სისხლის სამართლის საქმის მასალების მიხედვით, შოთა სირაძემ ბახმაროში მიწები არაკანონიერი გზით დააკანონა. თუმცა, თავდაპირველი ვერსიით და ჩოხატაურის საჯარო რეესტრიდან წაღებული ოფიციალური დოკუმენტის თანახმად, დოკუმენტების რაოდენობა 388 აღწევდა. არავინ იცის, რა ბედი ეწია 256 დოკუმენტს. არც ის, ვის და რატომ დასჭირდა ამ ციფრის ასე მკვეთრად შემცირება.
დაზუსტებით ცნობილია 132 დოკუმენტის მფლობელთა ბედი _ მათ, უკლებლივ ყველამ, მიწა, ზედ დამაგრებული ქონებით, სახელმწიფოს ჩააბარა. მათი უმრავლესობა თანამდებობის პირი იყო _ ბევრი პოლიციის მაღალჩინოსანი და მათ თანამდებობები დაატოვებინეს კიდეც. თუმცა გამოძიება დამატებითი დეტალებით არ დაინტერესებულა.
ერთადერთ დამნაშავედ სირაძე ცნეს და შეკრებითობის პრინციპით 5 წელი და 5000 ლარიანი ჯარიმა შეუფარდეს.
მიუხედავად ამისა, სირაძისთვის საკრებულოს უფლებამოსილება არ შეუწყვეტია და ის დღემდე საკრებულოს წევრად ითვლება.
სულ ცოტა ხნის წინ, “გურია ნიუსისთვის” მიცემულ ინტერვიუში, ძებნაში მყოფი სირაძე აღნიშნავდა, რომ მისი საქმიანობის შესახებ საქმის კურსში ის ადამიანები იყვნენ, რომლებთანაც სამსახურეობრივი შეხება ჰქონდა, მათ შორის ჩოხატაურის მუნიციპალიტეტის საკრებულოს თავმჯდომარე ანტონ ხუნდაძე და გურიის გუბერნატორი, ვალერი ჩიტაიშვილიც.
_ როგორც ვიცი შოთა ჩაბარდა. იმედი მაქვს, რომ სიმართლე გაირკვევა და ყველაფერი დალაგდება, _ აღნიშნა ჩვენთან საუბრისას მისმა მეუღლემ, მაია პაიჭაძემ.
პაიჭაძე არ გამორიცხავს, რომ სირაძემ საქმის ხელახალი გამოძიების მოთხოვნით პროკურატურას მიმართოს. ამის შესახებ მზაობა, ჩვენთან ინტერვიუს დროს შოთა სირაძემაც გამოთქვა.
