ამის შესახებ ცნობილი გასული კვირის საკრებულოს სხდომაზე გახდა. ცნობილი გახდა ისიც, რომ დეპუტატებს ეს საკითხი, საკრებულოს წინა დღეს, ბიუროზე გააცნეს:
_ ეს საკითხი კომისიებს არ განუხილავს, არც ფრაქციებს. ბიუროზე შემოიტანეს და ეს დარღვევაა. შესაბამისად, დღის წესრიგიდან უნდა მოიხსნას, _ აღნიშნა ფრაქცია “ქართული ოცნება _ დემოკრატიული საქართველოს” თავმჯდომარემ დავით შარაშიძემ. შარაშიძეს საკრებულოს სოციალურ საკითხთა კომისიის თავმჯდომარე, ზაურ ოსეფაიშვილიც დაეთანხმა, რომლის განმარტებით საკითხის ასე გამოტანა რეგლამენტის დარღვევაა.
მიუხედავად იმისა, რომ საკითხის განხილვა დღის წესრიგიდან მოიხსნა, საკრებულოს სხდომაზე დეტალებზე მაინც ისაუბრეს. როგორც გაირკვა, შენობების ფასი ძალიან მიზერულია _ მაგალითად, სატყეო მეურნეობის ყოფილი შენობა 27 000 ლარად არის შეფასებული. თუმცა, გამგეობის მუნიციპალური ქონების მართვის სამსახურის უფროსმა მალხაზ დოლიძემ განმარტა, რომ ეს ფასები დიდი ხნის წინანდელია და მას შემდეგ, რაც ობიექტები საპრივატიზაციოდ გამზადდება, მის ღირებულებას აუდიტი შეაფასებს.
დაზუსტდა ისიც, რომ შენობების გაყიდვას და ამით ბიუჯეტის შევსებას, რომლის დეფიციტი საარჩევნოდ გაბერილი შტატების გამო წარმოიშვა და რის გამოც, წლის ბოლოს, შესაძლოა, ხელფასებიც ვერ დაარიგონ, დეკემბერში აპირებენ.
“გურია ნიუსის” შეკითხვას _ საკმაოდ ხანმოკლე პერიოდში როგორ გეგმავს გამგეობა შენობების საპრივატიზაციოდ გამზადებას და შემდეგ გაყიდვას, საფინანსო სამსახურის უფროსმა, ზურაბ ჩანტლაძემ უპასუხა, და აღნიშნა, რომ ამისთვის ერთი თვე სავსებით საკმარისია.
ჩვენი კითხვა _ ასე სწრაფ ტემპში ამდენი ობიექტის გაყიდვა მიანიშნებს თუ არა იმაზე, რომ ხელისუფლებას მყიდველი წინასწარ ჰყავს შერჩეული, უპასუხოდ დარჩა. თუმცა, იქიდან გამომდინარე, რომ სამი ობიექტის ასე მოკლე დროში გაყიდვა რეალობასთან არცთუ ახლოა, ჩვენი კითხვის პასუხი ალბათ კითხვაშივეა, რაზეც რამდენიმე დეპუტატი ღიად დაგვეთანხმა.
