გასულ წელს “გურია ნიუსი” წერდა, რომ გურია-აჭარის საზღვარზე მდებარე სოფლებში _ მაკვანეთსა და ჭანიეთში, მგელი არაერთხელ გამოჩნდა და ამ ფაქტს თვითმხილველებიც ჰყავდა. თუმცა, ეს მაშინ უფრო ზამთრისპირსა და ადრე გაზაფხულზე მოხდა. წელს კი, შუაგულ შემოდგომაზე, მგელმა სოფლებში “სტუმრობას” მოუხშირა. ოზურგეთის მუნიციპალიტეტის სოფელ ჭანიეთის მკვიდრი ზურაბ ურუშაძე გვიამბობს, რომ გვიან ღამით, სამსახურიდან დაბრუნებულს, მგელი ეზოსთან შეეფეთა, დაყვირების შემდეგ კი ნადირმა მიმდებარე სტადიონი გადაკვეთა და გაუჩინარდა.
_ 20 ოქტომბერს, ქობულეთის მუნიციპალიტეტის სოფელ წყავროკაში, მემარნეების უბანში აქაურმა მცხოვრებლებმა მგელი მოკლეს, უფრო ადრე კი იმავე მუნიციპალიტეტის სოფელ მუხაესტატეს ცენტრში პოლიციამ მოკლა საიდანღაც შემოვარდნილი მგელი, _ უამბო “გურია ნიუსს” ჟურნალისტმა ზურაბ ბაუჟაძემ და დასძინა, რომ ქობულეთის იმ სოფლებში უჩივიან მგლების შემოსევას, რომლებიც გურიის მოსაზღვრეა. ამის მიზეზი, ძირითადად, ის გარემოება უნდა იყოს, რომ ქაქუთი-ლაითურის ზონაში, რომლებიც მოსაზღვრე ტერიტორიებია, არის ტყის ფრაგმენტები (მაგალითად, თიკერის კვეთილი), სადაც 20 წლის მანძილზე დაუმუშავებელი სასოფლო-სამეურნეო სავარგულები მიგდებული და გატყიურებულია. სწორედ აქ პოულობს გადმოხვეწილი ნადირი თავშესაფარს.
ზოგადად, ბოლო წლებში დასახლებულ ადგილებში მგლის შემოვარდნის არაერთი შემთხვევა აიხსნა იმით, რომ 2008 წელს, ბორჯომ-ხარაგაულის ეროვნულ პარკში ტყის მასივების ხანძრით განადგურების დროს, აჭარა-გურიის მთიანეთს შეაფარა თავი ამ ინტელექტუალური სახელით ცნობილმა გარეულმა ცხოველმა. ეს გამოიწვია საბინადრო გარემოს და საკვების სიმცირემ. მართალია, მგელი წითელ წიგნშია შეტანილი და მასზე ნადირობა აკრძალულია, მაგრამ თავდასხმის თუ დასახლებულ პუნქტში შემოვარდნის დროს, უფლებას აძლევენ, მოკლან.
გურია-აჭარის საზღვარზე მდებარე სოფლების მოსახლეობა სერიოზულად არის შეშფოთებული მგლების გამოჩენის გამო. 85 წლის ჰამლეტ სურგულაძე გვიამბობს, რომ შორეულ წარსულში, მაშინაც კი, როცა ჩოლოქს გაღმა თუ გამოღმა ტყიანი მასივები ჭარბობდა და გზა თუ დასახლებული ადგილები ცოტა იყო, მგლის გამოჩენის ფაქტი ნაკლებად ახსოვთ.
_ ბავშვებს თუ შეაშინებდნენ უფროსები ან თანატოლები, მგელი მოდისო, ეს სხვა ამბავია, _ გვეუბნება ის, _ შუაგულ შემოდგომაზე სოფელში მგლის გამოჩენა კი მართლაც შემაშფოთებელია, რადგან ზამთარში მოსახლეობა სერიოზული საფრთხის ქვეშ აღმოჩნდება.
აღსანიშნავია ისიც, რომ გასულ წელს, როცა მგელი ჭანიეთსა და მაკვანეთში გამოჩნდა, მოსახლეობა ფიქრობდა, რომ ეს ერთი და იგივე უნდა ყოფილიყო, რადგან აღნიშნული სოფლები გვერდი-გვერდ მდებარეობს. წლევანდელი ფაქტი კი, როცა ოზურგეთის მუნიციპალიტეტის სოფლების მეზობელ ქობულეთის სოფლებში, ზედიზედ ორი მგელი მოკლეს და ნადირი კვლავ გამოჩნდა, უკვე ვარაუდი იმაზე, რომ სადღაც ერთი მგელი შემთხვევით გამოჩნდა, აღარ შეიძლება. გახმაურებული ფაქტია ისიც, რომ ამ წლის გაზაფხულზე, აჭარაში, ჭვანის ხეობაში მგლებმა 76 წლის კაცი დაგლიჯა. მისი ნაფლეთები, ორდღიანი ძებნის შემდეგ იპოვეს თანასოფლელებმა. საერთოდ, შუახევის ტერიტორიაზე ხშირი იყო ასეთი ფაქტები, ქობულეთსა და ოზურგეთს შორის მდებარე სოფლებში კი, ბოლო სამი წელია, განსაკუთრებით წელს, მგელზე საუბარი გახშირდა.
“გურია ნიუსი” დაუკავშირდა ბუნებრივი რესურსების სააგენტოს ტყისა და ველური ბუნების მართვის დეპარტამენტის გურიის სამმართველოს უფროსს, ნიკა ნოზაძეს.
_ ბატონო ნიკა, გურიისა და აჭარის სოფლებში, ბოლო ერთი თვის მანძილზე არაერთხელ გამოჩნდა მგელი. ორის ლიკვიდაცია უკვე მოხერხდა. მოსახლეობა სერიოზულად არის შეშფოთებული ამის გამო. თუ არის ეს ფაქტი თქვენთვის ცნობილი და რა ღონისძიებას გეგმავთ?
_ კონკრეტულად, გეტყვით იმას, რომ თუ მგელი თავს დაესხა მოქალაქეს ან ნებისმიერ დასახლებულ პუნქტს, გარემოს დაცვის სამინისტრო იძლევა უფლებას, რომ მოკლან. ისე კი, ეს ცხოველი წითელ წიგნშია შეტანილი და მისი განადგურება დაუშვებელია. მე ვიცი ასეთი ფაქტების შესახებ და მოახლოებულ ზამთართან ერთად, თუ კიდევ განმეორდა მგლის გამოჩენის ან ადამიანსა თუ შინაურ ცხოველზე თავდასხმის ფაქტი, აუცილებლად მივმართავ სამინისტროს, მოგვცეს ნებართვა, რათა შეიქმნას საპატრულო ჯგუფები, რომლებიც იმორიგევებენ და მოსახლეობას ხიფათს ააცილებენ.
