საქართველოს ეკონომიკისა და მდგრადი განვითარების სამინისტროს სისტემაში შემავალ საჯარო სამართლის იურიდიულ პირს, რომელსაც ამჟამად საქართველოს ტექნიკური და სამშენებლო ზედამხედველობის სააგენტო ეწოდება, მომეტებული ტექნიკური საფრთხის შემცველი ობიექტების სახელმწიფო კონტროლისა და ზედამხედველობის გახორციელება ევალება. დათხოვილი თანამშრომლები მიიჩნევენ, რომ მათი გათავისუფლება მხოლოდ იმიტომ მოხდა, რომ რამდენიმე მნიშვნელოვან დასკვნას ხელი არ მოაწერეს (ასახელებენ გაზგაყვანილობის მილებს, მეტროპოლიტენის სარემონტო სამუშაოებს და სხვადასხვა ობიექტებს…) და მათ გათავისუფლებას მაშინდელი ინსპექციის უფროსის მოვალეობის შემსრულებელს, რატი ობოლაძეს უკავშირებენ.
გია ხადური, ინსპექციის ყოფილი თანამშრომელი: _ ობოლაძემ, რომელიც უფროსის მოვალეობის შემსრულებელი იყო, მოსვლიდან 2 თვის შემდეგ, თანამშრომლებთან რაღაც ინდივიდუალური გასაუბრება მოაწყო კაბინეტში, რომელსაც ჩვენი სამსახურის იურისტიც ესწრებოდა. გასაუბრებიდან ორი კვირის შემდეგ, გამოგვიცხადეს, რომ გათავისუფლებული ვიყავით. ვერ გეტყვით, რა კრიტერიუმებით ხელმძღვანელობდა ბატონი რატი ჩემს გათავისუფლებისას; ვერ ვიტყვი, რომ ეს ასაკობრივი იყო, რადგან სამმართველოში გაათავისუფლეს 40 წლის გიორგი ნიკოლაიშვილიც, როგორც სპეციალისტს, შემიძლია შევაფასო რამდენად კვალიფიციურია ადამიანი და გარწმუნებთ, ნიკოლაიშვილი ნამდვილად კვალიფიციური სპეციალისტი იყო. ჩვენი სამმართველოდან 6 თანამშრომელი გაგვათავისუფლეს. არ მინდა სუბიექტური ვიყო, მაგრამ 18 წელი ტექნიკურ უნივერსიტეტში ვმუშაობდი, ამწე დანადგარების და ინჟინერ-მექანიკოსის კვალიფიკაცია მაქვს. ასევე, გიორგი ნიკოლაიშვილის სამსახურიდან გათავისუფლება ჩემთვის დღესაც წარმოუდგენელია; მასთან დაკავშირებით სულ სხვა მიზეზები იყო…
გიორგი ნიკოლაიშვილი, ყოფილი თანამშრომელი: – რატი ობოლაძემ და ჩვენი სამსახურის იურისტმა დავით კუხიანიძემ გასაუბრება ჩაგვიტარეს. CV უნდა დაგვეწერა, რა გვქონდა გაკეთებული… ობოლაძემ მომისმინა და მკითხა, იცი თუ არა შენ საბაგირო გზებიო. საბაგიროს მონტაჟში მაქვს მონაწილეობა მიღებული-მეთქი. პარასკევი დღე იყო. ორშაბათს მირიან ბედიანიძემ და მისმა მოადგილემ თეიმურაზ კალმახელიძემ მითხრეს, გათავისუფლებული ხარო და გათავისუფლების შესახებ ცნობა მომაწოდეს. ბედიანიძემ მითხრა: ბევრი ვეცადე, ვუთხარი სპეციალისტია, არ შეიძლება ამის გაშვება-მეთქი, მაგრამ ობოლაძემ მითხრა, ეს პიროვნება მილიციაშია ნამუშევარიო. რამდენად სიმართალე მითხრა ბედიანიძემ, არ ვიცი. თანამშრომლებს ერთი კვირის მანძილზე ეტაპობრივად ათავისუფლებდნენ. რატი ობოლაძესთან როცა შევედი, მაგიდაზე ფეხებშემოწყობილმა მიპასუხა, “მე აქ სპეციალისტები არ მჭირდებაო!” გაოგნებული დავრჩი! თანმშრომლებს ვკითხე: რა პროფესიის არის ეს კაცი და ვისი გამოგზავნილია-მეთქი?! მითხრეს, ეკონომიურზე სწავლობს, ბენდუქიძის ჯგუფიდან არის, ვახო ლეჟავამ გამოაგზავნაო (იმ პერიოდში ეკონომიკის მინისტრის მოადგილე). იმის გამო, რომ ტექნიკური ზედამხედველობა ,”ნაციონალურ მოძრაობას” უშლიდა ხელს, ჩატარდა რეორგანიზაცია და დაასაჭურისეს!
