მისი თქმით, უნდა შეიცვალოს საპენსიო სისტემაც, ასევე 10%-იანი ზრდის თვალსაზრისით. ამის შესახებ უზენაესი სასამართლოს თავმჯდომარემ ჟურნალისტებისთვის გამართულ სემინარზე განაცხადა ყვარელში.
“საკითხი, რომელზეც უნდა ვიმუშავოთ, ეს არის მოსამართლეთა ხელფასების ზრდა, რომელსაც ითვალისწინებდა რეფორმები მუდმივად და ეტაპობრივად. 2005 წლიდან დაწყებული, მუდმივად იზრდებოდა მოსამართლეთა ხელფასები და ძალიან კარგ დონეს მიაღწია, ვგულისხმობ პირველ ინსტანციას და შემდგომ ყველა ინსტანციაში იზრდებოდა.
ეს ყველაფერი შეჩერდა ეკონომიკური კრიზისის გამო. ჩვენ, ამასწინათ მოწვეული გვქონდა მოსამართლეთა კონფერენცია და გამოვიტანე ბიუჯეტის პროექტი. ეს ბიუჯეტის პროექტი ითვალისწინებს იგივეს, რაც სასამართლოს აქვს ამ წელს, მაგრამ ერთადერთი ცვლილება არის ის, რომ ახალი პროექტი ითვალისწინებს მოსამართლეთა და თანამშრომელთა 10%-იან მატებას. ეს ყველაფერი გავაცანით მოსამართლეებს და მათაც მხარი დაუჭირეს. ეს ყველაფერი შეჩერებული იყო ობიექტური მიზეზების გამო და ახლა ჩვენ ჩავთვალეთ, რომ დრო იყო, იგივე ტენდენცია გაგვეგრძელებინა 2013 წლიდან.
მეორე საკითხი, რაც ასევე კონფერენციაზე იდგა, ეს გახლდათ მოსამართლეთა საპენსიო სისტემის შეცვლა. თუ თქვენ ნანახი გაქვთ რეფორმის კონცეფცია, ერთ-ერთი საკითხი იყო მოსამართლეთა საპენსიო სისტემის გაუმჯობესება. ჩვენ ამ გაუმჯობესებას გარკვეულწილად მივაღწიეთ იმით, რომ 2006 წელს პარლამენტმა მიიღო კანონი კომპენსაციების შესახებ და მოსამართლეთა პენსიებიც ასე თუ ისე, გაუმჯობესდა, უფრო უკეთესი გახდა, უფრო სხვა დონეზე ავიდა. უზენაესი სასამართლოს მოსამართლეს ენიშნება პენსია 1200 ლარის ოდენობით და ქვედა ინსტანციის მოსამართლეებს 560 ლარის ოდენობით. ამის შემდეგ ჩვენ უკვე გავჩერდით. კიდევ გვინდოდა ამ საკითხის წამოწევა, ეს იყო 2008 წლის ბოლო, 2009 წელი, მაგრამ ობიექტური მიზეზების გამო არ მოხერხდა.
ახლა კიდევ ერთხელ გვინდა შევეცადოთ, რომ ეს პრინციპი ავამოქმედოთ, რაც ძალიან მარტივია. ჩვენ პრაქტიკა მოვიძიეთ სხვა სახელმწიფოების და მათ ასე აქვთ ძირითადად, რომ 10 წელი ვინც იმუშავებს მოსამართლედ, ის მიიღებს მოქმედი ხელფასის რაღაც პროცენტს, 20-ზე მეტი თუ იმუშავა _ უფრო მეტს და ასე შემდეგ. ამაზეა აწყობილი ეს ახალი პროექტი და მოსამართლეთა კონფერენციაზე ამას დაუჭირეს მხარი.
ბიუჯეტი უკვე გადაგზავნილია მთავრობაში და ნოემბერში გადაწყდება, რამდენად დააკმაყოფილებენ ჩვენს მოთხოვნას. რაც შეეხება საპენსიო სისტემის შესახებ პროექტს, ეს პირდაპირ იქნება შეტანილი პარლამენტში და იქ დაიწყება მსჯელობა. ეს სხვათაშორის, დიდ დანახარჯებს არ მოითხოვს. ბევრი მოსამართლე არ არის გასული პენსიაში, თუმცა მომავლისკენ თუ გავხედავთ, შეიძლება მოიმატოს ხარჯებმა,” _ განაცხადა კუბლაშვილმა.
მისივე განმარტებით, უზენაესი სასამართლო 2012 წლის ბიუჯეტზე 2 მილიონ 100 ათასი ლარის დამატებას ითხოვს.
“გურია ნიუსი”: _ ბატონო კოტე, თქვენ აღნიშნეთ, რომ მოსამართლეთა ხელფასების ზრდა, რომელიც რეფორმით ყოფილა გათვალისწინებული, შეჩერდა ეკონომიკური კრიზისის გამო. რატომ გგონიათ, რომ 2013 წლის ბიუჯეტში უნდა იყოს ეს თანხა განსაზღვრული? მითუმეტეს მაშინ, როდესაც ეს წელი არის საგარეო ვალების გადახდის წელი, ამას ემატება პენსიები და შეწყვეტილი სოციალური დახმარებები?
კოტე კუბლაშვილი: _ იცით რა, ეს მატება შეჩერდა და უკვე 4 წელია, არ გაზრდილა, ამიტომ ჩვენ ჩავთვალეთ, რომ ახლა არის ამის დრო. თანაც, ეს არის ძალიან მცირე თანხა ბიუჯეტისთვის. როგორც ფინანსთა სამინისტრომ გამოაცხადა 8 მილიარდი ლარი იქნებაო, ამიტომ ეს 2 მილიონ ასიათასი იქნება ძალიან მცირე პროცენტი.
თანაც ეს არის მხოლოდ 10 %-იანი ზრდა და არა 50 %-იანი ან 20%-იანი, რაც უფრო არარეალური და პროვოკაციული იქნებოდა. იმედი მაქვს, რომ პასუხი დადებითი იქნება, რადგან ხელფასების ეტაპობრივი ზრდა სასამართლო რეფორმის მთავარი მიმართულება იყო. ეს შეჩერდა ეკონომიკური კრიზისის გამო, მაგრამ მივიჩნევთ, რომ მომავალი წლის ბიუჯეტში ამის საშუალება შეიძლება გამოიძებნოს, _ განაცხადა კუბლაშვილმა.
