ჩოხატაურის მუნიციპალიტეტის საკრებულოს 31 მარტის სხდომაზე, მუნიციპალიტეტის გამგეობის საფინანსო სამსახურის უფროსმა მაია გოგოლაძემ 2017 წლის ბიუჯეტში შესატანი ცვლილებების და დამატების თაობაზე, გამგებლის, ირაკლი კუჭავას განმარტებითი ბარათი წარმოადგინა.
ბარათის თანახმად, 2017 წლის 1 იანვრისთვის მუნიციპალიტეტის ბიუჯეტში დარჩა ნაშთი 852 100 ლარი, მათ შორის, “სოფლის მხარდაჭერის პროგრამის ფარგლებში გამოყოფილი თანხიდან _ 1 600 ლარი; სტიქიის შედეგების სალიკვიდაციო ღონისძიებების გასახორციელებლად გამოყოფილი თანხიდან _ 800 900 ლარი; მუნიციპალიტეტებისთვის საქართველოს მთავრობის სარეზერვო ფონდიდან 2016 წლის ბიუჯეტით გათვალისწინებული ღონისძიებების შეუფერხებელი დაფინანსების მიზნით გამოყოფილი თანხიდან _ 1 500 ლარი.
როგორც მაია გოგოლაძემ განმარტა, აღნიშნული თანხა მიიმართება წინა წელს აღებული ვალდებულებების დასაფარად, ხოლო ნაშთიდან დარჩენილ 48 100 ლარზე გამოიცა საქართველოს მთავრობის 2017 წლის 26 იანვრის განკარგულება, რომლის თანახმადაც, დარჩენილი ეკონომიები უნდა მიიმართოს ინფრასტრუქტურული პროექტებისთვის საჭირო საპროექტო და საექსპერტო მომსახურების შესყიდვის მიზნით.
“საქართველოს მთავრობის 2017 წლის 14 მარტის განკარგულებით, “საქართველოს რეგიონებში გასახორციელებელი პროექტების ფონდიდან ადგილობრივი თვითმმართველი ერთეულებისთვის თანხის გამოყოფის შესახებ” ჩოხატაურის მუნიციპალიტეტს გამოეყო 388 500 ლარი, აღნიშნული თანხა მიმართული იქნება შემდეგი ინფრასტრუქტურული პროექტების დაფინანსებისთვის: სოფელ ზომლეთში ძველი ადმინისტრაციული შენობის რეაბილიტაცია საბავშვო ბაღის, ბიბლიოთეკის და ახალგაზრდული ცენტრის განთავსების მიზნით _ 152 000 ლარი; ჩოხატაურის მუნიციპალიტეტის სოფელ ამაღლებაში კულტურის სახლის რეაბილიტაცია _ 152,7 ათასი ლარი; სოფელ შუაფარცხმის სკვერის მოწყობა _ 83 800 ლარი,” _ აღნიშნა მაია გოგოლაძემ.
როგორც სხდომაზე გაირკვა, მუნიციპალიტეტის 2017 წლის ბიუჯეტის შემოსავლები უნდა შემცირდეს 125 500 ლარით და შესაბამისად, ბიუჯეტის დაზუსტებული მოცულობა გახდება 7 079 900 ლარი.
“აღნიშნული თანხით უნდა შემცირდეს ბიუჯეტის ხარჯები, კერძოდ: ა(ა)იპ “კურორტი ბახმაროს” სუბსიდირება _ 5 000 ლარით, ა(ა)იპ ს.ს.ს. დაწესებულება “მომავალის” სუბსიდირება _ 20 000 ლარით, ა(ა)იპ მოსწავლე ახალგაზრდობის სახლის სუბსიდირება _ 7 000 ლარით, ა(ა)იპ საზოგადოებრივი ჯანდაცვის ცენტრის სუბსიდირება _ 1 500 ლარით, ა(ა)იპ სპორტის განვითარების ცენტრის სუბსიდირება _ 5 000 ლარით, ა(ა)იპ კულტურის ცენტრის სუბსიდირება _ 10 000 ლარით, ა(ა)იპ სამუსიკო სკოლის სუბსიდირება _ 5 000 ლარით, ა(ა)იპ სამუზეუმო გაერთიანების სუბსიდირება _ 10 000 ლარით, ა(ა)იპ სამხატვრო სკოლის სუბსიდირება _ 5 000 ლარით, ა(ა)იპ სამხატვრო გალერეის სუბსიდირება _ 2 000 ლარით, ა(ა)იპ სასპორტო სკოლის სუბსიდირება _ 85 500 ლარით, აქედან 30 500 ლარი მიიმართება ა(ა)იპ საფეხბურთო კლუბ “ბახმაროს” სუბსიდირებაზე, სადაც სასპორტო სკოლაში არსებული საფეხბურთო გუნდები გადავიდა,” _ აღნიშნა გოგოლაძემ.