რევაზ რევია, ყოფილი თანამშრომელი: _ არ ვიცი შეგვამცირეს თუ “ჩაგვრეცხეს”. დამიბარა ხელმძღვანელმა, გამომიცხადა, რომ სამსახური უნდა დამეტოვებინა. ასე მითხრა: “არ მჭირდება ის ხალხი ვინც პროფესიონალია, ქაღალდის გადამცემ-გადმომცემი მჭირდებაო”. ჩვენი საუბარიც ამით დამთავრდა.
“გურია ნიუსი” გათავისუფლებული თანამშრომლების ბრალდებებთან დაკავშირებით, საქართველოს ტექნიკური და სამშენებლო ზედამხედველობის სააგენტოს უფროსის მოადგილეს, რატი ობოლაძეს ესაუბრა.
_ კანონში რაღაც ცვლილებების გამო ოპტიმიზაცია ჩატარდა. საკმაოდ შინაარსიანი საკითხია. ასე, ტელეფონით ძნელია ამის ახსნა. ეს ემსახურებოდა როგორც სამსახურში დასაქმებულთა კვალიფიკაციის ამაღლებას, ასევე, მიღებულ კანონთან შესაბამისობაში მოყვანას, რომელმაც რიგი სერვისები და რეგულირებები გააუქმა. გასაუბრების საფუძველზე მოხდა ოპტიმიზაცია, საუკეთესოები შვარჩიეთ და დავტოვეთ.
_ დათხოვნილები ამბობენ, რომ მათი კვალიფიციურობის მიუხედავად გაათავისუფლეთ…
_ როდესაც სამსახურს თავისი უფლებების სარეგულაციო ობიექტების ნახევარზე მეტი შეუმცირდა, ცხადია, სამსახური ეფექტურობის თვალსაზრისიდან გამომდინარე, ამდენ თანამშრომელს ვეღარ არჩენდა. გარწმუნებთ, არანაკლები პროფესიონალები დარჩნენ. რა თქმა უნდა, მესმის, ხალხი, რომელიც გათავისუფლდა, უკმაყოფილოა. ისინი ერთი ხელის მოსმით არ გამითავისუფლებია. თითოეულთან 15-20 წუთიანი, ნახევარსაათიანი გასაუბრება მქონდა. ორი კვირა მივუძღვენი ამ საკითხს. საფუძვლიანად იქნა შესწავლილი, მაგრამ, რა თქმა უნდა, ისინი უკმაყოფილო იქნებიან.
_ ერთ-ერთმა გათავისუფლებულმა “გურია ნიუსთან“ განაცხადა, რატი ობოლაძემ მითხრა: “არ მჭირდება ის ხალხი ვინც პროფესიონალია, ქაღალდის გადამცემ-გადმომცემი მიჭირდება”. ადასტურებთ ამ ფაქტს?
_ ვაიმე, ეს არის სუფთა ადამინის და ჭეშმარიტების წინაშე დიდი ტყუილი. ასეთი რაღაცეები მე არასდროს მიკადრებია და არ მითქვამს. სხვათა შორის, უმრავლესობა ისე წავიდა, ჩემგან ნაწყენი არავინ ყოფილა. არ მესმის ეს რა ხალხია, ვის ელაპარაკებით?!
არაკანონიერად, ამორალურად, სწრაფად და ერთი ხელის მოსმით არაფერი არ გაკეთებულა. ერთი სული მაქვს, რომ ეს ვიღაცას ვუთხრა, ვინც ასე ცუდად არის ჩემდამი განწყობილი რაღაც მოტივების გამო. სხვათაშორის, მათი გათავისუფლება უხეშად არ მომხდარა. არც მოტივაციების, არც მიზნების გარეშე და არც დისკრიმინაციულად. შეცდომაში ხართ შეყვანილი თქვენც და სხვა ორგანიზაციაც, რომელიც ამასთან დაკავშირებით წერდა.
_ რას გულისხმობთ?
_ არა, ეს უბრალოდ, თითქოს ვიღაცეებს უნდათ შექმნან ისეთი განწყობა, თითქოს ისინი დაიჩაგრნენ სახელმწიფო სამსახურში. იმისათვის რომ… არ ვიცი. ცხადია, უკმაყოფილოები არიან, თქვენთვის ეს გაუგებარია?! ადამიანების ნაწილმა სამსახური დატოვა რაღაც რეფორმის გამო, ოპტიმიზაციის მიზეზით, სამსახურის და დარგის ფუნქციონირების ეფექტურობის მიზეზით. თუ ვინმეს აინტერესებს, რამდენად ეფექტურად რეგულირებული გახდა დარგი, რას მივაღწიეთ, ამაზეც დეტალურად შემიძლია ლაპარაკი.
