გიორგი ჩემიას სავარაუდოდ სასამართლოს დატოვება მოუწევს არა იმიტომ, რომ ის მართლაც უარესია თავის კოლეგებზე, უბრალოდ, მას სანდრო გირგვლიანი საქმის განხილვა არგუნა ბედმა, საქმის, რომელიც ქართული მართლმსაჯულების უდიდეს სირცხვილად იქცა.
გიორგი ჩემიას სახელს თითქმის ყველა სატელევიზიო და საგაზეთო ინტერვიუში ახსენებს იუსტიციის მომავალი მინისტრი თეა წულუკიანი. for.ge-ს პრესკლუბში მედიის წარმომადგენლებთან შეხვედრისას თეა წულუკიანმა განაცხადა:
“მოსამართლეების ის 90% მყავს მხედველობაში, რომლებიც მართლაც კომპეტენტურები არიან, ალბათ ბევრი საქმე არც თუ ისე კარგად განუხილავთ, მაგრამ მათთვის წნეხის მოხსნის შემთხვევაში, შეიძლება მათგან მივიღოთ დამოუკიდებელი მოსამართლეები. რაც შეეხება მოსამართლეების დანარჩენ 10%-ს, რომლებმაც საზოგადოებისთვის და ქვეყნისთვის სამარცხვინო გადაწყვეტილებები მიიღეს, ამ მოსამართლეებს მე ვურჩიე (და ჯერჯერობით მეტს არაფერს ვიტყვი), საკუთარ სინდისთან მარტო დარჩნენ, მანამ, სანამ დროა“.
მოსამართლე გიორგი ჩემია სწორედ იმ 10%-ში მოხვდა, რომელსაც “საკუთარ სინდისთან მარტო დარჩენა მოუწევს”. დანარჩენ 90% -ს იმედი აქვს, რომ სტატუსს და მოსამართლის პრივილეგიებს შეინარჩუნებს და ამიტომაც ჩემიას და ზოგადად სასამართლოს ავტორიტეტის დაცვას დუმილს ამჯობინებს. გიორგი ჩემიას დაცვა არ უცდია არც უზენაესი სასამართლოს თავმჯდომარე კოტე კუბლაშვილს, რომელიც ამავდროულად იუსტიციის უმაღლეს საბჭოს ხელმძღვანელობს. ჩემიას და, ზოგადად, შელანძღულ სასამართლოს არც მოსამართლეთა ასოციაცია გამოსარჩლებია.
“გურია ნიუსი” რამდენიმე დღეა, ცდილობს დაადგინოს, არის თუ არა მოსამართლეების დუმილი თანხმობის ნიშანი ყველა იმ ბრალდებაზე, რაც მათ “ქართულმა ოცნებამ” წაუყენა.
მოქმედი მოსამართლეები, მათ შორის, ისინიც, ვისაც ჩემიასთან მეგობრობა აკავშირებთ, ღია კომენტარზე უარს ამბობენ. პირად საუბრებში კი აცხადებენ, რომ გიორგი ჩემიას არსებული კანონმდებლობის პირობებში არაფრის გაკეთება არ შეეძლო. მან განსასჯელებს მაქსიმალური სასჯელები მიუსაჯა და ის ვერ იმსჯელებდა მკვლელობის დამკვეთებზე _ ახალაიაზე, დონაძეზე და სხვებზე. საქმეს ვერც გამოძიებაში დააბრუნებდა, რადგან ახალმა კანონმდებლობამ მოსამართლეს ამის უფლება წაართვა.
შეიძლება გირგვლიანის საქმეზე გამოტანილი განაჩენი არ იყო სამართლიანი, მაგრამ იყო კანონიერი _ ასეთია მოქმედი მოსამართლეების პოზიცია.
“გურია ნიუსი” მოსამართლეთა ასოციაციის თავმჯდომარე ზაზა მეიშვილს უკავშირდება, რომელიც ამავდროულადა უზენაესის სასამართლოს თავმჯდომარის პირველი მოადგილე და სისხლის სამართლის საქმეთა პალატის თავმჯდომარეა. “გურია ნიუსის” კითხვას, რატომ დუმს მოსამართლეთა ასოციაცია და არ იცავს საკუთარ წევრებს, მეიშვილი ჩინოვნიკისთვის ჩვეული ფრაზით პასუხობს: “მიმართეთ პრესცენტრს. ისინი გაგცემენ პასუხს.”
