დღის წესრიგით გათვალისწინებულ საკითხს _ “ოზურგეთის მუნიციპალიტეტის ბიუჯეტიდან სოციალური დახმარების გაცემისა და მიღების წესის დამტკიცების შესახებ”, მიუხედავად ხანგრძლივი ხმაურისა და აზრთა გაცვლა-გამოცვლისა, დეპუტატებმა დასამტკიცებლად კენჭი მაინც ვერ უყარეს.
მომხსენებელმა ირინა საჯაიამ თქვა, რომ სოციალური დახმარების მიღებისა და გაცემის წესში ცვლილებებია. მას დაემატა ორი ახალი პროგრამა არაფულად დახმარებებში. ესაა ხანდაზმულთა სახლის კომუნალური გადასახადების დაფარვა და სკოლამდელი აღზრდის დაწესებულებებში სოციალურად დაუცველთა, ლტოლვილთა და მრავალშვილიანთა ოჯახების გადასახადებისგან გათავისუფლება.
სხდომის მსვლელობისას, ძირითად სადავო საკითხად იქცა სარეიტინგო ქულის მიხედვით დახმარების გაცემა. ავთანდილ მექვაბიშვილი შეეწინააღმდეგა არაერთ მოსაზრებას: _ მაგალითად, როცა 70 ათას ქულის მქონე სოციალურად დაუცველს ერთჯერადი დახმარების სახით ვაძლევთ 100 ლარს და 160 ათასი ქულის მქონეს მივცემთ 200 ლარს, ასეთ შემთხვევაში, რამდენად სწორია ჩვენი ქმედება? რამდენად სწორია, თუ მთელი მოსახლეობა არ დევს ამ ბაზაში, რამდენად კანონიერად ვიქცევით, როცა იმ ბაზით ვზღუდავთ გაჭირვებულთა დახმარებას? ჩვენ ეს ყველაფერი გვინდა უარის სათქმელად? _ იკითხა მექვაბიშვილმა.
საბოლოოდ შეთანხმდნენ, რომ მომავალ ორშაბათს შედგება კომისიის სხდომა და ბიუჯეტის დამტკიცებამდე კიდევ ერთხელ განიხილავენ ამ საკითხს.
იურისტმა ირაკლი პაპავამ შენიშვნა შემოიტანა იმავე საკითხის მე-19 მუხლთან დაკავშირებით, სადაც მითითებულია: “საჯაროობის პრინციპის დაცვის უზრუნველყოფის მიზნით, სამსახურის მიერ სოციალური დახმარებების გაცემის საკითხთა განხილვაში, შეიძლება, მონაწილეობა მიიღონ დაინტერესებული მასობრივი ინფორმაციის საშუალებებისა და საზოგადოებრივი ორგანიზაციების წარმომადგენლებმა”.
კამათის შემდეგ, დეპუტატები შეთანხმდნენ ამ მუხლის ამოღებაზე, რადგან, თურმე, აღნიშნული საკითხების განხილვა ისედაც საჯაროა და არავინ იზღუდება, რომ სხდომებს დაესწროს.
დეპუტატმა კობა ხაბალაშვილმა კიდევ ერთხელ, ზოგადად მიმოიხილა ცვლილებები ბიუჯეტში, რომელ სამსახურს რა თანხა დაემატა ან პირიქით _ რამდენი მოაკლდა და განაცხადა, რომ არასამთავრობო ორგანიზაციების მიერ წამოყენებული წინადადება, ოზურგეთის პოლიციისთვის 50 ათასი ლარით დაფინანსების შეწყვეტის შესახებ, დადებითად გადაწყდა.
_ ეს აღარ მოხდება, პოლიცია მხოლოდ ცენტრალური ბიუჯეტიდან დაფინანსდება, ასევე მაჟორიტარი დეპუტატის ბიუროსთვის გათვალისწინებულ 10 ათას ლარსაც ცენტრალური ბიუჯეტი გაიღებს, დარჩენილი 60 ათასი ლარი კი მთლიანად სარეზერვო ფონდში გადავა, _ თქვა ხაბალაშვილმა.
საფინანსო განყოფილების გამგემ, ლია ქათამიძემ განმარტა, რომ 1 იანვრიდან უქმდება გამგეობის სოფლის მეურნეობის სამსახური და მის ნაცვლად შეიქმნება სოფლის მეურნეობის სამინისტროს დაქვემდებარებული რგოლი, რომელიც სახელმწიფო ბიუჯეტიდან დაფინანსდება.
საბოლოოდ, საკრებულოს სხდომა 26 დეკემბრისთვის გადაიდო.
