ამ ინფორმაციას “გურია ნიუსთან” თავად ოზურგეთის ბავშვთა სამკურნალო ცენტრის დირექტორი დავით მდინარაძე ადასტურებს და ჩვენთან საუბრის დროს ამბობს:
_ ოზურგეთის ბავშვთა სამკურნალო ცენტრს გაფორმებული აქვს ხელშეკრულება, რათა ვაწარმოოთ მუნიციპალიტეტში მცხოვრები ბავშვების გადაუდებელი მომსახურება. მაგრამ, როგორც ირკვევა, ამ დღეებში მოდის “ალფას” წარმომადგენლებისგან სიტყვიერი გაფრთხილება, რომ ბავშვები, რომლებიც შემოვლენ ჩვენთან სამკურნალოდ, უნდა გადავაგზავნოთ “მედალფას” ოზურგეთის სამედიცინო ცენტრში.
არის შემთხვევა, როცა მძიმე მდგომარეობაში მყოფი ბავშვის მშობელს გაუჭირდება პაციენტის ცენტრში გადაყვანა.
მოგეხსენებათ, რომ გურიაში დაზღვეულთა უმრავლესობა “ალფაშია” დაზღვეული. აქედან გამომდინარე, სხვა დაზღვეული გურიაში არ არის და მე კიდევ მეუბნებიან, რომ არ მივიღო ავადმყოფები. ეს კი, ფაქტობრივად, დაწესებულებების პარალიზებას ნიშნავს და შეიძლება ცენტრის 25 თანამშრომელი სამსახურის გარეშე დარჩეს. ვფიქრობ, ამით ირღვევა ადამიანის კონსტიტუციური უფლება, რომ სადაც სურვილი აქვს იქ მივიდეს და იქ გაეწიოს სამედიცინო მომსახურება. მსოფლიოში, არც ერთი სადაზღვეო კომპანია თავად არ ფლობს სამედიცინო დაწესებულებას; საქართველოში კი ეს გავრცელებული პარაქტიკაა, რითაც აბსოლუტურად დარღვეულია ჯანსაღი კონკურენციის პირობები. ისიც პრობლემაა, რომ სადაზღვევო კომპანიებს სახელმწიფო პროგრამების თანხა ერიცხებათ, – ამბობს დათო მდინარაძე.
ბავშვთა სამედიცინო ცენტრის ერთ-ერთი რეგისტრატორი “გურია ნიუსთან” საუბარში ადასტურებს, რომ მათ მიიღეს სიტყვიერი გაფრთხილება, როგორც კი პაციენტს მიიღებენ, “მედალფას” უნდა დაუკავშირდნენ: _ მაგალითად, ბავშვს სჭირდებოდა გადასხმა; გადავურეკეთ “მედალფას” და გვითხრეს, რომ პაციენტი გაგვეშვა სამედიცინო ცენტრში; მძიმე პაციენტი როგორ გავუშვათ, როდესაც ჩვენთანაც ჩვეულებრივად კეთდება იგივე პროცედურები?!
მშობელმა არ ისურვა გადაეყვანა ბავშვი “მედალფაში” და აღმოჩნდა, რომ დაზღვევა აღარ მოქმედებდა და შესაბამისად, მშობელმა დამატებითი ხარჯი ნახა, _ გვითხრა რეგისტრატორმა.
ნინო გაჩეჩილაძე, კომპანია “ალფას” დირექტორი: _ რაც შეეხება გეგმურ და ამბულატორიულ მომსახურებას, ამას არეგულირებს მთავრობის დადგენილება; მასში მითითებულია, რომ მზღვეველი ვალდებულია, გეოგრაფიული ხელმისაწვდომის პრინციპის გათვალისწინებით, შეარჩიოს ლიცენზირებული სამედიცინო დაწესებულება და შესაბამისად, ასეც არიან განაწილებულები. ბენეფიციარები აქ იღებენ მომსახურებას ამბულატორიულ პირველ დონეზე. რაც შეეხება სტაციონალურ მომსახურებას ქირურგიული ხარჯებით, მხოლოდ მზღვეველის მიერ შერჩეულ სამედიცინო დაწესებულებაში ხდება და შესაბამისად, ესეც ჩვენი არჩევანია.
_ ახლა, რატომ შეიქმნა იმის აუცილებლობა, რომ დაზღვეული პაციენტების მიღება აღარ მოხდეს ბავშვთა სამკურნალო ცენტრში?
_ მსგავსი რამ არ ყოფილა, რომ პაციენტების მიღება არ ყოფილიყოს აღნიშნულ საავადმყოფოში. გეგმიურ შემთხვევებზე გადამისამართებას ვაკეთებთ იმიტომ, რომ ჩვენი პრეროგატივაა ავირჩიოთ დაწესებულება და თან, “მედალფაში” გაცილებით უკეთესი პირობებია.
