მიუხედავად 2010 წელს ჩატარებული სარეაბილიტაციო სამუშაოებისა, რომელიც ძირითადად შენობის ფასადისა და ადმინისტრაციული ოთახების კეთილმოწყობას ითვალისწინებდა, სკოლაში არსებული პირობები არ გაუმჯობესებულა.
ირინა გაგუა, საზოგადოებასთან ურთიერთობის სპეციალისტი: – ეს სპორტსკოლა ემსახურება მომავალი თაობის აღზრდას, ჯანსაღი ცხოვრების წესის დანერგვას და რადგან საქმე ბავშვებს ეხება, პირველ რიგში უნდა იყოს დაინტერესება ასეთი ტიპის დაწესებულებების პრობლემების აღმოფხვრაზე. ყველამ ერთად – ადგილობრივმა მთავრობამ, პედაგოგებმაც და მშობლებმაც უნდა ვიბრძოლოთ, რომ ამ ბავშვებს ხელი შევუწყოთ, რადგან ძალიან დიდ წარმატებებს აღწევენ ჩვენი სკოლის აღსაზრდელები და გაუმჯობესებულ პირობებში უფრო დიდ გამარჯვებას მიაღწევენ. მწვრთნელებს დაბალი ხელფასი აქვთ, მიუხედავად ამისა, ისინი ძალ-ღონეს არ იშურებენ. ახალი მთავრობის მოსვლის შემდეგ გადავწყვიტე თავიდან შემოვიარო ყველა უწყება, ყველა სამინისტრო და სენაკის სპორტსკოლაში არსებული პრობლემების მოგვარება მოვითხოვო. საკრებულოს სხდომაზეც დავაყენებ ამ საკითხს. არაფრით არ გავჩერდები, ყველას დავიყენებ გვერდით, ვისაც სპორტი უყვარს, პატარა სპორტსმენებზე გული შესტკივა და აუცილებლად მივიპყრობთ ყურადღებას, ყველას მივაწვდენ ხმას…
ხვიჩა სანაია, მენეჯერი: – ჩვენ ძალიან ძლიერი ბავშვები გვყავს. ბაქოში ჩატარებულ მსოფლიო ჩემპიონატზე ბერძნულ-რომაულ ჭიდაობაში სენაკის სასპორტო სკოლის მოსწავლემ მეორე საპრიზო ადგილი მოიპოვა. წარმატებები გვაქვს ძიუდოში, ჭადრაკში. მწვრთნელებს ძალიან დაბალი ხელფასები აქვთ, წარმოუდგენელია მწვრთნელს ჰქონდეს 160 ლარი და დარაჯს _ 120 ლარი. მაგრამ ეს სახელმწიფოს გადასაწყვეტია და ვიმედოვნებ, ახლა მაინც მიაქცევენ ყურადღებას. ამას ისიც ემატება, რომ მწვრთნელებს და ბავშვებს გაუსაძლის გარემოში უხდებათ ვარჯიში. სკოლაში არსებული სამი დარბაზი საჭიროებს რეაბილიტაციას, შენობას არ გააჩნია გასახდელი ოთახი, მოსაწესრიგებელია სველი წერტილები, არ აქვთ სათანადო ინვენტარი.
თენგიზ ხარბედია, სასწავლო ნაწილის გამგე: – სპორტსკოლაში სამი დარბაზი გვაქვს, სამი წლის უკან სარემონტო სამუშაოები ჩატარდა, მაგრამ უხარისხოდ. ამას ემატება ისიც, რომ შენობა ნესტიანია და იატაკი უკვე ჩაინგრა. მოკრივეებს არ აქვთ რინგი, ძიუდოისტებს _ ტატამი!!! ვის არ ვთხოვეთ, ვინ არ შევაწუხეთ, მაგრამ უშედეგოდ. სასპორტო სკოლები დაუქვემდებარეს მუნიციპალურ მმართველობას, გამგებელი წყვეტს ყველაფერს. არც დაზღვევა გვაქვს და პედაგოგის სტატუსიც მოაშორეს მწვრთნელებს. საქართველოს მთავრობა შეიცვალა, იმედია, სენაკსაც დაადგება საშველი და ახალი თანამდებობის პირები დაინტერესდებიან ამ პრობლემებით.
სენაკის მუნიციპალიტეტის გამგეობაში “გურია ნიუსს” განუცხადეს, რომ 2013 წლის ბიუჯეტში გათვალისწინებული თანხების მიხედვით, შესაძლებელი გახდება სპორტული სკოლისთვის დახმარების გაწევა.
