“მიმაჩნია, რომ სასჯელაღსრულების დეპარტამენტის უფროსის მოადგილის გაგა მკურნალიძის, გლდანის მე-8 საპყრობილის რეჟიმის უფროსის ოლეგ ფაცაციას და სხვა მაღალჩინოსნების მიმართ გამოძიება არ მიმდინარეობს სრულყოფილად და ობიექტურად, რადგან მიუხედავად ჩვენი არაერთი მცდელობისა, დღემდე არ დაკითხულან ის პატიმრები, რომლებიც ზემოხსენებულ ჩინოვნიკებს ცემასა და წამებაში ამხელენ. დაზარალებული პატიმრების განცხადებები გამომძიებლებს თაროებზე აქვთ შემოდებული,” _ აცხადებს ადვოკატი მამუკა ნოზაძე “გურია ნიუსთან” საუბარში.
ადვოკატის თქმით, სისხლის სამართლის საქმე, რომელიც რამდენიმე დღეში განსახილველად გადაეგზავნება სასამართლოს, დაფუძნებულია ერთადერთ ეპიზოდზე _ საუბარია ე.წ “კარანტინის დაშლის” კადრებზე, რომელშიც გაგა მკურნალიძე, ყაჭეიშვილი, ე. წ. “ვიქტორა” და ციხის სხვა მაღალჩინოსნები პატიმარს ფიზიკურად უსწორდებიან.
“მიუხედავად იმისა, რომ არსებობს არაერთი პატიმრის ჩვენება, რომელშიც ისინი წამებაში ამხელენ ფაცაციას, მკურნალიძეს, ცხვედიანს, ავსაჯინიშვილს ბულბულაშვილს, ყველა იმ ადამიანს, რომლებიც განსაკუთრებული სისასტიკითა და პატიმრების მიმართ არაადამიანური მოპყრობით გამოირჩეოდნენ, პროკურატურა ახალი გარემოებებისა და ფაქტების შესწავლას არ ახდენს. მე, როგორც, ადვოკატი ვითხოვ წამებაში დადანაშაულებული ყველა პირის დაკავებას, ხოლო უკვე დაკავებულების მიმართ საქმის ობიექტურად გამოძიებას. უნდა დაიკითხოს ყველა დაზარალებული პატიმარი და ახალი ეპიზოდები ერთ საქმეში გაერთიანდეს. პროკურატურა ცდილობს ამ დანაშაულის სისტემურობის უგულებელყოფას, თითქოს ეს ეყო ერთეული ფაქტი და ზემოხსენებული პირებს სხვა დროს არავინ უწამებიათ,” _ აცხადებს ნოზაძე.
საგულისხმო ფაქტია, რომ დაკავებულ მაღალჩინოსნებს გიორგი ყაველაშვილის საადვოკატო ბიუროს ადვოკატები იცავენ. ყაველაშვილის მეგობრული კავშირები მთავარ პროკურორ ზოდელავასთან და იუსტიციის მინისტრს ადეიშვილთან კი საზოგადოებისთვის კარგადაა ცნობილი.
ადვოკატ მამუკა ნოზაძეს პრეტენზიები აქვს სასჯელაღსრულების ყოფილ მინისტრ გიორგი ტუღუშთანაც. მისი თქმით, სამკურნალო დაწესებულების ის თანამშრომლები, რომლებსაც პატიმრები წამებასა და არაადამიანურ მოპყრობაში ადანაშაულებდნენ, მინისტრმა სამსახურიდან ისე გაათავისუფლა, რომ მათ მიმართ საგამოძიებო მოქმედება არ დაწყებულა.
ბორის ფარულავას ადვოკატი აცხადებს, რომ მისი დაცვის ქვეშ მყოფი ციხის ადმინისტრაციის მიერ მოწყობილი პროვოკაციის მსხვერპლია. ფარულავა ციხის ის თანამშრომელია, რომელმაც ბედუკაძესთან და აკობიასთან ერთად პატიმართა წამების ამსახველი ვიდეო კადრები ციხის გარეთ გამოიტანა. მას, ციხის სხვა თანამშრომლების მსგავსად, წამებაში ედება ბრალი. პროკურატურამ მის წინააღმდეგ 18 სექტემბერს შს სამინისტროს მიერ თამაზ თამაზაშვილის დისკრედიტაციის მიზნით გავრცელებული ვიდეოკადრები გამოიყენა. ამ კადრებში მოძალადე თანამშრომლებს შორის ერთ-ერთი ფარულავაა. ადვოკატი ნოზაძე ამტკიცებს, რომ ფარულავამ დადგმულ სცენაში მონაწილეობა უფრო “დიდი სიკეთის”, პატიმართა წამების ამსახველი კადრების გადასარჩენად მიიღო: “ბორის ფარულავას დიდი წვლილი მიუძღვის სასჯელაღსრულების დაწესებულებიდან ამ ვიდეოკადრების გამოტანაში. დღეს რომ ქვეყანაში ვითარება შეიცვალა, ეს მისი დამსახურებაცაა. ბორის ფარულავა არის დანაშაულის პროვოცირების მსხვერპლი. მის წინააღმდეგ არსებობს ერთადერთი კადრი _ ფარულავა იძულებული გახდა შეესრულებინა ციხის ხელმძღვანელობის მითითება, რათა უფრო დიდი სიკეთე გადაერჩინა,” _ აცხადებს ადვოკატი ნოზაძე.
