სუნგულიას თქმით, ილია ჯალაღანია ოზურგეთის რაიონულ პროკურატურას სწორედ იმ 5 წლის განმავლობაში ხემძღვანელობდა, როცა “ნაციონალური მოძრაობა” თავისი მოღვაწეობის ყველაზე ძლიერ ფაზაში იმყოფებოდა.
_ მინდა გითხრათ, რომ ამ ფაქტმა ძალიან დიდი აჟიოტაჟი გამოიწვია ოზურგეთში, უამრავი ადამიანი მოგვმართავს და გვეკითხება, რა ხდება. ვხვდები საზოგადოების დიდ ნაწილს, რომლებიც ძალიან შოკირებულები არიან ამ ფაქტით. უსამართლობის განცდა იყო ძირითადი მიზეზი იმისა, რომ არჩევნებში, საზოგადოებას უარი ეთქვა წინა ხელისუფლებისათვის. რა თქმა უნდა, იყო სოციალური და სხვა პრობლემებიც. მაგრამ, დღეს საზოგადოება აცხადებს, ყველაფერს მოევლება, ოღონდ აღდგეს სამართლიანობაო. ამ დანიშვნით, სამართლიანობის აღდგენა ძალიან ეჭვქვეშაა, დარწმუნებული ვარ, რომ ეს არის კონკრეტული გადაცდომა და მაქვს ძალიან დიდი იმედი, რომ შეცდომის გამოსწორება მალე მოხდება, _ აცხადებს მარინე სუნგულია ჩვენთან საუბრისას და ჯალაღანიასთან დაკავშირებულ კონკრეტულ ფაქტებსაც იხსენებს.
_ ილია ჯალაღანია 5 წლის განმავლობაში იყო პროკურორი ოზურგეთში, როცა ყველა მეტად მძლავრ ფაზაში იმყოფებოდა “ნაციონალური მოძრაობა”. ძალიან კარგად ვიცით, ამ პერიოდისთვის სასამართლო არაფერს ნიშნავდა და ყველა იმ უსამართლო გადაწყვეტილებას, რომელიც ხდებოდა პროკურორები ხელმძღვანელობდნენ. 5 წლის მანძილზე, უამრავი უსამართლო ფაქტი არის დაფიქსირებული, ამ მასალების გადახედვა შეიძლება, მოიძიონ და გადახედონ რა უკანონობა და უსამართლობა არის პირადად ბატონი ილია ჯალაღანიას მიერ ჩადენილი და მის კისერზე.
მე გავიხსენებ ერთ კონკრეტულ ფაქტს და შემთხვევას. ყველას კარგად გვახსოვს 2007 წლის 7 ნოემბერი. მე და ტიფო მიქატაძე 2 ნოემბრიდან თბილისში აქციებზე ვიმყოფებოდით, ჩამოვედით 6 ნოემბერს გარკვეული მიზეზების გამო, რადგან აქაც, ოზურგეთშიც მიმდინარეობდა საპროტესტო აქციები და მოსახლეობას ჩვენი თანადგომა ჭირდებოდა. ზუსტად 2007 წლის 7 ნოემბერს დილით მოხდა ტიფოს მიქატაძის დაპატიმრება პირადად ილია ჯალაღანიას სანქციით.
_ ქალბატონო მარინე, რა იცით, რომ პირადად ილია ჯალაღანიას სანქციით იქნა დაკავებული თქვენი მეუღლე?
_ პირადაპირ პროკურორი სცემდა დაპატიმრების სანქციას. ეს იყო პოლიტიკური ნიშნით დაკავება, რადგან ტიფო იყო აქტიური ოპოზიციონერი. სასამართლოზე მას წაუყენეს ბრალდება, პოლიციელისთვის წინააღმდეგობის გაწევა, რაც აბსოლუტურად უსაფუძვლო იყო, თითქოს მან პოლიციელს ღილები ააძრო ქურთუკზე და მერე აღმოჩნდა, რომ პოლიციელის ქურთკს საერთოდ არ ჰქონდა ღილები, არამედ ის “ელვით” იკვრებოდა. ტიფოს მიუსაჯეს 5 დღე პატიმრობა, რომელმაც არ აღიარა ბრალი და გამოაცხადა შიმშილობა. ჩვენ გვაქვს საფუძვილიანი ეჭვი, რომ ტიფო მიქატაძე პოლიციაში აეროზოლით იქნა მოწამლული იმ დროს. გამოყვანის დღიდან ერთი თვის განმავლობაში, მას გადასხმებს უკეთებდნენ. ძალიან ცუდად იყო, საკვებით ვერ მოიწამლებოდა, რადგან შიმშილობდა. ეს მოხდა იმიტომ, რომ ტიფო იყო ერთ-ერთი ლიდერი და საჭირო იყო მისი განეიტრალება. მაშინ პილიციის უფროსები იყვნენ ბესო გელენიძე და დავით ცირდავა.
