“მ/წლის 6 ნოემბრიდან მიმდინარეობს შპს “საქნახშირი (ჯი-აი-ჯი ჯგუფი)”-ს მინდელის სახ. შახტის მუშათა და ინჟინერ-ტექნიკური პერსონალის მასიური გაფიცვა, რომელიც გამოწვეულია შახტის უშუალო ხელმძღვანელობის მიერ მუშათა შრომითი ანაზღაურების შემცირებისა და გარკვეული ნაწილის დათხოვნის (500 კაცი) შესახებ გაცემული განცხადებით. ისინი ამას ხსნიან ნახშირის მომხმარებლის (საქართველოს ცემენტის დამამზადებელი ქარხნები) კაპიტალურ სარემონტო სამუშაოების ჩატარებასძთან დაკავშირებით, რომელიც რამოდენიმე თვე გაგრძელდება (ვადები უცნობია). უნდა აღინიშნოს, რომ აღნიშნულ ქარხნებთან კონტრაქტი ნახშირის მიწოდებაზე წლის ბოლომდეა გაფორმებული.
ასეთი მოთხოვნა შახტის ხელმძღვანელობის მიერ გაჟღერებული იქნა მ/წლის მაისის თვეში, რამაც გამოიწვია რაიონის ხელმძღვანელობისა და სხვა მაღალჩინოსნის ჩარევა გარკვეული სიტუაციების გამო, მხედველობაში გვაქვს მოახლოებული საარჩევნო კამპანია. ეს მოთხოვნა შახტის ხელმძღვანელობამ უარყო.
არჩევნების ჩატარების შემდეგ ეს მოთხოვნა დაუყონებლივ აღსდგა, რაც გვაფიქრებინებს იმას რომ საწარმოს მეპატრონის მხრიდან გარკვეულ პოლიტიკურ ანგარიშსწორებას აქვს ადგილი.
უნდა აღინიშნოს ის ძირითადი მიმართულება, რაც ხელმძღვანელობის მუშაობაში აღინიშნება. ბოლო ხუთი წლის განმავლობაში არ მომზადებულა არც ერთი ახალი ჰორიზონტი და ველები. გეგმიურად ყოველ ერთ წელიწადში უნდა მზადდებოდეს ერთი ველი. ძირითადად მუშავდება ძველი 80-იან წლებში მომზადებული ენდოგენური ხანძრებისაგან დახურული ველების გახსნა და ექსპლოატაცია. ყოველივე ეს მიდის იქითკენ რომ ტყიბულში შეწყდეს ნახშირის მოპოვება, რაც რეგიონის სოციალურ-ეკონომიურ მდგომარეობაზე მძიმედ აისახება. ფაქტიურად ქალაქი ჩაკვდება. არ შეიძლება არ აღინიშნოს, რომ მუშათა და ინჟინერ-ტექნიკური პერსონალის შემცირების ფონზე, რაც მეტად გასაკვირია, ქმნიან ახალ ხელმძღვანელ სტრუქტურებს, ზრდიან შტატებს.
აღნიშნულიდან გამომდინარე მოვითხოვთ:
1. დათხოვნილი იქნას დაკავებული თანამდებობიდან შპს “საქნახშირი (ჯი-აი-ჯი ჯგუფი)”-ს აღმასრულებელი დირექტორი ლ. სტროიაკოვსკი, რომელიც არაკომპეტენტურია ტყიბულის საბადოს ნახშირის მოპოვების საქმეში, აგრეთვე მისი ტექ. დირექტორის თანამდებობაზე ყოფნის პერიოდში შემუშავებული პროექტების გამო საწარმოს მიადგა დიდი ზარალი.
2. მ/წლის ბოლომდე შენარჩუნდეს გეგმით და კონტრაქტით გათვალისწინებული ყველა პირობები. შეწყდეს მუშებისა და ინჟინერ-ტექნიკური პერსონალის ხელფასების შემცირება და სამუშაოდან უმიზეზოდ დათხოვნა.
3. მომავალი წლისათვის შენარჩუნებული იქნას აღებული ტემპი დაიდოს ახალი კონტრაქტები და ხელშეკრულებები მომხმარებლებთან.
4. ეთხოვოს საქართველოს პარლამენტის დარგობრივ კომისიას შეისწავლოს საწარმოში არსებული მდგომარეობა ინვესტორის შემოსვლის დღიდან და შემუშავდეს დარგის განვითარების ახალი სტრატეგია. მანამდე, შესაძლებლობის შემთხვევაში მოძიებული იქნას ახალი ინვესტორი.
5. დამოუკიდებელი აუდიტის მიერ შემოწმებული იქნას შპს “საქნახშირი (ჯი-აი-ჯი ჯგუფი)”-ს მინდელის სახ. შახტის საფინანსო მდგომარეობა.”