_ ტექნიკური ზედამხედველობის სააგენტო ქვეყანაში ძალინ მნიშვნელოვანი ორგანიზაციაა. მისი დასკვნის საფუძველზე ხდება ყველა ობიექტის და სამშენებლო ობიექტების ექსპლუატაციაში შესვლა..
_ მე ვერ დაგეთანხმებით, კრიტერიუმები კანონშია განსაზღვრული. ყველა სამშენებლო ობიექტის გახსნა ჩვენზე არ არის დამოკიდებული. მხოლოდ განსაკუთრებული მნიშვნელობის ობიექტები გვევალება. თქვენ ყველა ობიექტი თქვით და ეს საქმეში ჩაუხედავი ადამინის ნათქვამია. ვინც დარჩა, კარგი პროფესიონალები არიან. შეეჯიბრონ ამათ. დაგეგმილი გვაქვს, რომ რამდენიმე თვეში სამსახურში ატესტაცია ჩავატაროთ. მათ, ვინც გათავისუფლდნენ შეუძლიათ მოვიდნენ, ბატონო ჩემო, მოვიდნენ და დაამტკიცონ თუ დაიჩაგრნენ, ჭეშმარიტება არ არსებობს ქვეყანაზე და პირადად მე ვარ ცუდი ადამიანი?! ეს დაამტკიცონ და მივიღებთ, ბატონო, სამსახურში! ამ სამსახურიდან ყველა ხომ არ წავიდა, ჩემი ხალხი – არც ახალი, არავინ მომიყვანია. პროფესიონალები დარჩნენ. იმის გათვალისწინებით, რომ კანონის მიხედვით ბევრი ფუნქცია მოაკლდა ამ სამსახურს, ამდენი თანამშრომელი საჭირო არ იყო. სახელმწიფო თანხები ხომ უნდა დაიზოგოს?! სამსახურის საქმეს ძალიან კარგად აკეთებენ. ოპტიმიზაცია ამას ემსახურება. ეგრე ვინც წავიდა სამსახურიდან უკმაყოფილა. ეს ყოველთვის ხომ არ ნიშნავს, რომ იქ ვიღაც მტარვალი ზის და ხალხს უშვებს?!
როდესაც კანონი უწყობს ხელს ჩვენი საქმიანობის საზედამხედველო ობიეტმა შეამციროს მუშაობა, მაგალითად, საშიში საწარმოს, ობიექტის ექსპლუატაციის ნებართვა გაუქმდა. ეს იმას ნიშნავს, რომ მრავალი სხვადასხვა ტიპის ნებართვა გაუქმდა, უბრალოდ, შეიცვალა ბაზარზე განთავსების ზედამხედველობის მექანიზმი. ჩვენი აზრით, ეს იყო ეფექტური. ადრე ეს მექანიზმი სახელმწიფო სამსახურში გარკვეულ კორუფციულ ბუდეებს ქმნიდა. სანამ მე მოვიდოდი ამ სამსახურში, ძალიან მძიმე მდგომარეობა იყო. კორუფციის გამო, 10 კაცი დაიჭირეს. გასაუბრება დაახლოებით 69 ადამიანთან მქონდა. ყოველგვარი მიკერძოების გარეშე ავარჩიე საუკეთესოები. არც ერთ მათგანს არ ვიცნობდი. საკანონმდებლო რეფორმები მოხდა, რომელსაც მე ვეთანხმები. აქ ძალინ ცუდად მიდიოდა საქმე, დიდი კორუფცია იყო.
_ საუბრობენ იმაზე, რომ თქვენ კახა ბენდუქიძის ჯგუფის წევრი ხართ…
_ არავის ჯგუფის წევრი არ ვარ. მე ვმუშაობ კახა ბენდუქიძესთან და მიმაჩნია, რომ საქმის კეთებასთან დაკავშირებით ის არის ძალიან ჭკვიანი ადამიანია. მის მორალურ მხარესთან არ ვიყავი დაკავშირებული, არც სხვა ისეთ წრეებთან. უბრალოდ, როდესაც იგი სახელმწიფო მინისტრი იყო რეფორმების კოორდინაციის საკითხებში, იქ მოვხვდი. მაშინ 20 წლის ვიყავი. კონკურსის წესით ამირჩიეს და ვმუშაობდი სპეციალისტად. ჩვენთან შემოდიოდა კანონმდებლობა გასაანალიზებლად. ზოგიერთ კანონს მაძლევდნენ გასაანალიზებლად, ჩემს დასკვნებს ვწერდი. ნელ-ნელა წლები რომ მომემატა და ტექნიკური კანონმდებლობის სფეროში გამოცდილება შევიძინე, ალბათ, მენდნენ. აქ ჩემი ნების საწინააღმდეგოდ გადმომიყვანეს.
