_ ბატონო დავით, რა გეგმები გაქვთ რეგიონული სამინისტროს რეორგანიზაციასთან დაკავშირებით?
_ რეგიონული განვითარების და ინფრასტრუქტურის სამინისტრო ერთ-ერთი მსხვილი უწყება იყო. 2012 წელს მას დაახლოებით ერთ მილიარდ ლარამდე ბიუჯეტი გააჩნია. ინფრასტრუქტურასთან დაკავშირებული პროექტებისა და პროგრამების დიდი ნაწილი უცხოური კრედიტებით ხორციელდებოდა.
ბევრი პროექტი აქვს ამ სამინისტროს დაწყებული და გარკვეული ნაწილი დასრულებულია. რადგან გადაწყვეტილება იქნა მიღებული განხორციელდეს ამ სამინისტროს რეორგანიზაცია, მნიშვნელოვანია ყველაფერი წარიმართოს ისე, რომ არ შეჩერდეს და გაგრძელდეს ის საქმეები, რაც დაწყებულია. ახალი პროექტები უნდა გადაისინჯოს. ეკონომიკის განვითარების ახალმა მინისტრმა და მის დაქვემდებარებაში მყოფმა გუნდმა უნდა გააკეთოს ეს ყველაფერი. რაც შეეხება ჩემს ფუნქციებს, ვფიქრობ, ჩამოყალიბდება სამუშაო ჯგუფი და პროცედურების სრული დაცვით მოხდება რეორგანიზაციასთან დაკავშირებული საკითხების გადაწყვეტა. ანუ ინფრასტრუქტურის პროექტები მიუერთდება ეკონომიკისა და მდგრადი განვითარების სამინისტროს. რეგიონალურ განვითარებასთან და თვითმმართველობასთან დაკავშირებულ საკითხებზე ცალკე სამსახური ჩამოყალიბდება, რომელიც საქართველოს პრემიერ-მინისტრს დაექვემდებარება.
_ რამდენად მტკივნეული იქნება სამინისტროს რეორგანიზაცია თანამშრომლებისთვის, რადიკალურ ცვლილებებს გეგმავთ?
_ ეს დიდი სამინისტროა, სადაც ძალიან ბევრი მიმართულებაა. იქ არის სამინისტროს შიდა აპარატი, ცალკე სახელმწიფოს მიერ დაფუძნებული კომპანიები, საჯარო სამართლის იურიდიული პირები. აქედან გამომდინარე, მე არ ვარ მომხრე, რომ ადამიანები სამსახურიდან დავითხოვო. “ქართული ოცნების” პოლიტიკური გადაწყვეტილებაა, ყველა პროფესიონალმა სამსახური შეინარჩუნოს და მე ყველაფერს გავაკეთებ ამისთვის. ადამიანები, რომლებიც შეიძლება საკუთარი სურვილით წავიდნენ ან სხვაგან აქვთ მუშაობის სურვილი, მათ ხელს არ შევუშლით. რეორგანიზაცია ყოველთვის რაღაც გადაჯგუფებებთან არის დაკავშირებული. საკადრო საკითხები უფრო მუშა პროცესის შედეგად გაირკვევა და ჩამოყალიბდება.
მე დღეს გამიჭირდება ზუსტი პასუხის გაცემა უშუალოდ საკადრო საკითხებთან დაკავშირებით. მაგრამ რაც დაწყებულია და ჩვენი გუნდი თვლის, რომ კარგი და მნიშვნელოვანი პროექტებია, ასეთი პროექტები გაგრძელდება. რამდენიმე პროექტთან დაკავშირებით, კითხვის ნიშნები დაისმება. მაგალითად, ეს არის “ლაზიკა”. მე რამდენადაც ვიცი, მიღებულია გადაწყვეტილება მის შეჩერებასთან დაკავშირებით. ყოველი შემთხვევისთვის, ვნახავ რა იყო რეგიონული განვითარების სამინისტროს როლი, მოვითხოვ პროექტს და ვნახავ, რადგან ამ პროექტთან დაკავშირებით, გარკვეული ვალდებულება ეკონომიკის სამინისტროს.
_ საერთოდ თუ არსებობს “ლაზიკას” პროექტი?
_ თუ არ არსებობს პროექტი და სპონტანურად არის დაწყებული სამუშაოები, უნდა შეჩერდეს. ასე ვთქვათ, დამატებითი ფულის დაბანდება არ იქნება, რადგან “ქართულ ოცნებას” ძალიან ბევრი განცხადება აქვს გაკეთებული და ამ განცხადებების რეალიზაციას ბიუჯეტში სჭირდება ფული. ვიცი, რომ საბიუჯეტო პროექტები გადაიხედება და ახალი პრიორიტეტების შესაბამისად გადალაგდება.
_ “ლაზიკას” გარდა ბევრი პროექტია, რომელიც, ალბათ, შესასწავლია. გადახედავთ თუ არა ჰესებთან დაკავშირებულ პროექტებს?
_ რაც შეეხება ჰესების პროექტებს, ეს არის ორ სამინისტროს შორის გაყოფილი, ზოგიერთ შემთხვევაში, ვიტყოდი გაბნეული საკითხები. აქედან გამომდინარე, ჯერ გავერკვევი, ვინ იყო პასუხისმგებელი ჰესებთან დაკავშირებულ პროექტებზე. თუ უმეტესი სამუშაო იყო ენერგეტიკის სამინისტროს მხრიდან, მაშინ ეს სამინისტრო გადახედავს. თუ რეგიონული და ინფრასტრუქტურის განვითარების სამინისტროს ვალდებულება იყო, ასეთ შემთხვევაში, ვნახავ რა ვალდებულებები აქვს სამინისტროს აღებული და რა – ინვესტორებს. სწორედ აქედან გამომდინარე იქნება გადაწყვეტილება მიღებული.
_ ვინ იქნებიან თქვენი მოადგილეები?
_ ჯერ-ჯერობით ვერ გეტყვით. რამდენიმე კანდიდატს მოვიაზრებ. იქნებიან ჩვენი ჯგუფიდან ძალიან სუფთა ადამიანები. მაგრამ ვიდრე გადაწყვეტილება იქნება მიღებული, მანამდე გავესაუბრები მოქმედ თანამშრომლებს, რას ფიქრობენ ისინი ამ ადამიანებზე. ერთი სიტყვით, ესეც მუშა პროცესში გაირკვევა.
