როგორც ოზურგეთის საკრებულოს დეპუტატი ლელა ნაცვალაძე ამბობს, ოზურგეთის ბიუჯეტში სარეზერვო ფონდი მაქსიმუმია, რაც ეჭვებს ბადებს, რომ აღნიშნული ათასები არაკანონიერად და გაუმჭვირვალედ დაიხარჯება. არასამთავრობო სექტორის წარმომადგენლები კანონის ხარვეზებზე საუბრობენ და ამბობენ, რომ საქართველოს კანონმდებლობა, სამწუხაროდ, არ აკონკრეტებს ფონდიდან გასახარჯი თანხების მიზნობრიობას, აქედან გამომდინარე, მისი ადმინისტრირება და ხარჯვა მთლიანად გამგებლის კომპეტენციის ფარგლებშია. გამგებელი კი აცხადებს, რომ სარეზერვო ფონდის თითოეული თეთრის ხარჯვა გამჭვირვალედ და კანონის დაცვით მოხდება, რისი გადამოწმება ყველა მოქალაქისთვის იქნება შესაძლებელი.
ოზურგეთის მუნიციპალიტეტის საკრებულოს დეპუტატი დიმიტრი კვერღელიძე ამ საკითხთან დაკავშირებით, ამ ეტაპზე კომენტარს არ აკეთებს, თუმცა, ბიუჯეტის დამტკიცების დროს, მან სარეზერვო ფონდთან დაკავშირებით, ჟურნალისტებთან ხმამაღალი განცხადებები გააკეთა და ბიუჯეტსაც არ დაუჭირა მხარი, რისი ერთ-ერთი მიზეზიც სწორედ სარეზერვო ფონდის ოთხჯერ გაზრდა იყო.
_ამ ეტაპზე თავს ვიკავებ კომენტარისგან.
_ბატონო დიმიტრი. ბიუჯეტის დამტკიცების დროს თქვენ სარეზერვო ფონდთან დაკავშირებით ხმამაღალი განცხადებები გააკეთეთ. . .
_ კი ბატონო, ახლა, ამ ეტაპზე თავს შევიკავებ, ყოველგვარი განცხადებისგან, -გვითხრა კვერღელიძემ.
არასამთავრობო ორგანიზაცია „საქართველოს დემოკრატიულ განვითარების კავშირის“ აღმასრულებელი დირექტორი ლევან ხინთიბიძე „გურია ნიუსთან“ ასეთ კომენტარს აკეთებს:
_საქართველოს კანონის “საქართველოს საბიუჯეტო კოდექსის” 67-ე მუხლი განმარტავს, რომ ადგილობრივი თვითმმართველი ერთეულის ბიუჯეტში გაუთვალისწინებელი გადასახდელების დასაფინანსებლად იქმნება სარეზერვო ფონდი, რომლის მოცულობა არ უნდა აღემატებოდეს წლიური ბიუჯეტით გათვალისწინებული ასიგნებების მთლიანი ოდენობის 2%-ს. ხოლო მისი განკარგვის თვალსაზრისით კი _ სარეზერვო ფონდიდან თანხებს ქალაქის მერის ან გამგებლის გადაწყვეტილების საფუძველზე, რომელიც მოიცავს ინფორმაციას თანხის ოდენობისა და მიზნობრიობის შესახებ, გამოყოფს საფინანსო ორგანო.
ოზურგეთის 2013 წლის ბიუჯეტის მაგალითზე, შეგვიძლია ვთქვათ, რომ ამ დოკუმენტის მე-10 მუხლის თანახმად, შექმნილია მუნიციპალიტეტის სარეზერვო ფონდი 200 000 ლარის ოდენობით, რაც ზუსტად ტოლია ბიუჯეტის ასიგნებების მთლიანი ოდენობის 2%-ისა, ანუ ოზურგეთის ბიუჯეტი შეადგენს 10 მილიონ ლარს, ხოლო მისი ორი პროცენტი კი 200 000 ლარია. მოცემული თანხის განკარგვას კი ახორციელებს მუნიციპალიტეტის გამგებელი, ხოლო თუ რა საჭიროების მიზნით, ამას საქართველოს კანონმდებლობა, სამწუხაროდ, არ აკონკრეტებს. აქედან გამომდინარე, მისი ადმინისტრირება და ხარჯვა მთლიანად გამგებლის კომპეტენციის ფარგლებშია.