უზენაესი სასამართლოს პრესსამსახურის ხელმძღვანელი ნანა ვასაძე აცხადებს, რომ ჯერჯერობით ამ საკითხთან დაკავშირებით განცხადების გაკეთება არ იგეგმება.
“გურია ნიუსი” ცდილობს მოსამართლეთა ასოციაციაში, ყოფილი მოსამართლეებისგან მაინც მოისმინოს იმის შეფასება, თუ რამდენად სამართლიანია მოსამართლეთა კრიტიკა და არის თუ არა მოსამართლე ჩემია “სამარცხვინო გადაწყვეტილების”ავტორი.
“პენსიონერი ვარ, უკეთესი იქნება, თუ ამ კითხვას მოქმედ მოსამართლეებს დაუსვამთ. არ იქნება სწორი, თუ ახალგაზრდა კოლეგების მოღვაწეობას შევაფასებთ,” _ გვეუბნება ყოფილი მოსამართლე და გვარწმუნებს, აზრი ისევ მოქმედ მოსამართლეებს ვკითხოთ.
მომავალი იუსტიციის მინისტრი თეა წულუკიანი აცხადებს, რომ მისი პრიორიტეტი ამ ხელისუფლების მიერ გაფუჭებული საქმის გამოსწორება იქნება ანუ ყველა იმ საქმის ხელახლა გამოძიება, რაც პოლიტიზირებულმა პროკურატურამ არასწორად გამოიძია და რაზედაც ასევე პოლიტიზირებულმა სასამართლომ არაობიექტური განაჩენი დაადგინა. თეა წულუკიანი ამ საქმეებს მხოლოდ სამართლიან სასამართლოს ანდობს. ვინ იქნებიან ამ სასამართლოს წევრები, ჯერჯერობით, უცნობია. საზოგადოების ერთი ნაწილი მიიჩნევს, რომ შეუძლებელია იმ მოსამართლეების მენტალობის შეცვლა, რომლებიც წლების განმავლობაში ლოიალურები იყვნენ ხელისუფლების მიმართ და განაჩენი პროკურორთან შეთანხმებით გამოჰქონდათ. თეა წულუკიანი ფიქრობს, რომ დღეს მოქმედ მოსამართლეთა 90% შენარჩუნება მაინც შეიძლება.
მოქმედი მოსამართლეების გარდა მოსამართლეთა რეზერვში დღეისათვის 26 მოსამართლე ირიცხება, ეს ის მოსამართლეები არიან, რომლებიც “ვარდების რევოლუციით” მოსულმა სააკაშვილმა თანამდებობიდან გაათავისუფლა და რეზერვში ჩარიცხა. ამიტომ შესაძლებელია, რომ მომავალში მოსამართლეთა ვაკანტურად დარჩენილი ადგილები სწორედ რეზერვიდან შეივსოს.
თეა წულუკიანმა for.ge-ს პრესკლუბში სულხან მოლაშვილის საქმეც ახსენა. ეჭვგარეშეა, რომ ამ საქმის განმხილველ მოსამართლესაც მოუწევს პასუხისგება. გარდა ამისა, საქართველოს მომავალ პრემიერ-მინისტრს გადაწყვეტილი აქვს, პირადად უჩივლოს მოსამართლეს, “რომელმაც ორ საათში უკანონო გადაწყვეტილება გამოიტანა.” სავარაუდოდ, საუბარია ნანა დარასელიაზე, რომელმაც ივანიშვილს რამდენიმე მილიონის ჯარიმა დააკისრა.
“ქართული ოცნების” წარმომადგენლები ამბობენ, რომ პროკურატურა მსგავს საქმეებს ყველა მოსამართლეს არ ანდობდა და მათ ამისათვის სპეციალური კადრი ჰყავდათ ყველა სასამართლოში. სწორედ ამ ადამიანებს ურჩევს მომავალი იუსტიციის მინისტრი, “მარტო დარჩნენ საკუთარ თავან” და თავად მიიღონ გადაწყვეტილება.