2017 წლის ბიუჯეტში, ასევე, შემცირდა რელიგიის დაფინანსება 10 000 ლარით და ეს თანხა განათლების სისტემის ხელშეწყობის პროგრამაზე მიიმართება.
“მუნიციპალიტეტის კეთილმოწყობის ღონისძიებებში მოხდება მუხლობრივი ცვლილება _ შემცირდება არაფინანსური აქტივების ზრდის მუხლი 5 000 ლარით და მიიმართება ხარჯების მუხლში (უმეთვალყურეოდ დარჩენილი ცხოველების იზოლაცია),” _ თქვა გამგეობის საფინანსო სამსახურის უფროსმა.
მისივე ინფორმაციით, სარეზერვო ფონდი შემცირდება 20 000 ლარით; განათლების სისტემის ხელშეწყობის პროგრამის ხარჯები _ 15 000 ლარით; შენობების ტექნიკური პასპორტების და მიწის საკადასტრო აზომვითი ნახაზების და საინფორმაციო საშუალებებში გამოქვეყნების, საპროექტო დოკუმენტაციისა და საექსპერტო მომსახურების შესყიდვის ხარჯები _ 23 000 ლარით.
მაია გოგოლაძის განმარტებით, აღნიშნული თანხებიდან მუნიციპალიტეტის გამგეობის გასული წლის დავალიანების (ვალდებულების კლება) დასაფარად მიმართული იქნება 22 000 ლარი, ხოლო დარჩენილი 36 000 ლარი მუნიციპალიტეტის საქონელი და მომსახურების მუხლში. გარდა ამისა, მოხდება მუხლობრივი ცვლილება მუნიციპალიტეტის გამგეობის ხარჯებში და 27 900 ლარი მიიმართება ისევ “საქონელი და მომსახურების” მუხლში.
“პატრიოტთა ალიანსის” ფრაქციის თავმჯდომარე, ირაკლი ახობაძე დაინტერესდა, რატომ იზრდებოდა ამ მუხლში თანხა იმ ფონზე, როცა სოციალურ პროექტებს აკლდება. მაია გოგოლაძის თქმით, ამის მიზეზი შესაბამის მუხლში თანხის ნაკლებობაა.
_ გაცხადებული პოლიტიკაა, რომ ხარჯები უნდა შემცირდეს და ამ გაჭირვებული ბიუჯეტის ფონზე ვზრდით თანხას “საქონლის და მომსახურების” მუხლში. ამაში რაიმე ლოგიკა არის?! რატომ ვამცირებთ სოციალური უზრუნველყოფის ხარჯებს, სად არის მიზნობრივი თანხები? ეს საქმის კეთების ბიუჯეტი არ არის და მე მას მხარს არ დავუჭერ, _ აღნიშნა ირაკლი ახობაძემ.
გოგოლაძის მიერ წარმოდგენილი გამგებლის განმარტებითი ბარათით ისიც გაირკვა, რომ 2016 წლის ბიუჯეტით გათვალისწინებული ვალდებულებების დასაფარად 81,1 ათასი ლარი მიიმართება.
_ ვინმემ ამიხსენით, რატომ გვაქვს ამხელა ვალი? რატომ დააწვა ეს ჩოხატაურის ბიუჯეტს? ამ ვალდებულებების გასტუმრების გამო, ბევრ სამუშაოს აკლდება თანხები, მათ შორის, სოციალურ პროექტებს. წელს იმიტომ აკლებთ, რომ შარშან არასწორად დახარჯეთ. ვინ არის ამისთვის პასუხისმგებელი?! ვინ აიღო ეს პასუხისმგებლობა და აგვიხსენით, რატომ გვაქვს ამხელა ვალი? _ დაინტერესდა ირაკლი ახობაძე.
მაია გოგოლაძის განმარტებით, ვალდებულება საფინანსო სამსახურს უკვე აღებული აქვს და ეს თანხა გასასტუმრებელია:
_ რაც შეეხება ხარჯვას, იგი ხდება საკასო მეთოდით და ეს ვალდებულებები გასასტუმრებელია 2017 წლის ბიუჯეტიდან, _ თქვა მაია გოგოლაძემ.
საბოლოოდ, დეპუტატებმა წარმოდგენილი ცვლილებები მიიღეს და ბიუჯეტში ეს ცვლილებებიც ასახეს.
