“გურია ნიუსის” ჟურნალისტებისთვის ხელშეშლის და კადრების წაშლის ფაქტი სახალხო დამცველის ანგარიშში მოხვდა, რომელიც მხოლოდ ახლა გადმოეგზავნა ოზურგეთში პროკურატურას გამოძიებისთვის; პროკურატურამ კი, ამ ფაქტზე საქმის აღძვრა პოლიციას დაავალა და გურიის სამხარეო მთავარმა სამმართველომ გამოძიება დაიწყო.
ჟურნალისტურ საქმიანობაში ხელშეშლის ფაქტთან დაკავშირებით, 29 ნოემბერს, გურიის სამხარეო მთავარი სამმართველოს გამომძიებლებმა “გურია ნიუსის” ჟურნალისტების დაკითხვა დაიწყეს.
რა მოხდა 24 ივლისს
24 ივლისს, ოზურგეთში, დილიდან შეიმჩნეოდა პოლიციელთა მობილიზება. ადგილობრივების გარდა, აქ იყვნენ პოლიციელები სხვადასხვა მუნიციპალიტეტიდან, აჭარიდან. რადგან, პრეზიდენტის პრესსამსახურთან კომუნიკაცია გაძნელებული იყო, მხოლოდ შემთხვევით გახდა ჟურნალისტებისთვის ცნობილი, რომ ოზურგეთში ქვეყნის პრეზიდენტს მიხეილ სააკაშვილს ელოდებოდნენ.
სააკაშვილის ვიზიტი მეტად გასაიდუმლოებული იყო და მასთან შეხვედრას არც ერთი მედია საშუალება არ ესწრებოდა. როგორც პრეზიდენტის დაცვის წევრებმა “გურია ნიუსის” ჟურნალისტებს განუცხადეს,” ღონისძიება დახურული იყო”, მიუხედავად იმისა, რომ შეხვედრა საჯარო სივრცეში მიმდინარეობდა.
თავდაპირველად, “გურია ნიუსს” ოზურგეთში, რესტორან “ქალაქურთან” მდგომმა პრეზიდენტის დაცვის წევრებმა და პოლიციელებმა არ მისცეს ფოტოსა თუ ვიდეო კადრების გადაღების უფლება. ისინი კატეგორიულად მოითხოვდნენ ჟურნალისტებს ის ტერიტორია დაეტოვებინათ, სადაც პრეზიდენტი უნდა შეჩერებულიყო.
რესტორან “ქალაქურის” წინ შეკრებილმა რამდენიმე მოქალაქემ “გურია ნიუსს” თავისი პრობლემების შესახებ მოუთხრო: _ ოზურგეთში არასდროს არაფერი არ კეთდება. მოვიდნენ, ნახონ ჩვენს სოფელში თუ არის რაიმე გაკეთებული _ არც გზა გვაქვს, არც წყალი, არც გაზი. რატომ მოდის პრეზიდენტი გასაიდუმლოებულად, ამის შესახებ ჩვენ, მოსახლეობამ არაფერი არ უნდა ვიცოდეთ? ჩვენი პრობლემის შესახებ არ უნდა ვუთხრათ, არ ვართ ღირსი, მოგვისმინოს?
როგორც ჩანს, ამ სამუშაო პროცესმა, დაცვის კიდევ უფრო გაღიზიანება გამოიწვია. “გურია ნიუსმა” მოახერხა ჩაეწერა პრეზიდენტის დაცვის წევრები და რამდენიმე პოლიციელი, რომლებიც კატეგორიულად მოითხოვდნენ ჟურნალისტებს სასწრაფოდ დაეტოვებინათ რესტორან “ქალაქურის” მიმდებარე ტერიტორია, სადაც პრეზიდენტს ელოდებოდნენ.
_ გადაბრძანდით, თუ შეიძლება, მეორე ქუჩაზე და გაარკვიეთ პრეზიდენტის პრესსამსახურში, _ ასეთი იყო დაცვის კატეგორიული მოთხოვნა.
_ აქ ხომ დადიან უბრალო მოქალაქეები? ჩვენ რატომ არ გვაქვს უფლება, აქ ვიდგეთ?
_ უბრალო მოქალაქეები დადიან, მაგრამ ჟურნალისტებს არ აქვთ უფლება!
_ გვაჩვენეთ ბრძანება, რის საფუძველზეც არ გვაქვს უფლება, ვასრულებდეთ პროფესიულ საქმიანობას.
_ გადაბრძანდით მეზობელ ქუჩაზე!
“გურია ნიუსი” რამდენიმე საათის განმავლობაში ცდილობდა პრეზიდენტის პრესსამსახურის უფროსთან ნათია ბანძელაძესთან დაკავშირებას, რომელიც ჯერ სატელეფონო ზარებს არ პასუხობდა, მოგვიანებით კი, კითხვა მოისმინა და ტელეფონი მაშინვე გამორთო.
იმავე დღეს, ანალოგიური განმეორდა შპს “მედალაფას” მიმდებარე ტერიტორიაზე, სადაც ჟურნალისტები არ დაუშვეს და გამოცემის წყაროს ინფორმაციით, სადაც პრეზიდენტმა, სამშობიარო განყოფილებაში მწოლიარე პაციენტებს საჩუქრები დაურიგა.
ჟურნალისტებმა რამდენიმე ფოტოკადრის გადაღება მოახერხეს, თუმცა, დაცვის წევრებმა ჟურნალისტებს ფოტოების წაშლა და პირადი მონაცემების ჩაწერა უბრძანეს, კადრები დაცვის წარმომადგენლებმა თავად წაშალეს.
ფარულ ჩანაწერში კარგად ისმის დიალოგი, რომელიც ამ პროცესს თან ახლდა:
_ ყველა ფოტოს გვიშლით?!!!
_ ყველას არა. იმას, რაც ახლა გადაიღეთ.
_ ჩვენ მსგავსი ფოტოები ყოველთვის გადაგვიღია, თუმცა, პრობლემები არასდროს შეგვქმნია…
_ ეს იყო დახურული შეხვედრა. თქვენ გადაიღებდით საჯარო ღონისძიებებს. კოორდინირებულ რეჟიმში ხომ უნდა ვიმუშაოთ, არა? თქვენი პირადობის მოწმობები და მონაცემები წარმოადგინეთ!
_ რისთვის გჭირდებათ პირადობის მონაცემები?
_ ასეა საჭირო. ტელეფონიც გვანახეთ, რა ფოტოები გაქვთ ბოლოს გადაღებული?!
_ თქვენ ვინ ბრძანდებით? ვის ვესაუბრებით და ვინ წაგვიშალა ფოტოები, ხომ უნდა ვიცოდეთ, თქვენც გაგვეცანით!!!
_დიდი ბოდიში, მაგრამ უნდა წაბრძანდეთ, _ ამის შემდეგ, დაცვის წევრებმა ჟურნალისტები ხელჩაკიდებული გაარიდეს რამდენიმე მეტრის მანძილზე.