აქვე აღვნიშნავ, რომ ბატონმა ჯალაღანიამ ოზურგეთში ჩამოსვლის შემდეგ, საკამოდ სოლიდური ქონება შეიძინა, რისი გადამოწმებაც შეიძლება.
მე განცხადებას ვაკეთებ იმიტომ, რომ ყველა, ვინც ამდენი წელი უსამართლობის განცდის გამო ვერ ვებრძოდით ამა თუ იმ პერსონას, თუ ისევ მათ დააბრუნებენ, ამ საზოგადოებას, რომელმაც ხმა სამართლოანობას მისცა, ამის განცდა აღარ ექნებათ. მე არ მინდა, რომ საზოგადოებაში უიმედობა გაჩნდეს ისევ.
2007 წელს, მთელი საქართველოს მასშტაბით, ვინც პროკურორი იყო და ასეთ დაპატიმრებებს ახორციელებდა, მათ მორალური უფლება არ აქვთ, იყვნენ ხელისუფლებაში. ისინი თუ ისევ აგრძელებენ პროკურატურაში მუშაობას, ჩემთვის წარმოუდგენელია ასეთი რამ, რადგან მათ კვლავ შეუძლიათ განახორციელონ ბევრი უსამრთლო და უკანონო ქმედება. საზოგადოებას არ იქნება გარანტია სამართლიანობის და ისინი დაცულები ვერ იქნებიან. ადამიანებს, რომლებიც მიდიოდნენ საკუთარი კეთილდღეობისთვის ყველანაირ უკანონობაზე, თავისი ყოველი დღე აგებული ქონდათ სიყალბეზე, უსამრთლობაზე, მათ ისევ სადავეები მივცეთ ხელში, ეს ყოვლად დაუშვებელია! არ შეიძლება! მათ ვეღარ გამოასწორებ, გამორიცხულია.
_ რას იტყვით ოზურგეთის მოქმედ პროკურორზე, კახა კოჩივარზე?
_ ვერაფერს გეტყვით მაგ პიროვნებაზე, რადგან მე პირადად არც მასალები მიგროვებია და არც შეხება მქონია მასთან, მაგრამ ჩემთვის მიღებელია, მიშა სააკაშვილის დროს პროკურორად მომუშავე ადამიანებმა გააგრძელონ საქმიანობა. მათ ყველას აქვს შესრულებული ცუდი დავალებები, რომლის გამოძიებაც შეიძლება. მათ ქონდათ სხვა მენტალობა ჩამოყალიბებული 8 წლის მანძილზე, რისი გამოსწორებაც შეუძლებელია.
გუშინ ერთ-ერთი “ნაციონალი” მეუბნება: _ ხომ არ გგონიათ, თქვენ მოხვედით, გაიხედე, ჯერ ყველგან ჩვენი ხალხიაო.
ჩემი აზრით, ყველა ძალოვან სტრუქტურაში საპასუხისმგებლო თანამდებობაზე თითოეული კადრის დანიშვნისას მისი წარსულის გადახედვა აუცილებელია, _ აცხადებს “გურია ნიუსთან” მარინე სუნგულია.
ახალდანიშნული პროკურორი ილია ჯალაღანია “გურია ნიუსთან” აცხადებს, რომ ბრალდებები, რომლებსაც მარინე სუნგულია მისი მისამართით აცხადებს, აბსურდია და ამასთან დაკავშირებით კომენტარებს არ გააკეთებს.
_ ბატონო ილია, ქალბატონ მარინე სუნგულიას იცნობთ?
_ კი ბატონო, რა ხდება?
_ ის აცხადებს, რომ უშუალად თქვენი სანქციის საფუძველზე იქნა დაპატიმრებული მისი მეუღლე ტიფო მიქატაძე 2007 წელში 7 ნოემბერს, პოლიტიკური ნიშნით…
_ არ ვიცი, მე ასეთი ფაქტი არ მახსოვს, ეს არის აბსურდი და ყოველგვარი კომენტარის გაკეთებისგან თავს შევიკავებ, – თქვა ჯალაღანიამ.
