“გურია ნიუსი” დაინტერესდა, თუ რა ფორმით და როგორ ხდება საკრებულოს თავმჯდომარის შეცვლა.
“საქართველოს დემოკრატიული განვითარების კავშირის” იურისტი ირაკლი პაპავა ჩვენთან საუბრის დროს ამბობს, რომ ქვეყნის უმაღლეს საკანონმდებლო ორგანოში მმართველი პოლიტიკური ძალისა და შესაბამისად, საპარლამენტო უმრავლესობის შეცვლის შემდეგ, საზოგადოებაში მომეტებული ინტერესის საგანი გახდა საკითხი იმის შესახებ, ეს ცვლილებები აისახება თუ არა ხელისუფლების ქვედა დონეზე, ადგილობრივ თვითმმართველობებზე ანუ კანონის თანახმად, რამდენად შესაძლებელია, რომ პირველ რიგში, საკრებულოს თავმჯდომარის, როგორც თვითმმართველი ერთეულის ხელმძღვანელის, შეცვლა გახორციელდეს.
_ რაც შეეხება საკითხის სამართლებრივ მხარეს, მოქმედი კანონმდებლობა, ძირითადში, საკრებულოს თავმჯდომარის უფლებამოსილების ვადამდე შეწყვეტის ორ შემთხვევას ითვალისწინებს: 1) საკრებულოს თავმჯდომარეს, როგორც საკრებულოს თანამდებობის პირს, ნებისმიერ დროს შეუძლია, მიზეზის მითითებით ან ყოველგვარი ახსნა-განმარტების გარეშე, განაცხადოს თავისი გადადგომის შესახებ (ასეთ შემთხვევაში საკრებულოს თავმჯდომარე თანამდებობიდან გადამდგარად ითვლება, შესაბამისი განცხადების საკრებულოს ბიუროსთვის წარდგენის დღიდან); 2) საკრებულოს შეუძლია, თანამდებობიდან გადააყენოს საკრებულოს თავმჯდომარე. ამ შემთხვევაში ყველაზე საინტერესო ისაა, რომ საკრებულოს წინაშე თავმჯდომარის გადაყენების საკითხის წერილობითი ფორმით დასმის უფლება, საკრებულოს სრული შემადგენლობის, არანაკლებ, ერთ მესამედს გააჩნია, (ანუ, ოზურგეთის მუნიციპალიტეტის საკრებულოს მაგალითზე რომ ავიღოთ, საკითხის ინიცირებას, სადღაც საკრებულოს 12-13 წევრის წერილობითი მოთხოვნა ესაჭიროება). საკრებულოს თავმჯდომარე გადაყენებულად ჩაითვლება თუ მისი გადაყენების შესახებ, წინადადებას მხარი დაუჭირა, საკრებულოს სიით შემადგენლობის ნახევარზე მეტმა. თუკი საკრებულომ ვერ მოახერხა საკრებულოს თავმჯდომარის გადაყენება, მაშინ, მომდევნო სამი თვის განმავლობაში, დაუშვებელია მისი გადაყენების პროცედურის ხელმეორედ დაწყება.
მაგრამ საკითხის სამართლებრივ მხარესთან ერთად, არსებული ობიექტური რეალობაცაა გასათვალისწინებელი. იმ პირობებში, როდესაც საქართველოს თვითმმართველი ერთეულების წარმომადგენლობით ორგანოებში (მათ შორის ოზურგეთის მუნიციპალიტეტის საკრებულოში) “ერთიანი ნაციონალური მოძრაობის” გუნდი აბსოლუტურ უმრავლესობას შეადგენს, ხოლო იქ წარმოდგენილ სხვა პოლიტიკურ ძალებს კი საკრებულოს თავმჯდომარის თანამდებობიდან გადაყენების საკითხის დასასმელად საჭირო ხმების რაოდენობაც კი არ გააჩნიათ, ცოტა არ იყოს, გაუგებარი ხდება საკრებულოს თავმჯდომარის შეცვლაზე საუბრის აქტუალურობა და, მით უმეტეს, _ მისი შესაძლებლობა. იდეაში, სამართლებრივი ჩარჩოებიდან გაუსვლელად, საკრებულოს თავმჯდომარის თანამდებობიდან გადადგომა ან გადაყენება (შესაბამისად, მისი შეცვლა) შესაძლებელი კია, მაგრამ არსებულ რეალობაში რამდენად დიდია ამის ალბათობა, ამის თაობაზე შესაბამისი დასკვნები თავად საზოგადოებამ და იმ პირებმა გამოიტანონ, რომლებიც საკრებულოს თავმჯდომარის შეცვლის გარდაუვალობაზე საუბრობენ, _ _ განაცხადა ჩვენთან საუბრის დროს ირაკლი პაპავამ.
