შინაგან პროტესტს, რასაც ხელისუფლების ქმედებები იწვევდა მასში, მხოლოდ პირად საუბრებში აფიქსირებდა, მაგრამ პატიმართა წამების აღმაშფოთებელი კადრების ჩვენება მისთვის ის ზღვარი აღმოჩნდა, როცა, მისი თქმით, დუმილი დანაშაულად ითვლება.
მას სურდა საკუთარი პოზიცია ისე დაეფიქსირებინა, ოპოზიციური პოლიტიკური პარტიების პრესკონფერენციებზე არ გამოჩენილიყო. ამიტომ გადაწყვიტა პირადი აზრი გაზეთ ,,გურია ნიუსის’’ საშუალებით გაესაჯაროებინა და საკუთარი დამოკიდებულება გამოეხატა ძალადობისა და საჯარო მოსამსახურეებზე ზეწოლის მოხდენის მცდელობების მიმართ:
,,დიდი ხანია პროტესტის განცდა მაწუხებს, მაგრამ მას შემდეგ რაც ეს საზარელი კადრები ვნახე, განადგურებული ვარ. მინდოდა ხმამაღლა გამომეხატა ჩემი აღშფოთება, რაღაც გამეკეთებინა, მაგრამ ჩემი შინაგანი მდგომარეობა არ მაძლევდა ამის საშუალებას. ლანჩხუთში ბიძინა ივანიშვილის შეხვედრაზეც კი მივედი, მაგრამ საჯარო გამოსვლებს არ ვარ ჩვეული და ვერ გავბედე აუდიტორიის წინაშე გამომეხატა ჩემი წუხილი. ვერც ,,ქართული ოცნების’’ შტაბში მივედი, რადგან არასოდეს არც ერთი პოლიტიკური პარტიის წევრი არ ვყოფილვარ და არც პოლიტიკური განცხადებების გაკეთება მეხერხება. ამიტომ გამოსავალი მოვძებნე და იმ მედიასაშუალებას მივმართე, რომელსაც ვენდობი. ძალიან მინდა ჩემი გულისტკივილი და პროტესტი დავანახო ჩემს თანამოქალაქეებს და ხმამაღლა ვთქვა იმ უმსგავსობებზე, რასაც უსიამოვნო სიურპრიზებად გვიმზადებს ხელისუფლება,’’ _ აშკარად აფიქსირებს აზრს საჯარო მოხელე. მას არც შიშის განცდა აქვს იმის გამო, რომ საჯარო განცხადებების შემდეგ სამსახურს დაკარგავს. ადგილობრივ ხელისუფლებაში იციან მისი დამოკიდებულებისა და საპროტესტო განწყობის შესახებ და სამთავრობო სახალხო შეხვედრებზე არ ეპატიჟებიან. არც დღეს შეუტანიათ მისი გვარი თბილისში წამსვლელთა სიაში.
ეს სია გამგეობიდან გადაეცა კულტურის სახლის ადმინისტრაციას. მასში ვერ მოხვდნენ კულტურის ცენტრის დირექტორი სოფიკო ჭელიძე და მისი მოადგილეები. ეტყობა, ამის მიზეზი რამოდენიმე დღის წინ მომხდარი ფაქტი აღმოჩნდა. როგორც ჩვენთვის გახდა ცნობილი, სოფიკო ჭელიძემ თანამდებობის დატოვებასთან დაკავშირებით განცხადება დაწერა, მაგრამ გამგეობის კულტურისა და ძეგლთა დაცვის სამსახურის უფროსმა ეს განცხადება არ დააკმაყოფილა. არჩევნებამდე რამოდენიმე დღით ადრე, კულტურის ცენტრის დირექტორის საკუთარი ნებით წასვლა თანამდებობიდან, ადგილობრივი მთავრობისთვის დიდი დარტყმა იქნებოდა. ამ სიაში არც ცნობილი ლანჩხუთელი პროტესტანტის, კულტურის ცენტრის განყოფილების გამგის მაია ჩხაიძის გვარი ფიგურირებდა. როგორც მზია რამიშვილი ამბობს, სიაში ამ ორგანიზაციის ისეთი რიგითი თანამშრომლები იყვნენ შეყვანილი, რომლებიც განსაკუთრებული საპროტესტო განწყობით არ გამოირჩევიან.
