიც ამ კუთხით გამონაკლისი არაა. თუ რამდენად აქტუალურია “პატიმრებით ვაჭრობის” თემა წინასაარჩევნოდ, ამის შესახებ კოალიცია “ბიძინა ივანიშვილი ქართული ოცნება”, ოზურგეთის შტაბის საარჩევნო ადმინისტრაციის სამსახურის ხელმძღვანელი ტიფო მიქატაძე ასეთ კომენტარს აკეთებს:
_ “პატიმრების თემა” როგორც ხელისუფლების საარჩევნო იარაღი, ძირითადად წინა საპარლამენტო არჩევნებისას “გამოცადეს”.
მას შემდეგ, რაც სააკაშვილს შეერყა პოზიციები და საპრეზიდენტო ბრძოლა რეალურად წააგო, “ლეგიტიმაციის” შემდეგ პარლამენტში სჭირდებოდა ძალების სერიოზული გამაგრება. “ნაციონალური მოძრაობის” უმრავლესობით გასამარჯვებლად დაიწყეს ფიქრი ისეთი საარჩევნო მანქანის შექმნაზე, რომელსაც უნდა უზრუნველყო თითოეული ხმის კონტროლი და დაცვა. იმჟამინდელი საზოგადოებრივი განწყობიდან გამომდინარე, სასურველი შედეგის მიღწევა შეუძლებელი იყო, თუ არა ხელისუფლების მხრიდან ადამიანთა იძულება (ანუ საკუთარი ნების წინააღმდეგ მოქმედება) საარჩევნო ხმების მოსაგროვებლად. სწორედ მაშინ “ნაცმოძრაობის” მამების ტვინებში გაჩნდა საარჩვენო მიზნით პატიმრებისა და სასჯელაღსრულების სისტემასთან დაკავშირებული ადამიანების გამოყენების იდეა.
საარჩევნო და იურიდიული ტერმინოლოგიით, ეს იყო ხელისუფლების მხრიდან ადმინისტრაციული, კერძოდ, ძალისმიერი რესურსების გამოყენება, რაც ნიშნავს პოლიტიკური ოპონენტების, მათი მხარდამჭერებისა და ამომრჩევლის წინააღმდეგ და მათზე უკანონო ზემოქმედებისთვის ძალადობრივი მექანიზმების გამოყენებას. ხოლო მარტივ ენაზე, რომ ვთქვათ, ეს იყო ადამიანების ბედით მანიპულირება და ვაჭრობა ძალის გამოყენებით.
პატიმრის ოჯახის წევრები, მეგობრები, იმის დაპირებით, რომ პატიმრებს სასჯელს შეუმსუბუქებდნენ ან გაათავისუფლებდნენ, ან პირიქით _ იმის შიშით, რომ მდგომარეობას დაუმძიმებდნენ, იძულებული აღმოჩნდნენ, უპირველეს ყოვლისა, ოპოზიციურად განწყობილ თანასოფლელებისა და თანაუბნელების ადამიანურ გრძნობებზე ეთამაშათ და მათგან “სამოწყალოდ” ხელისუფლებისთვის ხმები შეეგროვებინათ. ეს იყო დამამცირებელი და ღირსების შემლახველი აქცია, რომელიც მასიურად ტარდებოდა მთელი ქვეყნის მასშტაბით.
მეთოდმა წარმატებით იმუშავა, თუ გავითვალისწინებთ იმ სამარცხვინო სტატისტიკას, რომ საქართველო ერთ სულ მოსახლეზე პატიმართა რაოდენობით პირველ ადგილზეა ევროპაში.
ასე გაგრძელდა ადგილობრივი თვითმმართველობის არჩევნებისას. დანაპირების ნაწილი შეასრულეს, ნაწილი _ არა, ვიღაცა “გამოუშვეს”, ვიღაცა _ არა. ეს სტატისტიკა საინტერესოა, მაგრამ მთავარი არ არის. მთავარია, ალბათ, “პატიმრების თემა” შევაფასოთ, როგორც საარჩევნო ბრძოლის მეთოდი მისი ეფექტურობის, კანონიერებისა და მორალური თვალსაზრისით.
_ ბატონო ტიფო, თუ შეგიძლიათ, კონკრეტული ფაქტები დაგვისახელოთ?