„ნაციონალური მოძრაობის“ ოზურგეთის რაიონული ორგანიზაციის თავმჯდომარე მიხეილ გოგოტიშვილი ამბობს, რომ სარეზერვო ფონდის 200 000 ლარით განსაზღვრა ნიშნავს, რომ თანხა, რომელიც გასულ წლებთან შედარებით არასოდეს არ დახარჯულა სარეზერვო ფონდიდან მუნიციპალიტეტის საქმიანობისთვის, ანუ როცა ჩვენ ვიწყებდით, სარეზერვო ფონდი ყოველთვის დგებოდა 30 000 ლარიდან და დანარჩენი შემდეგ ემატებოდა, რის შემდეგაც, მაქსიმუმ 70 000 ლარს აღწევდა. უმჯობესი იქნებოდა, მუნიციპალიტეტის გამგებელს ეს თანხა გადაენაწილებინა სხვა მიმართულებებით, მაგალითად, იმ ადამიანების ხელშეკრულებების გაგრძელებისთვის, რომლებსაც დღეს სამსახურებიდან ათავისუფლებენ. უმჯობესი იქნებოდა, ეს 200 000 ლარი ამ ადამიანებისთვის ხელფასში გადაეხადათ და არ გაეშვათ სხვადასხვა სამსახურებიდან.
ლელა ნაცვალაძე: _პირველად ეს უნდა ჰკითხოთ შარაშენიძეს, რაში არის საჭირო სარეზერვო ფონდი 200 000 ლარის ოდენობით, რადგან წინა ხელისუფლების დროს, არცერთ წელს არ ყოფილა სარეზერვო ფონდი 50 000 ლარზე მეტი.
საერთოდ, მუნიციპალიტეტის 2013 წლის ბიუჯეტს მხარი იმიტომ არ დავუჭირე, რადგან ეს არის არამიზნობრივად, არაპროფესიონლების მიერ შედგენილი ბიუჯეტი, მათ შორის, აღნიშნული მუხლი, სადაც საკრებულოს მიერ არაკონტროლირებად, ვერ კონტროლირებად სარეზერვო ფონდში ამხელა თანხა ჩასვეს. დარწმუნებული ვარ, ის ადამიანები, ვინც თავის დროზე ეს ბიუჯეტი შეადგინა და კოტე შარაშენიძეს გაახმოვანებინა, როგორც გამგებლის მოვალეობის შემსრულებელს, საქმე საქმეზე რომ მიდგეს, კოტეს მიუშვერს ხელს. სწორედ ამიტომ მოვუწოდე კოტე შარაშენიძეს, რომ თავის თავზე პასუხისმგებლობა არ აეღო და არ დამიჯერა.
ვადასტურებ, ეს არის “შავი ფული”, რომელსაც მუნიციპალიტეტში გამგეობა, როგორც უნდა, ვისზეც უნდა და რანაირადაც უნდა, ისე გახარჯავს. სინამდვილეში აღნიშნული, დაცული მუხლით თანხები უნდა იყოს მიმართული მხოლოდ სტიქიური უბედურებებისა და საგანგებო მდგომარეობისთვის. წინა წლის ბიუჯეტით თუ ვიმსჯელებთ, წინა წელს დამატებული თანხები სარეზერვო ფონდში, მიუხედავად იმისა, რომ მილიონები იყო გამოყოფილი სოფლის პროგრამებსა თუ მრავალბინიანი გადახურვებისთვის, საკრებულომ ის სამუშაოები სარეზერვო ფონდით შეასრულა,რაც კანონით იკრძალება.
ოზურგეთის მუნიციპალიტეტის საკრებულოს ოპოზიციონერი წევრი, ფრაქცია „ნაციონალური მოძრაობის“ წევრი ირინა საჯაია “გურია ნიუსთან” ამბობს, რომ მას მიზანშეწონილად არ მიაჩნია ბიუჯეტში 200 000 ლარით სარეზერვო ფონდის განსაზღვრა და მან ბიუჯეტის დამტკიცებას საკრებულოს სხდომაზე მხარი არ დაუჭირა.
_ამხელა სარეზერვო ფონდი არცერთ გამგებელს არ ჰქონია. ამ თანხების განაწილება შეიძლებოდა სხვადასხვა მიმართულებებით. ჩვენს მიერ აუცილებლად გაკონტროლდება, რაში დაიხარჯება ეს ფონდი.
ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე აცხადებს, რომ სარეზერვო ფონდიდან თითოეული თეთრის დახარჯვა კანონის სრული დაცვით მოხდება.
_ბიუჯეტის ორი პროცენტი გამგეობის სარეზერვო ფონდს შეადგენს, რის საშუალებასაც კანონი გვაძლევს. რაც შეეხება ხარჯვას, თითოეული თეთრი მიზანმიმართულად განაწილდება და თუ ვინმე დაინტერესდება, ხელმისაწვდომი და გამჭვირვალე იქნება ნებისმიერი პიროვნებისთვის.