ადვოკატის თქმით, ბორის ფარულავას, 18 სექტემბერს, სამსახურიდან სახლში წასვლის უფლება არ მისცეს. ფარულავა მიხვდა, რომ მის წინააღმდეგ პროვოკაცია მზადდებოდა, მისი განზრახვა გამჟღავნდა და დაჭერას უპირებდნენ. დაჭერის ნაცვლად ციხის ადმინისტრაციამ პატიმრის ცემის ამსახველ ვიდეოში მონაწილეობა მოსთხოვა.
“ბორის ფარულავას სამსახურეობრივად არ ეკისრებოდა სასჯელაღსრულების დაწესებულების შიგნით ყოფნა. ის იყო მიმაგრებული გარე პერიმეტრზე, ადვოკატებისა და პროკურორების ოთახში. იმ დღეს, როდესაც შს სამინისტრომ ვიდეოგადაღება დაგეგმა, ფარულავა სახლში არ გაუშვეს. იგი ამბობს, რომ ის ასრულებდა უსაფრთხოების სამსახურის უფროს ლევან ფურცხვანიძის მითითებას,” _ აცხადებს ადვოკატი.
პროკურატურას ბორის ფარულავას წინააღმდეგ ორი ძირითადი მტკიცებულება აქვს _ ნაცემი პატიმრის ჩვენება და წამების ამსახველი ვიდეოკადრები.
“დაკავებულმა ციხის მაღალჩინოსნებმა ერთმანეთის გათქმა დაიწყეს. პატიმართა წამებაში ყველა ერთმანეთს ადებს ხელს. ამავე დროს, ისინი არაფერს ამბობენ წამების უშუალო დამკვეთებზე _ ახალაიაზე, კალმახელიძეზე, ადეიშვილზე. როგორც ჩანს, მათ მფარველი სჭირდებათ, რომელიც პატიმრობის მძიმე პერიოდს შეუმსუბუქებს”.
ადვოკატ ნოზაძის თქმით, ციხის ყოფილი ჩინოვნიკები, გლდანის მე-8 საპყრობილის ნაცვლად, დღემდე მატროსოვის ქუჩაზე მდებარე დაწესებულებაში ჰყავთ. იქვე იმყოფება ფარულავაც, ადვოკატის თქმით არც თუ ისე კომფორტულ პირობებში.
ადვოკატის ინფორმაციით, “მკურნალიძეს, ხუჭუას, ყაჭეიშვილს და სხვა მაღალჩინოსნებს ციხეში სხვადასხვა თანამდებობის პირები აკითხავენ და ღრეობა მთელი ღამის განმავლობაში მიმდინარეობს. აღნიშნული დაწესებულების უფროსი გურამ დონაძის მეგობარი და თბილისის მთავარი სამმართველოს ყოფილი უფროსი გიორგი ხიზანიშვილია. მისი გვარი ზურაბ ვაზაგაშვილის მკვლელობის საქმეშიც ფიგურირებს. მინისტრმა გიორგი ტუღუშმა ის N9 საპატიმრო დაწესებულების დირექტორად დანიშნა”.
8 ნოემბერს, თბილისის საქალაქო სასამართლოში საქმის წინასწარი მოსმენა გაიმართება. განსასჯელის სკამზე 11 პატიმარია: გლდანის მე-8 საპყრობილის უსაფრთხოების განყოფილების უფროსი ლევან ფურცხვანიძე, ამავე საპყრობილის რეჟიმის განყოფილების უფროსი ოლეგ ფაცაცია, ოპერატიული მორიგე გელა ცომაია, კონტროლიორი ლევან ფხალაძე, უსაფრთხოების განყოფილების ინსპექტორი ბორის ფარულავა, საპყრობილის არასრულწლოვანთა განყოფილების მორიგე ინსპექტორი კობა ჩიკვატია, სასჯელაღსრულების დეპარტამენტის თავმჯდომარის მოადგილე გაგა მკურნალიძე, მე-8 საპყრობილის დირექტორი დავით ხუჭუა, დირექტორის მოადგილე ვიქტორ ყაჭეიშვილი, რეჟიმის უფროსი ინსპექტორი გიორგი კვარაცხელია, კონტროლის ინსპექტორი მანუჩარ ლომთაძე.