_ ამჟამადაც, მიმდინარე საპარლამენტო არჩვენებისას, უკვე რამდენიმე ასეთი ფაქტი დაფიქსირდა. მაგალითად, დაბა ლაითურში მალხაზ თავართქილაძისა და სულიკო დარჩიძის, სოფელ ლიხაურში მერაბ ლომჯარიას, სოფელ მშვიდობაურში ლაშა უფლისაშვილის და სხვა პატიმართა საარჩევნოდ გამოყენების ფაქტები. საინტერესოა ეს უკანასკნელი შემთხვევა, როცა სოფელში, ლაშა უფლისაშვილის დედის გარდაცვალების მიზეზად ხელისუფლების მხრიდან დაპირების შეუსრულებლობასა და ქალბატონის განცდასა და ნერვიულობას ასახელებენ. სულ რამდენიმე დღის წინ კი ჩვენთვის ცნობილი გახდა სოფელ ციხისფერდში ანალოგიური ზეწოლების შესახებ. კონკრეტულად კი პატიმრების, ხვიჩა თავდიშვილისა და თორნიკე თავდიშვილის ხელისუფლების მხრიდან საარჩევნო მიზნებისთვის გამოყენების შესახებ. ასევე, სოფელ მერიაში პატიმრის ლაშა ეგნატიევის ოჯახზეც.
ის, რომ აქამდე “პატიმრების თემა” ქმედითი აღმოჩნდა, ზემოთ უკვე ვთქვი, თუმცა, მისი ეფექტი თანდათან ქრება. დაბეჯითებით შეიძლება ითქვას, რომ ამჯერად საზოგადოებას სრულად აქვს ეს გათვითცნობიერებული, რომ “პატიმრების აქციაში” მონაწილეობა უკანონობასთან, სამოქალაქო უპასუხისმგებლობასთან და უზნეობასთან არის დაკავშირებული. ამჯერად კი, ხელისუფლების მიერ გამოგონილი და შექმნილი ყველა მახინჯი საარჩევნო მანქანა და ტექნოლოგია მხოლოდ მის წინააღმდეგ არის მიმართული.
ჩვენ ვფლობთ სრულ ინფორმაციას ბოლო წლებში პატიმრებით მანიპულირების თითოეული ფაქტის შესახებ. ყველა ამ შემთხვევას თავისი ინიციატორი და ორგანიზატორი ჰყავს. მაგალითად, ჩვენი ინფორმაციით, სოფელ ციხისფერდში ზემოთ ნახსენებ “პატიმართა აქციას” “ნაცმოძრაობის” აქტივისტები _ ყოფილი პოლიციელი გელა მუჯირი (რომელიც სულ რაღაც ორი თვეა რაც გაათავისუფლეს) და სკოლის დირექტორი (ამავე დროს საუბნო საარჩევნო კომისიის თავმჯდომარე) ბადრი მუჯირი ხელმძღვანელობენ.
თითოეულ ორგანიზატორსა და შემსრულებელს ძალიან მალე მოუწევთ პირისპირ დგომა თავისი თანასოფლელებისა და კანონის წინაშე და გულახდილად ვურჩევდი, რომ ჩამოცილდნენ ამ კამპანიას. მათ კიდევ რჩებათ რამდენიმე დღე შეცდომის აღიარებისა და გამოსწორებისათვის.
“გურია ნიუსი” აღნიშნული ინფორმაციების გადასამოწმებლად ოზურგეთის მუნიციპალიტეტის სოფელ ციხისფერდის საშუალო სკოლის დირექტორს და ამავე უბანში საუბნო საარჩევნო კომისიის თავმჯდომარეს ბადრი მუჯირს დაუკავშირდა.
_ ბატონო ბადრი, კოალიცია “ქართული ოცნების” ოზურგეთის შტაბის წარმომადგენლები აცხადებენ, რომ თქვენ სოფელ ციხისფერდში პატიმრების _ შალვა და თორნიკე თავდიშვილების ოჯახებს, მათ თავისუფლების სანაცვლოდ, არჩევნებში ხმების შეგროვებას სთხოვთ. ადასტურებთ თუ არა ამ ინფორმაციას?
_ რომ ვთქვა, რომ წარმოდგენა არ მაქვს მათზე,-მეთქი, არ იქნება სიმართლე, რა თქმა უნდა, ვფლობ ინფორმაციას მათი ოჯახური მდგომარეობის შესახებ. მათ მისჯილი აქვთ პატიმრობა, თუმცა, ის რომ წინა საარჩევნოდ მე მათ ოჯახებს რაიმე ვთხოვე ან შევთავაზე, ამ ინფორმაციას გამოვრიცხავ. არ ვადასტურებ ნამდვილად, _ გვითხრა ბადრი მუჯირმა.
“გურია ნიუსი” მთელი დღის განმავლობაში ცდილობდა უკვე ყოფილი პოლიციელისთვის გელა მუჯირთან დაკავშირებას, თუმცა ეს ვერანაირად ვერ მოვახერხეთ _ მან ჩვენ სატელეფონო ზარებს არ უპასუხა.
