“ბოლო წლებში ჩადენილი გახმაურებული დანაშაულებების ფაქტებთან დაკავშირებით სამოქალაქო საზოგადოების ინტერესი საკმაოდ მაღალია. აქედან გამომდინარე, მედია საშუალებების მხრიდან ხშირად ხდება ერთის მხრივ სკანდალური და მეორეს მხრივ – არაეთიკური ვიდეო მასალის ტირაჟირება, რასაც სამწუხაროდ დღესაც ჰქონდა ადგილი, როდესაც ჯერ “რუსთავი2”-ის და შემდეგ სხვა ტელეკომპანიების მიერ გავრცელდა 2004 წლის 24 ნოემბერს დიდუბის ეკლესიასთან ბუტა რობაქიძის გარდაცვალების ამსახველი ვიდეო მასალა.
მიგვაჩნია რომ, ასეთი ტიპის ინფორმაციის გავცელებისას მედია საშუალებებმა უნდა დაიცვან გარკვეული ეთიკური ნორმები და გათვალისწინებული იქნეს ოჯახის წევრების უფლებები, კერძოდ მსგავსი ვიდეო მასალის გავრცელება უნდა მოხდეს ოჯახის წევრების წინასწარი გაფრთხილებით ან მათთან შეთანხმებით. ვფიქრობთ, რომ მაღალი საზოგადოებრივი ინტერესის არსებობა არ გულისხმობს კონკრეტული ადამიანების (ამ შემთხვევაში ოჯახის წევრების) უფლებების დარღვევას, მათზე მორალური და ფსიქოლოგიური ზიანის მიყენების გზით.
მოვუწოდებთ მედია საშუალებებს მაქსიმალურად დაიცვან და იმოქმედონ ადამიანის უფლებების დაცვის ფარგლებში და სამომავლოდ მსგავსი ვიდეო მასალის გავრცელებისას მეტი პასუხისმგებლობა გამოიჩინონ.” _ ნათქვამია განცხადებაში.
